سولتۇستىك قازاقستاندا بيىل 100 دەن استام جاياۋ ادامدى كولىك قاعىپ كەتكەن
پەتروپاۆلدا جاياۋ جۇرگىنشىلەردىڭ وتكەلدەرىنە جارىقديودتى جول بەلگىلەرى ورناتىلىپ جاتىر. پوليتسيا وسىلايشا تۇرعىنداردىڭ قاۋىپسىزدىگىن قامتاماسىز ەتپەك. تەك بيىل وبلىستا 113 جۇرگىنشىنى كولىك قاعىپ كەتكەن، دەيدى Kazinform.
س ق و پوليتسيا دەپارتامەنتىنىڭ مالىمەتىنشە، ءوڭىر جولدارىندا جىل باسىنان بەرى 327 جول-كولىك وقيعاسى تىركەلگەن، ونىڭ 113 ىندە جاياۋ جۇرگىنشىلەر كولىك قاققان.
جول اپاتىنىڭ 25 ى جاياۋ جۇرگىنشىلەردىڭ كىناسىنەن بولعان.
جۇرگىزۋشىلەردىڭ جولداعى ءتارتىبىن ارتتىرۋعا باعىتتالعان رەيدتەردەن بولەك، ءتارتىپ ساقشىلارى جول-كولىك ينفراقۇرىلىمىن جاقسارتۋ جۇمىستارىنا دەن قويدى.
وتكەن اپتادان باستاپ پوليتسەيلەردىڭ ۇسىنىستارى بويىنشا وقۋ ورىندارى مەن ادام كوپ جينالاتىن ورىندارعا جاقىن ورنالاسقان پەتروپاۆل كوشەلەرىندە جول بەلگىلەرى جاڭارتىلا باستادى. جول بەلگىلەرى جارىقديودتى شامدارمەن جابدىقتالعان.
بۇل ولاردى قاراڭعى ۋاقىتتا، كەز كەلگەن اۋا رايىندا انىق كورۋگە مۇمكىندىك بەرەدى. جەرگىلىكتى تۇرعىندار بۇل جاڭاشىلدىقتى تولىعىمەن قولداپ جاتىر.
«بۇل جەردەن بالالار ءجيى وتەدى. جاڭا ۇيلەر سالىنىپ جاتىر. جاقىن جەردە سۋپەرماركەت تە بار. جاقسى جاسالعان. ەندى جۇرگىزۋشىلەرگە مۇقيات بولۋ كەرەك»، - دەيدى پەتروپاۆل تۇرعىنى كەنجەباي مۇقاتايەۆ.
وبلىس ورتالىعىنىڭ جول جەلىسىندە جارىقديودپەن جارىقتاندىرىلعان بارلىعى 46 جاياۋ جۇرگىنشى وتكەلى ورناتىلعان. قازىر تاعى 10 ى ىسكە قوسىلادى.
«جاڭا وقۋ جىلىنىڭ قارساڭىندا مەكتەپتەر مەن كوللەدجدەردىڭ ماڭىندا 15 قوسىمشا جاساندى كەدەرگى، قاجەتتى جول بەلگىلەرى ورناتىلىپ، ولار اعىمداعى جوندەۋدەن ءوتتى. سونداي-اق جول ۇستىنە تاڭبالار سالىنۋدا. پوليتسيا دەپارتامەنتى وبلىس اكىمدىگىمەن بىرلەسىپ جول قوزعالىسى جاعدايىن جاقسارتۋ بويىنشا تۇراقتى نەگىزدە جۇمىس جۇرگىزەدى»، - دەيدى س ق و پ د اكىمشىلىك پوليتسيا باسقارماسىنىڭ باستىعى سەرىك ءالجانوۆ.
