ەسىلدەن ارتىلعان سۋدى ارالعا بۇراتىن ارنا سالۋ ءۇشىن 324 ميلليارد تەڭگە كەرەك
استانا. KAZINFORM - تاسقىن كەزدەرىندە ەسىل وزەنىنىڭ باسسەينىنەن ارتىلعان سۋدى تورعاي وزەنى ارقىلى ارالعا باعىتتاۋ ءۇشىن جالپى ۇزىندىعى 277 شاقىرىم بولاتىن ءۇش كانال سالىنۋى مۇمكىن.
قازىر ارنايى كونسۋلتاتيۆتىك ورگان وسى جوبانىڭ قانشالىقتى ءتيىمدى بولاتىنىن زەرتتەپ جاتىر.
بۇل تۋرالى پرەمەر-ءمينيستردىڭ ورىنباسارى قانات بوزىمبايەۆتىڭ ءماجىلىس دەپۋتاتىنىڭ ساۋالىنا جولداعان جاۋابىندا ايتىلعان.
- «كاسپي-ارال باسسەينىنىڭ ەكوجۇيەسىن قالپىنا كەلتىرۋ جانە سۋ تاسقىنىن باسقارۋ جونىندەگى حالىقارالىق قورى» كورپوراتيۆتىك قورىنىڭ تاپسىرىسى بويىنشا «ەسىل وزەنىنىڭ ورتا اعىسىنداعى سۋ تاسقىنىن باسقارۋ جانە اعىننىڭ ءبىر بولىگىن تورعاي وزەنى مەن ارال تەڭىزى باسسەينىنە بۇرۋ» جوباسىنىڭ تەحنيكالىق-ەكونوميكالىق نەگىزدەمەسى ازىرلەندى. جوباعا كىرەتىن قۇرىلىس-مونتاج جۇمىستارىنىڭ جالپى قۇنى 324,4 ميلليارد تەڭگە بولادى، - دەپ جازادى قانات بوزىمبايەۆ.
جوبا اياسىندا 3 ۋچاسكەدەن تۇراتىن كانالدىڭ قۇرىلىسى قاراستىرىلعان:
«ەسىل-تورعاي» - ۇزىندىعى 42 ك م؛
«قاراقول-سارىوزەن» - ۇزىندىعى 52 ك م؛
«شالقارتەڭىز-ارال» - ۇزىندىعى 183 ك م.
- اتالعان جوبانى ىسكە اسىرۋ ايتارلىقتاي قارجىلىق شىعىنداردى قاجەت ەتەتىنىن اتاپ وتكەن ءجون. جوبا ەسىل وزەنى باسسەينىندەگى تاسقىن سۋلاردى تورعاي وزەنى باسسەينىنە بۇرۋدى قاراستىرادى. بۇل شالقار- تەڭىز كولىنىڭ گيدرولوگيالىق رەجيمىن قالپىنا كەلتىرۋگە مۇمكىندىك بەرەدى. قازىرگى تاڭدا سۋ رەسۋرستارى جانە يرريگاتسيا مينيسترلىگى سۋدى باسسەيندەر اراسىندا قايتا ءبولۋ ماسەلەلەرىن كەشەندى زەرتتەپ جاتىر. جوبا ماتەريالدارى مينيسترلىك جانىنداعى عىلىمي- تەحنيكالىق كەڭەستىڭ قاراۋىنا ۇسىنىلادى. عىلىمي- تەحنيكالىق كەڭەستىڭ ۇسىنىستارى مەن قورىتىندىلارى نەگىزىندە ۇكىمەت جوبانى ءارى قاراي ىسكە اسىرۋدىڭ ورىندىلىعى تۋرالى شەشىم قابىلدايدى، - دەلىنگەن جاۋاپتا.
بۇگىن 2024 -جىلدىڭ قازانىنان وسى جىلدىڭ قاڭتارىنا دەيىن سولتۇستىك ارال تەڭىزىنە 1 ميلليارد تەكشە مەتر سۋ جىبەرىلگەنى بەلگىلى بولعان ەدى.
