سىياقى ماسەلەسىن داۋعا اينالدىرعان قارجى مينيسترلىگى قىزمەتكەرلەرىنە قانشا سىياقى تولەيدى

«سىياقىلاردى تولەۋ ءۇشىن بيۋدجەتتەن ارنايى قاراجات بولىنبەيدى. مەملەكەتتىك ۇيىمداردىڭ سىياقىلاردى بەرۋ سوماسى ءتيىستى ەرەجەدە بەلگىلەنگەن ءارى مينيسترلىكتى قوسا العاندا، ءاربىر مەملەكەتتىك ورگاننىڭ ۇنەمدەۋىنە بايلانىستى جانە ونى بيۋدجەتتىك باعدارلامانىڭ اكىمشىسى دەربەس جۇرگىزەدى. وسى رەتتە سىياقىلاردى تولەۋگە بايلانىستى سىزگە بيۋدجەتتىك باعدارلامالاردىڭ اكىمشىلەرىنە تىكەلەي حابارلاسۋ قاجەت. 15 مىڭ قىزمەتكەر جۇمىس ىستەيتىن قارجى مينيسترلىگى بويىنشا 2023 -جىلى جىلىنا شامامەن 4 جالاقىعا تەڭ سىياقى بەرىلدى (ناۋرىز مەيرامى، قازاقستان رەسپۋبليكاسىنىڭ كونستيتۋتسياسى كۇنى، ق ر رەسپۋبليكا كۇنى، ق ر تاۋەلسىزدىك كۇنى)»، - دەپ جازىلعان جاۋاپتا.

بۇدان ۆەدومستۆوداعى مينيستردەن باستاپ مامانعا دەيىنگى قىزمەتشىنىڭ ءبارى ءبىر جىلدا ءتورت رەت وزىنە تاعايىندالعان ايلىق ەڭبەكاقى مولشەرىندە سىياقى الىپ وتىرعانىن تۇسىنۋگە بولادى.

«بارلىق دەڭگەيدەگى لاۋازىمدىق قىزمەتكەرلەردى سىياقىمەن ماراپاتتاۋ شارتتارى قاعيدالارىمەن بەلگىلەنگەن. قازىرگى تاڭدا مينيسترلىك اتالعان قاعيدالاردى باسشىلىققا الادى. مەملەكەتتىك ۇيىمداردىڭ قىزمەتكەرلەرىنە سىياقى تولەۋ مولشەرى قاعيدالارمەن بەلگىلەنىپ، ءاربىر مەملەكەتتىك ورگاننىڭ، ونىڭ ىشىندە مينيسترلىكتىڭ ۇنەمدەلگەن قاراجاتىنا بايلانىستى، بيۋدجەتتىك باعدارلاما اكىمشىسىمەن ءوز بەتىنشە جۇزەگە اسىرىلادى»، - دەلىنگەن مينيسترلىك مالىمەتىندە.

مينيسترلىك ماماندارى ايتىپ وتىرعان قاعيدا ۇكىمەتتىڭ №1127 قاۋلىسى ارقىلى بەكىتىلگەن.

سونداي-اق قارجى مينيسترلىگى مەملەكەتتىك قىزمەتشىلەرگە قانداي شىعىنداردى ۇنەمدەۋدەن قالعان قاراجات سىياقى رەتىندە ۇلەستىرىلەتىنىن ءتۇسىندىردى.

«سىياقىلاردى تولەۋ ءۇشىن بيۋدجەتتەن ارنايى قاراجات بولىنبەيدى. مەملەكەتتىك ۇيىمداردىڭ سىياقىلاردى بەرۋ سوماسى ءتيىستى ەرەجەدە بەلگىلەنگەن. ءاربىر مەملەكەتتىك ورگاننىڭ ۇنەمدەۋىنە بايلانىستى جانە ونى بيۋدجەتتىك باعدارلامانىڭ اكىمشىسى دەربەس جۇرگىزەدى»، - دەپ جازىلعان جاۋاپتا.

سونىمەن مەملەكەتتىك ورگانداردا سىياقى بەرۋ مەن ماتەريالدىق كومەك كورسەتۋ شارالارى مىنانداي شىعىنداردى ۇنەمدەۋ ەسەبىنەن ىسكە اسادى:

ءىس ساپارلار مەن ءۇي- جايلاردى جالعا الۋ شىعىندارىن ۇنەمدەۋدەن؛
كوممۋنالدىق قىزمەتتەر مەن بايلانىس قىزمەتتەرىنىڭ شىعىندارىن ۇنەمدەۋدەن؛
كولىك قىزمەتتەرى مەن ونى كۇتىپ ۇستاۋدىڭ، قىزمەت كورسەتۋدىڭ شىعىندارىن ۇنەمدەۋدەن؛
عيماراتتار مەن ءۇي-جايلاردى، جابدىقتاردى جانە باسقا دا نەگىزگى قۇرالداردى اعىمداعى جوندەۋ شىعىندارىن ۇنەمدەۋدەن؛
نەگىزگى جالاقى مەن (بوس ورىندار، اۋرۋحانا پاراقتارى جانە ت. ب. )، باسقا دا تاۋارلار ساتىپ الۋ شىعىندارىن ۇنەمدەۋ ەسەبىنەن.
ەسكە سالساق، قارجى ءمينيسترى ءمادي تاكييەۆ مەملەكەتتىك قىزمەتشىلەرگە ۇنەمدەلگەن بيۋدجەت قارجىسىن سىياقى تۇرىندە بەرۋگە تىيىم سالىناتىنى تۋرالى مالىمەت ايتىپ، قوعامدا ءبىراز پىكىرتالاس تۋدىرعان ەدى.

ءتىپتى پرەزيدەنت قاسىم-جومارت توقايەۆ تا وسى ماسەلە تۋرالى پىكىر ءبىلدىردى.

اۆتور
ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى