سينگاپۋرلىق باسىلىم: DeepSeek-تى پايدالانۋعا تىيىم سالعانداردىڭ قاتارى ءوسىپ كەلەدى
استانا. KAZINFORM - جاپونيانىڭ Toyota ،Mitsubishi جانە SoftBank باستاعان كومپانيالارى مەن وڭتۇستىك كورەيانىڭ سەۋل ۇلتتىق ۋنيۆەرسيتەتى قىتايلىق گەنەراتيۆتى جاساندى ينتەللەكت ءونىمى - DeepSeek-تى پايدالانۋعا تيىم سالدى. بۇل تۋرالى سينگاپۋرلىق «Lianhe Zaobao» باسىلىمى حابارلادى.
باسىلىمنىڭ جازۋىنشا، ءتيىستى اقپاراتتار مەن دەرەكتەردىڭ قىتاي ۇكىمەتىنە قولدى بولۋ قاۋپىنە بايلانىستى DeepSeek-تى پايدالانۋعا تىيىم سالعان جاپونيالىق كومپانيالاردىڭ سانى كوبەيىپ كەلەدى.
- اقپاراتتىق قاۋىپسىزدىك تۇرعىسىنان الاڭداۋشىلىق تۋدىرعاندىقتان (قىزمەتكەرلەرىمىزدىڭ) پايدالانۋىنا تىيىم سالدىق، - دەپ ءتۇسىندىردى Toyota وكىلى.
ال Mitsubishi كومپانياسى قىزمەتكەرلەر تاراپىنان جۇمىستا DeepSeek-تى پايدالانۋ تۋرالى ءوتىنىش تۇسكەنىن، ءبىراق قازىرشە وعان رۇقسات ەتپەيتىنىن مالىمدەدى.
SoftBank تە كومپانيا ىشىندە DeepSeek-كە شەكتەۋ قويىپ، ونى وپەراتورلىق تەرمينالدارعا جۇكتەۋگە تىيىم سالدى.
سونداي-اق سەۋل ۇلتتىق ۋنيۆەرسيتەتى دە DeepSeek-تى بۇعاتتاۋ تۋرالى شەشىم شىعاردى. شەشىمگە سايكەس، ۋنيۆەرسيتەتتىڭ اقپاراتتاندىرۋ باسقارماسى بەيسەنبى كۇنى (13-اقپان) تاڭعى ساعات 9 دان باستاپ كامپۋس اۋماعىندا سىمدى جەلى ارقىلى DeepSeek پلاتفورماسىنا قوسىلۋعا تىيىم سالدى.
باسقارمانىڭ مالىمەتىنشە، جەكە دەرەكتەردى قورعاۋ سەكىلدى قاۋىپسىزدىك شارالارىنىڭ سەنىمدىلىگى راستالعانعا دەيىن DeepSeek-تى پايدالانۋعا ۋاقىتشا شەكتەۋ قويىلادى. ەگەر اكادەميالىق زەرتتەۋ نەمەسە ءبىلىم بەرۋ ماقساتىندا وسى پلاتفورمانى پايدالانۋعا قاجەتتىلىك تۋىنداسا، الدىن الا رۇقسات الۋ قاجەت.
باسىلىمنىڭ اتاپ كورسەتۋىنشە، DeepSeek نارىققا ەنگەلى ءبىرقاتار ەل مەن ايماقتا ونى پايدالانۋعا شەكتەۋ قوياتىن شارالار قابىلداندى. يتاليا بيلىگى 30 قاڭتاردا جەكە دەرەكتەردىڭ قاۋىپسىزدىگىنە بايلانىستى DeepSeek-تى بۇعاتتاپ تاستادى. تايۆاننىڭ «سيفرلىق دامۋ مينيسترلىگى» 31-قاڭتاردان باستاپ مەملەكەتتىك ورگاندار مەن ماڭىزدى ينفراقۇرىلىمداردا DeepSeek-تى پايدالانۋعا تىيىم سالىنعانىن مالىمدەدى.
اۋستراليا 4-اقپان كۇنى ۇلتتىق قاۋىپسىزدىككە بايلانىستى ۇكىمەتتىك قۇرىلعىلاردا DeepSeek قىزمەتىن پايدالانۋعا تىيىم سالدى. وڭتۇستىك كورەيانىڭ ءبىرقاتار مەملەكەتتىك ورگانى 5-اقپاننان كەيىن DeepSeek-تى بۇعاتتاي باستادى.
ەسكە سالا كەتەيىك، بۇعان دەيىن قاڭتار ايىندا جارىققا شىققان قىتايلىق DeepSeek ستارتاپىنىڭ جاڭا ازىرلەمەسى ج ي نارىعىن ءدۇر سىلكىندىرگەنىن جازعان ەدىك. قوسىمشا ىسكە قوسىلىسىمەن ساناۋلى ساعاتتاردا App Store-داعى ەڭ كوپ جۇكتەلگەن تەگىن باعدارلامالاردىڭ توپ-5 تىزىمىنە ەنگەن.
اۆتور
ەرلان مازان
