سىرتقى سەكتور مەن ىشكى ەكونوميكادا ينفلياتسيا تاۋەكەلدەرى ساقتالىپ وتىر - ۇلتتىق بانك

- ەلىمىزدىڭ ەكونوميكاسى ءۇشىن ماڭىزدى سانالاتىن مۇناي نارىعىنىڭ دامۋ بارىسىندا وزگەرىس بايقالدى. مۇنايدىڭ قازىرگى جانە بولجامدى الەمدىك باعاسى تومەندەپ كەلەدى. الەمدىك ەكونوميكانىڭ ءوسىمى حالىقارالىق ۆاليۋتا قورىنىڭ قازان ايىنداعى بولجامىنا سايكەس، 2024 جانە 2025 -جىلدارى 3,2 پايىزدى قۇرايدى. ەلىمىزدە ەكونوميكانىڭ ءوسىمى وڭ ديناميكانى ساقتاپ وتىر. بيىلعى 9 ايدا جالپى ىشكى ءونىم 4,1 پايىزدى قۇرادى. ءوسىم بارلىق سەكتوردا بايقالدى، - دەدى ت. سۇلەيمەنوۆ.

ونىڭ ايتۋىنشا، قاراشا ايىنىڭ قورىتىندىسى بويىنشا جىلدىق ينفلياتسيا ءبىرشاما تومەندەپ، %8,4 دەڭگەيىندە قالىپتاستى. الايدا، بۇل كورسەتكىش ءالى دە ۇلتتىق بانكتىڭ 5 پايىزدىق تارگەتىنەن الىس. قاراشانىڭ قورىتىندىسى بويىنشا اقىلى قىزمەتتەر باعاسى 13,3 پايىزعا ءوسىپ، ينفلياتسياعا ەداۋىر ۇلەس قوستى. بۇل «تاريفتى ينۆەستيتسياعا ايىرباستاۋ» باعدارلاماسىنا جانە ءبىرقاتار نارىقتىق قىزمەتتەردىڭ قىمباتتاۋىنا بايلانىستى. يمپورتتىق باعانىڭ ءوسۋى سالدارىنان ازىق- تۇلىككە جاتپايتىن تاۋارلار باعاسى 8 پايىزعا دەيىن جەدەلدەدى.

- بۇل رەتتە، ازىق-تۇلىك تاۋارلارىنىڭ دەزينفلياتسياسى جالپى ينفلياتسيانى ءبىرشاما باياۋلاتۋعا وڭ ىقپال ەتتى. الايدا، قاراشادا ونىڭ 5,4 پايىزعا جەدەلدەگەنى تىركەلدى. جالپى العاندا، ۇلتتىق بانكتىڭ ۇستامدى قاتاڭ اقشا- كرەديت ساياساتى مەن ۇكىمەتتىڭ ينفلياتسياعا قارسى شارالارىنىڭ ناتيجەسىندە باعا ديناميكاسى ءبىزدىڭ بولجامىمىزعا سايكەس قالىپتاسىپ كەلەدى. وسى جىلدىڭ قورىتىندىسى بويىنشا ينفلياتسيا %8-9 ارالىعىندا قالىپتاسادى دەپ ەسكەرىلگەن. سونىمەن بىرگە، سىرتقى سەكتوردا دا، ىشكى ەكونوميكادا دا ينفلياتسيا تاۋەكەلدەرى بار ەكەنىن اتاپ وتەمىن، - دەدى ۇب باسشىسى.

بيۋدجەت ءالى دە ۇلتتىق قوردىڭ ترانسفەرتتەرىنە سۇيەنىپ وتىر. سونىڭ سالدارىنان مۇنايدان تىس تاپشىلىق جوعارى كۇيىندە قالدى.

- بيىل ۇلتتىق قوردان تىكەلەي ترانسفەرتتەر كولەمى 5,6 تريلليون تەڭگەنى قۇرادى، ال قوردان الىنعان بارلىق قاراجات 6 تريلليون تەڭگەدەن اسادى. بۇل رەتتە ۇلتتىق قور قاراجاتىن جۇمساۋ كولەمى دە، باعىتتارى دا ماڭىزدى. ۇلتتىق قوردان بولىنەتىن قاراجات قازاقستاندىق تاۋارلاردىڭ كولەمىن ارتتىرۋعا، ناقتى جوبالاردى قارجىلاندىرۋعا باعىتتالۋى كەرەك. سونداي- اق، بۇل شىعىستاردىڭ ساپاسى، تيىمدىلىگى مەن ونىمدىلىگى وتە ماڭىزدى. وسى ماسەلەلەر جۇرگىزىپ جاتقان ساياساتىمىزدىڭ ماڭىزدى فاكتورلارى سانالادى. بارىمىزگە ءمالىم، جاقىندا ا ق ش دوللارىنا قارسى تەڭگە السىرەدى. بۇل قوسىمشا ينفلياتسيالىق فاكتور رەتىندە سانالادى جانە ول ينفلياتسيالىق كورسەتكىشتەرگە اسەر ەتەدى... اتاپ ايتقاندا، ينفلياتسيامەن كۇرەسۋ جانە ونى تۇراقتاندىرۋ - ءبىزدىڭ ەكونوميكالىق ساياساتىمىزداعى باسىمدىق بولىپ قالا بەرەدى. مەملەكەت باسشىسىنىڭ تاپسىرماسىنا سايكەس، ۇكىمەتپەن بىرگە ورتاق ساياساتىمىزدى ۇيلەستىرۋ باعىتىنداعى جۇمىسىمىزدى جالعاستىرا بەرەمىز. ۇلتتىق بانك ينفلياتسيانىڭ 5 پايىزدىق تارگەتىنە جەتۋ جولىندا نەگىزدەلگەن جانە تەڭدەستىرىلگەن شەشىمدەر قابىلدايتىن بولادى. بۇل ازاماتتاردىڭ ءال- اۋقاتىن ارتتىرۋعا جانە ەكونوميكامىزدىڭ تۇراقتى وسۋىنە جاعداي جاسايدى، - دەدى تيمۋر سۇلەيمەنوۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى