سپورتشىلار اراسىندا ءدىني تەرىس اعىمداردىڭ تارالۋىنا جول بەرىلمەيدى - مينيسترلىك

ق ر تۋريزم جانە سپورت ۆيتسە-ءمينيسترى سەرىك جاراسبايەۆ سپورتشىلارعا تەرىس اعىمدار جايىندا تەولوگتار تۇسىندىرەتىنىن ايتتى.

- پروفيلاكتيكا رەتىندە ولارعا تۇسىندىرەمىز. بۇل رەتتە، سپورتشىنىڭ دىندەگى راديكالدى اعىمدارىنا بارماۋىنا نازار اۋدارىپ، ءتيىستى جۇمىستى اتقارامىز. ءتيىستى جول كارتاسى اياسىندا بۇل جۇمىسقا تەولوگتاردى تارتىپ جاتىرمىز، ياعني وسىنداي ءىس-شارالاردى فەدەراتسيالارعا ەنگىزەمىز، - دەدى س. جاراسبايەۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، راديكالدى كوزقاراستاعى سپورتشىلار جايىندا مالىمەتتەر ءتيىستى ۆەدومستۆولارعا حابارلانادى.

بۇدان بۇرىن حابارلانعانداي، سەنات «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت، سونداي-اق ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىن ماقۇلدادى.

بۇل قۇجاتتا اككرەديتتەلگەن سپورت فەدەراتسيالارىنا ءدىني ەكسترەميزم مەن تەرروريزمنىڭ الدىن الۋ جونىندە شارالار قابىلداۋ مىندەتىن بەلگىلەۋ ەسكەرىلگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى