سىرتقى ىستەر ءمينيسترى ب ۇ ۇ ادام قۇقىقتارى جونىندەگى كەڭەسىنە قاتىستى
جەنەۆا. KAZINFORM - قازاقستان رەسپۋبليكاسى پرەمەر-ءمينيسترىنىڭ ورىنباسارى-سىرتقى ىستەر ءمينيسترى مۇرات نۇرتىلەۋ باستاعان قازاقستاندىق دەلەگاتسيا ب ۇ ۇ ادام قۇقىقتارى جونىندەگى كەڭەسىنىڭ 55- سەسسياسىنىڭ جوعارى دەڭگەيدەگى سەگمەنتىنە جانە ب ۇ ۇ جاھاندىق الاڭىنىڭ باسقا دا ءىس-شارالارىنا قاتىسۋ ءۇشىن جەنيەۆاعا كەلدى.
وتىرىسقا 100 دەن استام مەملەكەتتەردىڭ جوعارى وكىلدەرى، ب ۇ ۇ باس حاتشىسى انتونيۋ گۋتەرريش جانە ادام قۇقىقتارى جونىندەگى جوعارعى كوميسسارى فولكەر تيۋرك قاتىستى.
ق ر س ءى م باسشىسى ءوز سوزىندە حالىقارالىق قوعامداستىققا قازاقستاننىڭ وسى باعىتتاعى ۇلتتىق قۇقىق قورعاۋ جۇيەسىن جەتىلدىرۋ سالاسىنداعى قول جەتكىزگەن ناتيجەلەرى جانە الداعى باسىمدىقتار تۋرالى حاباردار ەتتى. اسىرەسە ق ر پرەزيدەنتى قاسىم-جومارت توقايەۆتىڭ جۇرگىزىپ جاتقان رەفورمالارىنىڭ ءتورت پاكەتىن ىسكە اسىرۋ، كونستيتۋتسيالىق سوتتى قايتا قۇرۋ، سونداي-اق ادام قۇقىقتارى جونىندەگى ۋاكىلى ينستيتۋتىن كۇشەيتۋدىڭ ناتيجەلەرى اتالىپ ءوتتى.
وسى ورايدا م. نۇرتىلەۋ حالىقارالىق قوعامداستىققا: «قازاقستانداعى دەموكراتيالىق وزگەرىستەر قايتىمسىز» دەگەن باس مەسسەدجىن جاريالادى.
قازاقستان سىرتقى ساياسي ۆەدومستۆوسىنىڭ باسشىسى گەوساياسي تەكە-تىرەستەر مەن وڭىرلىك قاقتىعىستاردىڭ، سونداي-اق الەمدە ءوسىپ كەلە جاتقان ەكونوميكالىق بەلگىسىزدىكتىڭ كۇشەيۋىنە الاڭداۋشىلىق ءبىلدىردى. ول ەشبىر ەلدىڭ مۇنداي داعدارىستاردى جالعىز ءوزى جەڭە المايتىنىن تىلگە تيەك ەتىپ، وسى باعىتتا كوپجاقتى سەرىكتەستىكتى نىعايتۋعا شاقىردى.
مينيستر قازاقستان ۇلتتار اراسىنداعى ديالوگ پەن ءوزارا تۇسىنىستىككە، سونداي-اق جاھاندىق قۇقىق قورعاۋ جۇيەسىن نىعايتۋعا ءوز ۇلەسىن قوسۋدى جالعاستىراتىنىن اتاپ ءوتتى.
م. نۇرتىلەۋ حالىقارالىق قوعامداستىقتى قارۋسىزدانۋ، سيفرلاندىرۋ جانە گەندەرلىك تەڭدىك ماسەلەلەرىندە ادام قۇقىقتارىن بەيبىتشىلىك قۇرۋ جونىندەگى كۇش-جىگەردىڭ نەگىزىنە قويۋعا شاقىردى.
انىقتاما: بىرىككەن ۇلتتار ۇيىمىنىڭ ادام قۇقىقتارى جونىندەگى كەڭەسى (ب ۇ ۇ ا ق ج ك - UNHRC) باس اسسامبلەيانىڭ 2006-جىلعى 15-ناۋرىزداعى 60/251 قارارىنا سايكەس قۇرىلدى جانە بۇكىل الەم بويىنشا ادام قۇقىقتارىن جالپىعا بىردەي قۇرمەتتەۋگە جانە قورعاۋعا، ادام قۇقىقتارىنىڭ بۇزىلۋىنا بايلانىستى جاعدايلاردى قاراۋعا، سونداي-اق ءتيىستى ۇسىنىستار دايىنداۋعا جاۋاپتى ب ۇ ۇ جۇيەسىنىڭ ۇكىمەتارالىق ورگانى. ب ۇ ۇ ا ق ج ك ونىڭ الدىندا جۇمىس ىستەگەن ب ۇ ۇ- نىڭ ادام قۇقىقتارى جونىندەگى كوميسسياسىنىڭ ورنىنا قۇرىلدى. كەڭەس قۇرامىنا 47 مۇشە مەملەكەت كىرەدى، ولار تىكەلەي جاسىرىن داۋىس بەرۋ ارقىلى كوپشىلىك داۋىسپەن ءۇش جىلعا سايلانادى.
اۆتور
باقىتگۇل اباي قىزى
