سۇيەك ءمۇجىپ، قۇرت جەيتىن بالانىڭ تاڭدايى تاقىلداپ تۇرادى - ەتنوپەدوگوگ

- ۇلتتىق استىڭ بالاعا اسەرى وتە زور. نەگە باستى نازاردى قۇرت پەن سۇيەككە قويىپ وتىرمىز؟ قازىرگى بالالاردىڭ كوبىندە تىستەرىنىڭ قاپ-قارا بولىپ، ۇگىتىلىپ كەتۋى ءجيى كەزدەسەدى. ال ءتىسى دۇرىس شىقپاعان بالا دۇرىس سويلەي دە المايدى. سول ءۇشىن ءبىزدىڭ اتا-بابالارىمىز بالاعا قاتتى قۇرت بەرىپ، سۇيەك ءمۇجىتىپ، ولاردىڭ ءتىلىنىڭ ۋاقتىلى شىعۋىنا كومەكتەسكەن، - دەدى ەتنوپەدوگوگ Jibek Joly ارناسىنىڭ «بۇگىن LIVE» باعدارلاماسىندا بەرگەن سۇحباتىندا.

قۇندىز ءوزى دە ۇشەمدى تاربيەلەپ وتىر. ۇشەۋى دە 1,5 جاسىنان باستاپ تاقپاقتاردى جاتقا ايتادى. ودان كەيىن دە ءارتۇرلى جاتتاۋلاردى وپ-وڭاي جاتتاي باستاپتى. ءتىپتى ابايدىڭ قارا سوزدەرىن دە بىلەدى ەكەن.

- بالانىڭ جاتتاۋ قابىلەتىنىڭ، زەيىنىنىڭ ءوسۋى تىكەلەي اسقا بايلانىستى. بالاعا ولەڭدەردى وڭاي جاتتاتۋ ءۇشىن ەڭ اۋەلى ونىڭ زەيىنى اشىق بولۋ كەرەك. قازىرگى كوپ بالالاردىڭ زەيىنى جابىلىپ قالعان. ۇلتتىق اس سول زەيىندى اشۋعا كومەكتەسەدى. سونىمەن بىرگە انا جۇكتى كەزدەن ءوزىن ەرەكشە كۇتۋ كەرەك. ءوزى دە دۇرىس اس ءىشىپ، دۇرىس كۇتىنگەن انادان ساۋ بالا دۇنيەگە كەلەدى، - دەيدى ۇشەمنىڭ اناسى.

ەتنوپەدوگوگ بالالارىنىڭ بولمەسىن قازاقي ناقىشتا بەزەندىرىپ قويىپتى. ونىڭ ايتۋىنشا بۇل ءادىس بۇلدىرشىندەردىڭ قيالىن دامىتۋعا كومەكتەسەدى.

- قازىرگى زاماندا ەكى ءسوزدىڭ باسىن قۇراپ ايتا المايتىن بالالار ءوسىپ كەلە جاتىر. ونىڭ سەبەبى، بالالاردىڭ قيالى دامىماۋىنان، - دەدى ول.

وسى رەتتە ماعجان جۇمابايەۆتىڭ «بالانىڭ قيالى دامۋ ءۇشىن بولمەسى ەرەكشە ارلەنگەن، ونىڭ قيالىنا شابىت بەرەتىندەي بولۋ كەرەك» دەگەن ويىن تىلگە تيەك ەتتى. ۇشەمنىڭ اناسى بالالارىنىڭ قيالىن دامىتۋ ءۇشىن اعارتۋشىنىڭ «پەدوگوگيكا» ەڭبەگىندە جازىلعان «بالانىڭ تىڭداۋ سەزىمىن تاربيەلەۋ» ءتاسىلىن قولدانادى.

- بالا قيالىنىڭ جاقسى دامۋى ءۇشىن تىڭداۋ زەيىنىن دە تاربيەلەۋ كەرەك. ال ءبىز بۇلدىرشىندەردى تەك كورسەتۋ ارقىلى تاربيەلەپ جاتىرمىز. بالا ەرتەگىلەردى، ولەڭ-جىرلاردى ەستىپ ءوسۋ كەرەك. ءبىز دە كىشكەنتاي كەزىمىزدە اجەلەرىمىز ايتقان نەبىر جىر، ەرتەگىلەردى تىڭداپ وستىك قوي. كوزىمىزگە ەلەستەتىپ، ويلاپ جاتاتىن ەدىك. ال ءقازىر بالالاردىڭ قولىنا تەلەفون بەرىپ قويعاننان كەيىن ولاي ەلەستەتۋگە مۇمكىندىك بەرمەيمىز. سالدارىنان بالانىڭ زەيىنى جابىلىپ قالادى. ال ونى اشۋ ءۇشىن بالاعا ەرتەگى تىڭداتۋ كەرەك، - دەيدى قۇندىز ورالجانوۆا.

بالالاردى تاربيەلەۋدە ۇلتتىق قۇندىلىقتاردى باستى نازارعا الاتىن ۇستاز تۇرمىس قۇرۋعا نيەتتەنىپ جۇرگەن ارۋلارعا كەڭەسىن ايتتى.

- دەكرەت - دەپرەسسيا ەمەس. جالپى، بۇل ۇعىم نەدەن پايدا بولادى؟ سەبەبى، انا ءوزىنىڭ ۇيدەگى قىزمەتىنىڭ قانداي ەكەنىن بىلمەيدى. ادەتتە اكەلەر سىرتتا بالانىڭ تانىنە ازىق بولاتىن دۇنيەلەردى اكەلىپ، اقشا تاۋىپ جۇرەتىن بولسا، اناسى بالانىڭ جانىن تىكەلەي تاربيەلەۋشى. ال بالانىڭ جانىن تاربيەلەۋدى قۇرساقتاعى ساتتەن باستاۋ كەرەك. جالپى، ءاربىر قىز بالاسى تۇرمىسقا شىققاننان كەيىن دۇنيەگە بالا اكەلەتىنىن ءتۇسىنۋ كەرەك. دۇنيەگە قانداي بالا اكەلەمىن دەپ تۇرمىس قۇرماي تۇرىپ ويلانۋى قاجەت. وتباسىن قۇرماي تۇرىپ دۇنيەگە ابايداي، شاكارىمدەي مىقتى ازاماتتاردى اكەلۋدى جوسپارلاعانى جاقسى، - دەيدى ەتنوپەدوگوگ.

ەرەسەكتەردىڭ بالاعا كىتاپ وقىپ بەرۋى نەسىمەن پايدالى؟ وسى جانە وزگە دە ساۋالداردىڭ جاۋابىن مامانداردان سۇراعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى