سەيسمولوگيا ينستيتۋتى عىلىم مينيسترلىگىنە بەرىلۋى مۇمكىن بە

بىلتىر ق ر عىلىم جانە جوعارى ءبىلىم ءمينيسترى ساياسات نۇربەك سەيسمولوگيا ينستيتۋتىن ءوزى باسقارىپ وتىرعان ۆەدومستۆوعا قايتارۋعا قارسى ەمەس ەكەنىن ايتتى.

وسى ورايدا، Kazinform ءتىلشىسى عىلىم جانە جوعارى ءبىلىم مينيسترلىگىنە، توتەنشە جاعدايلار مينيسترلىگىنە جانە سەيسمولوگيالىق بايقاۋ جانە زەرتتەۋ ۇلتتىق عىلىمي ورتالىعىنا بۇل ماسەلە بويىنشا ساۋالحات جولدادى. وعان جاۋاپ بەرگەن ت ج م ءوزىنىڭ ۆەدومستۆولىق باعىنىستى ۇيىمىن باسقا مينيسترلىككە بەرۋ ماسەلەسى قاراستىرىلىپ جاتپاعانىن مالىمدەدى. بۇل اقپاراتتى عىلىم مينيسترلىگى دە راستادى.

عىلىم كوميتەتىنىڭ ءتوراعاسى عالىمجان جانقۋاتوۆ ءوز جاۋابىندا سەيسمولوگيا ينستيتۋتىن قاۋىپسىزدىك سۇراقتارىمەن اينالىسپايتىن ۆەدومستۆوعا بەرۋ ورىنسىز ەكەنىن اتاپ ءوتتى.

- «سەيسمولوگيالىق بايقاۋ جانە زەرتتەۋ ۇلتتىق عىلىمي ورتالىعى» ج ش س مەملەكەتتىڭ سەيسميكالىق قاۋىپسىزدىگى ماسەلەلەرىمەن اينالىسادى. جاعدايدى ۇزدىكسىز سەيسميكالىق باقىلاۋ جانە جەدەل تالداۋ بويىنشا ستراتەگيالىق فۋنكتسيالاردى ورىندايدى. اتالعان فۋنكتسيالار ق ر عىلىم جانە جوعارى ءبىلىم مينيسترلىگىنىڭ قۇزىرەتىنە كىرمەيدى. وسىنى ەسكەرە وتىرىپ، «س ب ز ۇ ع و» ج ش س-نى ق ر ع ج ب م-نىڭ قاراماعىنا بەرۋدى ورىنسىز جانە ەلدىڭ سەيسميكالىق قاۋىپسىزدىگىنىڭ مۇددەلەرىنە ساي كەلمەيدى دەپ سانايمىز، - دەدى ول.

سونىمەن قاتار عىلىم كوميتەتىنىڭ باسشىسى سەيسمولوگيا ينستيتۋتى گرانتتىق جانە باعدارلامالىق- نىسانالى قارجىلاندىرۋ شەڭبەرىندە مينيسترلىك تاراپىنان قارجىلاندىرىلاتىنىن حابارلادى.

- 2023-2025 -جىلدارعا ارنالعان رەسپۋبليكالىق بيۋدجەتتە «سبزۇعو» جشس- ىنە 2024 -جىلعا - 157,287 ميلليون تەڭگە، 2025 -جىلعا - 178 ميلليون تەڭگە قارجىلاندىرۋ كوزدەلگەن، - دەيدى عالىمجان جانقۋاتوۆ.

ودان بولەك سەيسمولوگيالىق عىلىم ورتالىعىنا ەكى جوبانى ىسكە اسىرۋعا قارجى بولىنگەن. اتاپ ايتقاندا، 2024-2026 -جىلدارعا ارنالعان «قازاقستان وبلىستارى مەن قالالارىنىڭ اۋماقتارىنىڭ سەيسميكالىق قاۋىپتىلىگىن قازىرگى عىلىمي- ادىستەمەلىك نەگىزدە باعالاۋ» جوباسىنا جالپى سوماسى 2 ميلليارد 314 ميلليون تەڭگە (2024 -جىل - 764 ميلليون تەڭگە، 2025 -جىل - 850 ميلليون تەڭگە، 2026 -جىل - 700 ميلليون تەڭگە) قاراستىرىلعان. ال 2023-2025 -جىلدارعا ارنالعان عىلىمي جوبا اياسىندا بيىل 26,4 ميلليون تەڭگە بەرىلەدى.

اگەنتتىك ساۋالىنا جاۋاپ بەرگەن سەيسمولوگيا ينستيتۋتى وزگە مينيسترلىككە اۋىسۋ بويىنشا پوزيتسياسىن ءتۇسىندىردى.

- «س ب ز ۇ ع و» مەملەكەت ايقىنداعان باسىمدىقتار شەڭبەرىندە عىلىمي زەرتتەۋلەردىڭ ساباقتاستىعىن ساقتاي وتىرىپ جانە ەلىمىزدىڭ سەيسميكالىق قاۋىپسىزدىگىن ارتتىرۋعا باعىتتالعان مىندەتتەردى ورىنداۋ ءۇشىن بەيىندى مينيسترلىكتەرمەن ءوزارا ءىس-قيمىل جاساۋعا دايىن، - دەلىنگەن جاۋاپتا.

ايتا كەتكەن ءجون، سەيسمولوگيا ينستيتۋتى 1976 -جىلى قازاق ك س ر ۇكىمەتىنىڭ قاۋلىسىمەن جانە قازاق ك س ر عىلىم اكادەمياسى پرەزيديۋمىنىڭ قاۋلىسىمەن قۇرىلعان. 2023 -جىلى «سەيسمولوگيا ينستيتۋتى» ج ش س مەن «سەيسمولوگيالىق تاجىريبەلىك- ادىستەمەلىك ەكسپەديتسيا» ج ش س بىرىكتىرۋ جولىمەن جارعىلىق كاپيتالىندا مەملەكەتتىڭ 100 پايىز قاتىسۋىمەن «سەيسمولوگيالىق باقىلاۋلار مەن زەرتتەۋلەر ۇلتتىق عىلىمي ورتالىعى» ج ش س بولىپ قايتا قۇرىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى