سولتۇستىك ارالعا ناۋرىزدىڭ سوڭىنا دەيىن 1,6 ميلليارد تەكشە مەتر سۋ جىبەرىلەدى
استانا. KAZINFORM - بىلتىرعى قازاننان قاڭتار ايىنا دەيىن سولتۇستىك ارالعا 1 ميلليارد تەكشە مەتر سۋ جىبەرىلدى. ال ناۋرىز ايىنىڭ سوڭىنا دەيىن تاعى 1,6 ميلليارد تەكشە مەتر سۋ جىبەرىلەدى.
بۇل تۋرالى ق ر سۋ رەسۋرستارى جانە يرريگاتسيا مينيسترلىگىنىڭ رەسمي وكىلى ءمولدىر ابدۋاليەۆا ايتتى.
- سولتۇستىك ارال تەڭىزىن تولتىرۋ جانە ونى قالپىنا كەلتىرۋ جۇمىسى جالعاسىپ جاتىر. وتكەن جىلدىڭ قازانىنان باستاپ وسى جىلدىڭ قاڭتارىنا دەيىن سولتۇستىك ارالعا 1 ميلليارد تەكشە مەتردەن استام سۋ جىبەرىلدى. بۇل وسىعان دەيىن جوسپارلانعان كولەمنەن 100 ميلليون تەكشە مەترگە ارتىق، - دەدى ول و ك ق الاڭىندا.
رەسمي وكىل ەل اراسىنداعى «سولتۇستىك ارال سۋ تاسقىنىنان نە جاڭبىر ەسەبىنەن تولىپ جاتىر» دەگەن پىكىردىڭ قاتە ەكەنىن اتاپ ءوتتى. سەبەبى ەلىمىزدىڭ وڭتۇستىك وڭىرىندە ايتارلىقتاي سۋ تاسقىنى بولماعان. ارالعا سۋ جىبەرۋ - سۋ رەسۋرستارىن ۇنەمدەۋدىڭ جانە سۋ ديپلوماتياسىنىڭ ناقتى ناتيجەسى.
- ورتالىق ازياداعى ارىپتەستەرمەن جاسالعان كەلىسىمدەردىڭ ارقاسىندا كەلە جاتقان ناۋرىز ايىنىڭ سوڭىنا دەيىن تاعى 1,6 ملرد تەكشە مەتر سۋ جىبەرىلەدى. قازىر سولتۇستىك ارالداعى سۋدىڭ جالپى كولەمى 22 ميلليارد تەكشە مەتر- دەن اسادى. ءوسۋ ديناميكاسىن سالىستىرار بولساق، 2022 -جىلدىڭ باسىندا بۇل كورسەتكىش 18,9 ميلليارد تەكشە مەتر بولعان. وسى جىلدىڭ سوڭىنا دەيىن تەڭىزدەگى سۋ مولشەرى 23,4 ميلليارد تەكشە مەترگە جەتەدى دەپ كۇتىلۋدە. ال 2030 -جىلدىڭ سوڭىنا دەيىن سۋ مولشەرىن 27 ميلليارد تەكشە مەترگە جەتكىزۋ جوسپارلانىپ وتىر، - دەدى ءمولدىر ابدۋاليەۆا.
ايتا كەتەيىك، سولتۇستىك ارالدى ساقتاۋ جوباسىنىڭ العاشقى كەزەڭىنىڭ ناتيجەسىندە تەڭىزدەگى سۋ %42- عا ۇلعايدى.
اۆتور
ەربول جانات
