ەسىرتكى قىلمىسى ءۇشىن 28 پاۆلودارلىق ۇزاق جىلعا سوتتالدى
پاۆلودار. KAZINFORM - جىل باسىنان پوليتسەيلەر ەسىرتكى زاتتارىنا قاتىستى 144 زاڭ بۇزۋشىلىقتىڭ جولىن كەسكەن. زاڭسىز اينالىمنان 121 كيلوگرامنان اساتىن ەسىرتكى الىندى.
ەرتىس-بايان وڭىرىندە جىل باسىنان ەسىرتكى قىلمىسىنا جول بەرگەن 28 ازامات ۇستالىپ، سوت شەشىمىنەن ۇزاق جىلعا سوتتالدى.
- زاڭسىز اينالىمنان 121 كيلوگرامنان استام ءتۇرلى تىيىم سالىنعان زاتتار، ونىڭ ىشىندە 9 كيلوگرامنان استام «گاشيش»، 102 كيلوگرام ماريحۋانا جانە 9,7 كيلوگرام سينتەتيكالىق ەسىرتكى تاركىلەندى. سونىمەن قاتار ەسىرتكىنى زاڭسىز ساقتاۋدىڭ 82 فاكتىسى انىقتالدى. مىسال ءۇشىن سينتەتيكادان شىققان پسيحواكتيۆتى زاتتاردىڭ تارالۋىنا ماماندانعان ۇيىمداسقان 2 قىلمىستىق توپتىڭ جول كەسىلدى. جەدەل ءىس-شارالار بارىسىندا الدىن الا ءسوز بايلاسۋ بويىنشا ارەكەت ەتكەن 5 ازامات ۇستالدى. ولار ءوڭىر اۋماعىندا قاپتاماشىلار ارقىلى ەسىرتكى زاتتارىن تاراتۋ ماقساتىندا تەلەگرامم مەسسەندجەرىندە ينتەرنەت دۇكەن قۇرعان، - دەپ حابارلادى پاۆلودار وبلىسى پوليتسيا دەپارتامەنتىنىڭ ناشاقورلىق قىلمىستارىنا قارسى ءىس-قيمىل جونىندەگى باسقارماسىنىڭ باستىعى تيمۋر قارجاۋبايەۆ.
ءتارتىپ ساقشىلارى جىل باسىنان ەسىرتكىگە قاتىستى 144 زاڭ بۇزۋشىلىقتىڭ جولىن كەسكەن. «كيبەرباقىلاۋ» جۇيەسى ارقىلى 75 زاڭسىز كونتەنتكە قول جەتكىزۋ شەكتەلدى.
«OLX» حابارلاندىرۋ سايتىنىڭ قازاقستاندىق پروۆايدەرىمەن بىرلەسىپ 115-تەن استام جاريالانىم جويىلدى. ولاردىڭ ءارقايسىسىنىڭ اۋديتورياسى بىرنەشە مىڭنان ميلليونعا دەيىن جەتەدى. مۇنداي اقپاراتتىق ونىمدەردىڭ ەڭ قورعالماعان ساناتتارى مەن نەگىزگى تۇتىنۋشىلارى - بالالار مەن جاسوسپىرىمدەر. ولار اگرەسسيۆتى ۇگىت-ناسيحات اسەرىنە وڭاي تۇسەدى»، - دەيدى تيمۋر قارجاۋبايەۆ.
مامانداردىڭ سوزىنشە، ەسىرتكى قىلمىسىنا قاتىسقان ازاماتتار كەمى 10 جىلعا سوتتالادى.
بۇعان دەيىن پاۆلوداردا ەر ادامنان 8,5 كيلوگرام ەسىرتكى تابىلعانى تۋرالى جازعانبىز.
