سيريا: وپپوزيتسيا ءتارتىپتى قالاي قالپىنا كەلتىرمەك

سيريالىق جانە حالىقارالىق ب ا ق-تىڭ حابارلاۋىنشا، دۇيسەنبى كۇنى داماشىقتا وپپوزيتسيانىڭ ساياسي دەپارتامەنتى مەن شەتەلدىك ديپلوماتيالىق ميسسيالار اراسىندا دۇركىن-دۇركىن كەزدەسۋ ءوتتى.

كەزدەسۋلەردە سيريانىڭ ساياسي بولاشاعى مەن قاۋىپسىزدىك ماسەلەسى، سونداي-اق بوسقىنداردىڭ ەلگە ورالۋى ءۇشىن قولايلى جاعداي جاساۋ مەن بەيبىتشىلىكتى نىعايتۋ جولدارى تالقىلاندى.

وپپوزيتسيا وزدەرىنىڭ ماقساتى قوعامداعى تاتۋلىق، ادىلدىك ۇستانىمدارىنىڭ جانە سيريانىڭ حالىقارالىق قاتىناستارىنىڭ نىعايۋى ەكەنىن مالىمدەدى. ولار ەلدەگى بيلىكتى قولعا العان سوڭ جاعدايدى تۇراقتاندىرۋعا بارىن سالىپ جاتقانىن ايتتى.

- ءبىزدىڭ قارۋلى كۇشتەر ەل استاناسىن تولىقتاي باقىلاۋعا الۋدى اياقتاپ قالدى. جاڭا ۇكىمەت ءالى جاساقتالعان جوق، ول قۇرىلعان سوڭ بىردەن جۇمىسقا كىرىسەدى، - دەپ مالىمدەدى دۇيسەنبى كۇنى اساد رەجيمىن قۇلاتقان ۇيىمنىڭ باسقارۋشى ورگانى - اسكەري وپەراتسيالار دەپارتامەنتى.

بۇعان دەيىن اسكەري وپەراتسيالار دەپارتامەنتى تۇرعىنداردىڭ ءومىرى مەن مۇلكىن قورعاۋ، مەملەكەتتىك مەنشىكتىڭ قاۋىپسىزدىگىن ساقتاۋ ءۇشىن ءبىرقاتار جاڭا شارالار قولعا الىنعانىن جاريالاعان. وعان ساي، قوعامدىق ءتارتىپتى بۇزعاندار مەن قىلمىس جاساعاندارعا قانداي جازا تاعايىندالاتىنى ايقىندالعان:

- ابايسىزدا وق اتقان ادام 1 جىل باس بوستاندىعىنان ايىرىلادى؛

- مەملەكەت مۇلكىن، كولىك قۇرالدارىن نەمەسە قۇرال-جابدىقتاردى ۇرلاعان ادام 4 جىل باس بوستاندىعىنان ايىرىلادى؛

- جەكە مەنشىككە قول سۇققان ادام 4 جىل باس بوستاندىعىنان ايىرىلادى؛

- مەملەكەتكە تيەسىلى قارۋدى جاڭا بيلىك ورگاندارىنا بەرمەي ساقتاعان ادام 4 جىل باس بوستاندىعىنان ايىرىلادى.

سيريا وپپوزيتسياسىنىڭ قاۋىپسىزدىك كۇشتەرى مەن پوليتسياسى قوعامدىق قاۋىپسىزدىك پەن مەملەكەتتىك ينستيتۋتتاردى كۇشەيتۋ ءۇشىن دۇيسەنبى كۇنى داماشىقتا جۇمىسىن ۇدەتە باستادى. سونىمەن قاتار قاۋىپسىزدىكتى قامتاماسىز ەتۋ ماقساتىندا داماشىقتا ساعات 16:00-دەن 05:00-گە دەيىن كومەندانتتىق ساعات ەنگىزىلدى.

AlArabiya-نىڭ حابارلاۋىنشا، سيريانىڭ ورتالىق بانكى جەرگىلىكتى بانكتەردەگى تۇرعىنداردىڭ جيناعىنا ەش قاۋىپ جوعىن مالىمدەگەن. سونداي-اق سەيسەنبىدە ەلدىڭ ورتالىق بانكى مەن ەكىنشى دەڭگەيلى بانكتەر جۇمىسىن جانداندىرماق.

دۇيسەنبى كۇنى سيريالىق كوتەرىلىسشىلەر اساد بيلىگى كەزىندە اسكەرگە الىنعان بارلىق اسكەري قىزمەتشىلەرگە راقىمشىلىق جاسايتىنىن مالىمدەدى.

- اسكەري وپەراتسيالار دەپارتامەنتى مىندەتتى قىزمەتكە شاقىرىلعان بارلىق ساربازدارعا جالپىلاي راقىمشىلىق جاريالايدى. ولاردىڭ ومىرىنە ەش ءقاۋىپ تونبەيتىنىنە كەپىلدىك بەرىلگەن، - دەلىنگەن حابارلامادا.

وپپوزيتسيا بەرگەن ۋادە

وپپوزيتسيانىڭ ساياسي ماسەلەلەر دەپارتامەنتى وكىلى ءال-جازيراعا بەرگەن سۇحباتىندا ءبىرقاتار مالىمدەمەلەر جاسادى. اتاپ ايتقاندا ەندىگى بيلىك سيريالىق بوسقىنداردى ەلگە قايتارۋ ءۇشىن جاعداي جاساۋعا جانە ولارعا قاۋىپسىز ورتانى قامتاماسىز ەتۋگە كۇش سالاتىنىن ايتتى. ول بوسىپ كەتۋگە ءماجبۇر بولعان سيريالىقتاردى قايتا ورالۋعا جانە ەلدى اياعىنان تۇرعىزۋعا ۇلەس قوسۋعا شاقىردى.

ەندىگى كەزەڭدە ەلدە ادىلدىك پەن تەڭدىككە نەگىزدەلگەن جالپىقوعامدىق تاتۋلىق پەن تۇسىنۋشىلىك ورناۋى ءتيىس. ساياسي ماسەلەلەر دەپارتامەنتى وكىلىنىڭ ايتۋىنشا، ولار ادامداردىڭ مۇددەسىن قورعايتىن ينستيتۋتتار مەن ادىلدىك پەن ءتارتىپتى قامتاماسىز ەتەتىن مەملەكەت قۇرۋ جولىندا جۇمىستاردى اتقارىپ جاتىر.

سونداي-اق ول سيريا ءوزارا قۇرمەت نەگىزىندە بارلىق ەلدەرمەن قارىم-قاتىناسىن نىعايتۋدى كوزدەپ وتىرعانىن ايتتى.

كوتەرىلىسشىلەر ەلدە ايەلدەرگە قانداي دا ءبىر درەسس-كود تەلىنبەيتىنىن، ءار ادامنىڭ جەكە ەركىندىگى قامتاماسىز ەتىلەتىنىن، جەكە تۇلعانىڭ قۇقىعىن قۇرمەتتەۋ وركەنيەتتى ەل قۇرۋدىڭ نەگىزى بولاتىنىن اتاپ وتكەن.

بۋفەرلىك ايماقتاعى يزرايل

وسى ورايدا يزرايلدىڭ سىرتقى ىستەر ءمينيسترى گيدەون ساار سيرياداعى وزدەرى «حيميالىق قويمالار مەن زىمىراندار ورنالاسقان» دەپ تانىعان نىسانداردى اتقىلاعاندارىن مالىمدەدى. ولار بۇل قادامعا قارۋلار ەكسترەميستىك ۇيىمداردىڭ قولىنا تۇسۋىنە جول بەرمەس ءۇشىن بارعان.

يزرايل قارۋلى كۇشتەرى سوڭعى ساعاتتاردا ااك سيرياداعى اسكەري نىساندارىنا 150 دەن استام اۋە شابۋىلىن جاساعانىن مالىمدەدى.

بۇعان دەيىن يزرايل سيريامەن شەكارادا ورنالاسقان گولان بيىگىندەگى بۋفەرلىك ايماققا اسكەرىن جىبەردى.

ودان سوڭ يزرايل اسكەرى گولان سىرتىنداعى سيريا اۋماعىنا كىردى.

ولاردىڭ پىكىرىنشە، سيريانىڭ بۇرىنعى پرەزيدەنتى باشار اساد ەلدەن كەتكەن سوڭ بۇل ايماقتا تۇراقسىزدىقتىڭ كۇشەيۋى مۇمكىن دەگەن قاۋىپكە بايلانىستى يزرايل اسكەرى گولاننىڭ سىرتىنا قايتا ورنالاستىرىلدى.

ەربول جانات

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى