سەيسميكالىق احۋالدى باقىلاۋ جونىندەگى جەدەل شتاب 24/7 تارتىبىندە جۇمىس ىستەپ جاتىر
استانا. KAZINFORM - قازاقستان ت ج م باسشىسىنىڭ تاپسىرماسى بويىنشا سەيسميكالىق احۋالدى باقىلاۋ جونىندەگى جەدەل شتاب تاۋلىك بويى جۇمىس تارتىبىنە كوشتى. شارالار جەدەل دەن قويۋعا جانە ىقتيمال تابيعي اپاتتاردىڭ سالدارىن ازايتۋعا باعىتتالعان. بۇل تۋرالى ق ر ت ج م ءمالىم ەتتى.
ق ر ت ج م كوماندالىق ورتالىعىنىڭ نەگىزىندە توتەنشە جاعدايلار ۆيتسە-ءمينيسترى باتىربەك ابدىشەۆتىڭ توراعالىعىمەن مەملەكەتتىك ورگاندار وكىلدەرىنىڭ قاتىسۋىمەن كەڭەس وتكىزىلدى.
ۆەدومستۆولار اراسىنداعى ۇيلەستىرۋدى ارتتىرۋ جانە ازاماتتىق قورعاۋ كۇشتەرىنىڭ دايىندىعىن جاقسارتۋ ماسەلەلەرى تالقىلاندى. ت ج سالدارىن جويۋ جونىندەگى ءىس-قيمىل جوسپارلارى وزەكتەندىرىلدى، سونداي-اق جاقىن ماڭداعى اۋماقتىق بولىمشەلەردەن قۇتقارۋشىلاردىڭ جەدەل توپتارى دايىندىققا كەلتىرىلدى. بۇدان باسقا، اقپارات الماسۋدى قامتاماسىز ەتۋ جانە ءىس-قيمىلداردى ۇيلەستىرۋ ءۇشىن اۋماقتىق شتابتارمەن بەينەكونفەرەنسيا وتكىزىلدى. ۆيتسە-مينيستر اپاتتى سالداردىڭ الدىن الۋ ءۇشىن بارلىق قىزمەتتەردىڭ جەدەلدىگى مەن ۇيلەسىمدى جۇمىسىنىڭ ماڭىزدىلىعىن اتاپ ءوتتى.
ۆەدومستۆوارالىق ۇيلەستىرۋدى ۇيىمداستىرۋ ءۇشىن ۆەدومستۆو باسشىلىعىنىڭ قۇرامىنان قۇرىلعان ت ج م جەدەل توبى جونەلتىلدى. قۇتقارۋشىلار ەسەپتوپتارى مەن ارنايى تەحنيكا قاۋىپ-قاتەرگە تەز دەن قويۋ ءۇشىن جامبىل وبلىسىنىڭ سەيسميكالىق قاۋىپتى ەلدى مەكەندەرىنە كوشىرىلدى.
سەيسميكالىق بەلسەندىلىكتىڭ مونيتورينگىن وتكىزۋ، حالىقتى اقپاراتتاندىرۋ جانە شۇعىل قىزمەتتەردى ىقتيمال توتەنشە جاعدايلارعا دايىنداۋعا ەرەكشە نازار اۋدارىلدى. قابىلدانعان شەشىمدەر ازاماتتاردىڭ قاۋىپسىزدىگىن قامتاماسىز ەتۋگە جانە ونەركاسىپ پەن تىرشىلىكتى قامتاماسىز ەتۋ نىساندارىن قوسا العاندا، نەگىزگى ينفراقۇرىلىمدى قورعاۋعا باعىتتالعان.
مينيسترلىك جاعدايدى باقىلاۋدى جالعاستىرادى جانە ودان ءارى ءىس-قيمىلدار تۋرالى ۋاقتىلى حاباردار ەتەدى.
بۇعان دەيىن حابارلانعانداي، ەربول قاراشوكەيەۆ جەدەل شتاب وتىرىسىن وتكىزگەنىن جازعان بولاتىنبىز.
اۆتور
باقىتگۇل اباي قىزى
