سپورت تۋرالى جاڭا زاڭدا نە وزگەردى
استانا. KAZINFORM - بۇگىن پرەزيدەنت دەنە شىنىقتىرۋ جانە سپورت سالاسىنداعى جاڭا زاڭعا قول قويدى. بۇل تەك كاسىبي سپورتشىلارعا عانا ەمەس، بالاسىن سپورتقا بەرىپ جۇرگەن اتا-انالارعا، سالاۋاتتى ءومىر سالتىن ۇستاناتىن بارشا ازاماتتارعا قاتىستى ماڭىزدى قۇجات.
پارلامەنت ءماجىلىسىنىڭ دەپۋتاتى، الەۋمەتتىك-مادەني دامۋ كوميتەتىنىڭ ءتوراعاسى اسحات ايماعامبەتوۆ جاڭا زاڭنىڭ باستى جاڭاشىلدىقتارى تۋرالى ايتىپ بەردى.
- ءبىزدىڭ كوميتەت دەپۋتاتتارى وسى زاڭ جوباسىمەن ۇزاق ءارى مۇقيات جۇمىس ىستەدى. ناتيجەسىندە لەگيونەرلەردى قارجىلاندىرۋعا بيۋدجەتتەن دە، كۆازيمەملەكەتتىك سەكتوردان دا (مىسالى، «سامۇرىق-قازىنا») تىيىم سالىنادى. قاراجات ءوز سپورتشىلارىمىزدى قولداۋعا جۇمسالادى. ۇلتتىق سپورت تۇرلەرى (قازاقشا كۇرەس، اسىق اتۋ، كوكپار جانە ت. ب.) باسىم باعىتتار تىزىمىنە رەسمي تۇردە ەندى. بۇقارالىق سپورت - نەگىزگى باسىمدىق بولادى، - دەپ جازدى دەپۋتات ءوزىنىڭ Telegram-پاراقشاسىندا.
سپورت سالاسىندا ۆەرتيكال باسقارۋ جۇيەسى ەنگىزىلەدى - ەندى مينيسترلىكتەن اكىمدىككە دەيىن ءبارى ءبىر جۇيەمەن جۇمىس ىستەۋى كەرەك. سپورت فەدەراتسيالارى رەسپۋبليكالىق قۇرىلىممەن بايلانىستى بولۋى كەرەك، بۇل ءتارتىپ پەن تيىمدىلىك ءۇشىن قاجەت.
- سپورت مەكەمەلەرىنىڭ باسشىلارى ەندى روتاتسيا ارقىلى تاعايىندالادى - «ماڭگىلىك» باستىقتار بولمايدى. مۇنداي جۇيە مەكتەپ ديرەكتورلارىنا قاتىستى دا ەنگىزىلگەن. مۇگەدەكتىگى بار سپورتشىعا ەرىپ جۇرەتىن ادامنىڭ شىعىنى مەملەكەت ەسەبىنەن وتەلەدى. بۇل دا ءبىزدىڭ دەپۋتاتتاردىڭ باستاماسى، - دەيدى ا. ايماعامبەتوۆ.
سونىمەن بىرگە، ءار سپورت ءتۇرى بويىنشا جاس شەكتەۋلەرى ناقتى بەلگىلەندى، بۇل بالالاردىڭ قاۋىپسىزدىگى ءۇشىن ماڭىزدى. انتيدوپينگ ەرەجەلەرىن بۇزعاندارعا قاتىستى جاۋاپكەرشىلىك كۇشەيتىلەدى. سپورتتىق مەديتسينانىڭ جۇمىسى ناقتى زاڭمەن رەتتەلدى.
بيۋجەت ەندى ناقتى باسىم سپورت تۇرلەرىنە باعىتتالادى. سپورت ۇيىمدارىنا اقىلى قىزمەت كورسەتىپ، تابىس تابۋعا مۇمكىندىك بەرىلەدى - بۇل قاراجات سول ۇيىمنىڭ ەسەبىنە تۇسەدى.
بۇعان دەيىن تۋريزم جانە سپورت ءمينيسترىنىڭ ورىنباسارى سەرىك جاراسبايەۆ سپورت سالاسىن رەفورمالاۋ شارالارى تۋرالى ايتىپ بەرگەن ەدى.
