سوت وتىرىسى كەزىندە جالعان اقپارات بەرسە كۋاگەرگە قانداي شارا قولدانىلادى؟
استانا. KAZINFORM - سوت وتىرىسى كەزىندە كۋاگەر جالعان اقپارات بەرسە، وعان قانداي شارا قولدانىلادى؟ بۇل سۇراققا زاڭگەر دۋمان كوپبايەۆ جاۋاپ بەردى.
زاڭگەردىڭ ايتۋىنشا، كۋاگەر ازاماتتىق سوتتا بولسىن، اكىمشىلىك سوتتا بولسىن نەمەسە قىلمىستىق سوتتا بولسا دا، ول جالعان اقپارات بەرگەنى ءۇشىن قىلمىستىق جاۋاپكەرشىلىككە تارتىلادى.
ق ر قىلمىستىق كودەكسىنىڭ 420-بابىنا سايكەس، كۋاگەر، ساراپشى نەمەسە مامان جالعان اقپارات بەرسە، جالعان ايعاقتار مەن قورىتىندىلار ۇسىنسا، مىناداي جاۋاپكەرشىلىكتەر قاراستىرىلعان:
سوتتا نەمەسە سوتقا دەيىنگى تەرگەپ-تەكسەرۋ بارىسىندا كۋانىڭ، جابىرلەنۋشىنىڭ كورىنەۋ جالعان ايعاقتارى نە ساراپشىنىڭ، ماماننىڭ قورىتىندىلارى، سول سياقتى سونداي جاعدايلاردا، سونداي-اق اتقارۋشىلىق قۇجاتتاردى ورىنداۋ كەزىندە اۋدارماشى جاساعان كورىنەۋ قاتە اۋدارما - التى جىلعا دەيىنگى مەرزىمگە باس بوستاندىعىن شەكتەۋگە نەمەسە سول مەرزىمگە باس بوستاندىعىنان ايىرۋعا جازالانادى.
سىبايلاس جەمقورلىق، اۋىر نەمەسە اسا اۋىر قىلمىس تۋرالى قىلمىستىق ءىس بويىنشا نەمەسە پايداكۇنەمدىك نيەتپەن جاسالعان ءدال سول ءىس-ارەكەتتەر - بەس جىلدان ون جىلعا دەيىنگى مەرزىمگە باس بوستاندىعىنان ايىرۋعا جازالانادى.
«سونداي-اق ەگەر كۋاگەر ايعاق بەرۋدەن، جاۋاپ بەرۋدەن باس تارتاتىن بولسا، قىلمىستىق كودەكسىنىڭ 421-بابىنا سايكەس قىلمىستىق جاۋاپكەرشىلىك كوزدەلگەن»، - دەيدى دۋمان كوپبايەۆ.
قىلمىستىق كودەكسىنىڭ 421-بابىنا سايكەس كۋانىڭ نەمەسە جابىرلەنۋشىنىڭ سوتتا نەمەسە سوتقا دەيىنگى تەرگەپ- تەكسەرۋ بارىسىندا ايعاقتار بەرۋدەن باس تارتۋى - ەكى مىڭنان بەس مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە ءبىر مىڭ ەكى ءجۇز ساعاتقا دەيىنگى مەرزىمگە قوعامدىق جۇمىستارعا تارتۋعا نە بەس جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋعا جازالانادى.
