ەسىرتكى تاراتقانى ءۇشىن سوتتالعاندار شارتتى تۇردە بوستاندىققا شىعۋى مۇمكىن
استانا. KAZINFORM - ەسىرتكى كومىپ تاراتقانى ءۇشىن سوتتالعان 1200 ادامنىڭ جازاسى قايتا قارالادى. بۇل تۋرالى ىشكى ىستەر ءمينيسترىنىڭ ورىنباسارى سانجار ماديەۆ سەنات وتىرىسىنان كەيىن وتكەن باسپا ءسوز ءماسليحاتىندا ايتتى.
- قازىرگى تاڭدا «ەسىرتكى كومگەنى» ءۇشىن سوتتالعانداردىڭ ءبىر بولىگىنە تاعايىندالعان جازا قايتا قارالۋى مۇمكىن. ناقتى ايتقاندا 1000 نان استام تۇلعا مەرزىمىنەن بۇرىن شارتتى تۇردە بوستاندىققا شىعادى.
ولاردىڭ قۇقىقتارى جازانى وتەۋ مەكەمەلەرى ارقىلى ۇسىنىمحات راسىمدەۋ ارقىلى نەمەسە ادۆوكات ارقىلى قورعالادى. ءار جاعدايدى سوت جەكە قارادى. وسىلايشا سوتتالعاندار جازانى جەڭىلدەتۋ قۇقىعىنا يە بولادى، - دەدى ۆيتسە-مينيستر.
ونىڭ سوزىنشە، 4 مىڭعا جۋىق ادام ەسىرتكى قىلمىسىن جاساعانى ءۇشىن سوتتالعان.
- ولاردىڭ اراسىندا شامامەن 1220 ادام ەسىرتكى كومگەنى ءۇشىن جازا ارقالاعان. بۇل كوبىنەسە كۋرەرلەر مەن ەسىرتكى كومۋشىلەر. ءبىر سوزبەن ايتقاندا ەسىرتكى ساۋداسىنا قاتىسقاندار، - دەدى سانجار ماديەۆ.
