سوتتالعاندار كىتاپ وقىسا جازا مەرزىمى قىسقارادى - وزبەكستان زاڭ جوباسىن ماقۇلدادى
تاشكەنت. KAZINFORM - وزبەكستان پارلامەنتىنىڭ تومەنگى پالاتاسى كىتاپ وقىعانى ءۇشىن سوتتالعانداردىڭ جازا مەرزىمىن قىسقارتۋدى كوزدەيتىن زاڭ جوباسىن ماقۇلدادى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ىشكى ىستەر ءمينيسترىنىڭ ورىنباسارى رامازون اشراپوۆ تۇسىندىرگەندەي، زاڭ جوباسى اياسىندا قىلمىستىق كودەكس جاڭا باپپەن تولىعادى. اتاپ ايتقاندا، 1 كىتاپتى وقىپ، سول ەڭبەك بويىنشا ەمتيحاندى ءساتتى تاپسىرعان ازاماتتاردىڭ جازا مەرزىمىن 3 كۇنگە قىسقارتۋ جوسپارلانعان.
توقتالا كەتەيىك، اتالعان زاڭ جوباسىن ۇسىنعان «ميللي تيكلانيش» («ۇلتتىق جاڭعىرۋ») پارتياسىنىڭ اقپاراتىنا ساي، ادەبيەتتەر ءتىزىمىن رەسپۋبليكالىق رۋحانيات جانە اعارتۋ ورتالىعى بەكىتەدى.
بۇل رەتتە شەكتەۋ دە بار، ياعني سوتتالعاندار جىلىنا 10 كىتاپتان كوپ شىعارما وقىپ، ەمتيحان تاپسىرا المايدى. ساراپشىلاردىڭ پايىمىنشا، اتالعان باستاما تەمىر تورعا تۇسكەندەردى ءتيىمدى وڭالتۋعا ىقپال ەتەدى.
ەندى اتالعان زاڭ جوباسى سەناتتىڭ قاراۋىنا ەنگىزىلەدى. ءتيىستى تالقىلاۋدان سۇرىپتالىپ شىققان نۇسقا كەيىن قول قويۋ ءۇشىن وزبەكستان پرەزيدەنتىنە جولدانادى.
ەسكە سالايىق، وزبەكستان ۇكىمەتى ءۇي قاماقتاعى جانە باس بوستاندىعى شەكتەلگەن ازاماتتاردى باقىلاۋعا ارنالعان ەلەكتروندى بىلەزىكتەر ءوندىرىسىن جولعا قويۋعا نيەتتى.
