پسيحيكالىق ناۋقاستاردىڭ كوكتەمگى اۋىتقۋى - ميف الدە شىندىق
استانا. KAZINFORM - دەنساۋلىق ساقتاۋ مينيسترلىگى پسيحيكالىق اۋىتقۋى بار جانداردىڭ كوكتەمدە مىنەز-قۇلقى مەن ءىس-ارەكەتىنىڭ وزگەرۋىنىڭ سەبەبى مەن سالدارىنا قاتىستى تۇسىنكتەمە بەردى.
«عىلىمي زەرتتەۋلەر پسيحيكالىق اۋىتقۋلارى بار كەيبىر ادامداردا كوكتەمدە سيمپتومداردىڭ جوعارىلاۋى مۇمكىن ەكەنىن راستايدى. دەگەنمەن بۇل قۇبىلىستىڭ ناقتى مەحانيزمدەرى ءالى تولىق زەرتتەلمەگەن. پسيحيكالىق اۋرۋى بار ادامداردىڭ كوكتەم مەزگىلىندە اۋىتقۋىنا بايلانىستى بىرنەشە عىلىمي فاكتور بار. كوكتەمدە كۇندىزگى جارىقتىڭ ۇزاقتىعى ارتادى، بۇل اعزانىڭ بيوريتمىنە اسەر ەتۋى مۇمكىن. پسيحيكالىق اۋىتقۋلارى بار ادامداردا بۇل گورمونداردىڭ تەڭگەرىمسىزدىگىنە اكەلۋى مۇمكىن، سونىڭ ىشىندە ۇيقى جانە تىڭ ءجۇرۋ، سونداي-اق كوڭىل-كۇيدى رەتتەيتىن مەلاتونين دەڭگەيىنىڭ تومەندەۋىنە اكەلىپ سوعادى»، - دەپ جاۋاپ بەردى مينيسترلىك Kazinform اگەنتتىگىنىڭ رەسمي ساۋالىنا.
سونىمەن قاتار، ۆەدومستۆو ماۋسىمدىق وزگەرىستەرگە دە توقتالعان. قىستان كوكتەمگى ماۋسىمعا اۋىسۋ اۋا-رايى مەن تەمپەراتۋرانىڭ وزگەرۋىمەن قاتار جۇرەدى، بۇل ادامنىڭ پسيحيكالىق جاعدايىنا اسەر ەتۋى مۇمكىن. مىسالى، كەيبىر ادامداردا اتموسفەرالىق قىسىمنىڭ وزگەرۋى باس اۋرۋىن تۋدىرادى، سالدارىنان پسيحيكالىق بۇزىلۋ بەلگىلەرى كۇشەيە تۇسەدى.
ودان بولەك، پسيحيكالىق اۋىتقۋعا كۇيزەلىستىڭ دە اسەرى بار ەكەن. كوكتەمدە ادامنىڭ ءومىر سالتى وزگەرۋى مۇمكىن، بۇعان جۇمىس نەمەسە الەۋمەتتىك ورتاداعى وزگەرىستەر جاتادى. كەيبىر وزگەرىستەر كۇيزەلىستى تۋدىرىپ، پسيحيكالىق بۇزىلۋعا الىپ كەلەدى.
«بيولوگيالىق فاكتورلارعا كەلسەك، كەيبىر زەرتتەۋلەردە يممۋندىق جۇيەنىڭ وزگەرۋى نەمەسە قابىنۋ سياقتى جايتتار ايتىلادى. ولار پسيحيكالىق اۋىتقۋلارى بار كەيبىر ادامداردا كوكتەمدە ءورشۋى مۇمكىن. بيولوگيالىق فاكتورلار ءوزارا ارەكەتتەسىپ، ادامنىڭ پسيحيكالىق جاعدايىنا اسەر ەتۋى مۇمكىن، ءبىراق ول ءار ادامدا ءارقالاي»، - دەپ تولىقتىردى مينيسترلىكتەن.
