سولتۇستىك ارال تەڭىزىنىڭ تارتىلۋىنان كۇرىش ەگىسىن قىسقارتۋعا ءماجبۇرمىز - دەپۋتات

- ارال تەڭىزىنىڭ تارتىلۋى بارشامىزدى الاڭداتادى. تەڭىزدى جوبالىق كولەمىنە جەتكىزۋ ءۇشىن ءبىر رەتتىك 5 ميلليارد تەكشە مەتر سۋ قاجەت. سونداي-اق، ونى قالىپتى دەڭگەيدە ۇستاپ تۇرۋ ءۇشىن جىل سايىن 2,5-3 ميلليارد تەكشە مەتر كولەمىندە سۋ قۇيۋ كەرەك. ءبىزدىڭ الدىمىزدا تۇرعان ەڭ ماڭىزدى مىندەت - سولتۇستىك ارال تەڭىزىن ساقتاپ قالۋ ارقىلى ارال داعدارىسىنىڭ قورشاعان ورتا مەن تەڭىز ماڭىندا تۇراتىن ادامداردىڭ ومىرىنە تيگىزەتىن زياندى اسەرىن ازايتۋ. جىل سايىن اسىرەسە ۆەگەتاتسيا كەزەڭىندە سىرداريا وزەنىمەن تومەنگە جىبەرىلەتىن سۋدىڭ ازايتىلۋى سىر ءوڭىرىنىڭ ەكونوميكالىق جانە ەكولوگيالىق جاعدايى مەن حالقىنىڭ تىنىس-تىرشىلىگىنە قيىن ءتيىپ جاتىر، - دەدى مۇرات ەرگەشبايەۆ ۇكىمەت باسشىسىنىڭ ورىنباسارى قانات بوزىمبايەۆتىڭ اتىنا دەپۋتاتتىق ساۋال جولداي وتىرىپ.

حالىق قالاۋلىسىنىڭ پايىمداۋىنشا، مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ وتىرىسىندا ارال تەڭىزىن تولتىرۋ ماسەلەسىنە باسىمدىق بەرۋ قاجەت.

- جىبەرىلەتىن سۋدىڭ ازايتىلۋىنان سولتۇستىك ارال تەڭىزىنىڭ تارتىلۋى كۇردەلى ماسەلەگە اينالىپ كەلەدى. سۋدىڭ از كەلۋى سالدارىنان سوڭعى ءتورت جىل قاتارىنان تۇراقتى سۋارۋعا بەكىتىلگەن شەك قايتا قارالىپ كەلەدى. ناتيجەسىندە، كۇرىش ەگىسىنىڭ كولەمىن قىسقارتۋعا ءماجبۇر بولدىق. مىسالى، وتكەن جىلى سۋلى جىل بولعانىمەن، كۇرىشتىڭ ەگىس كولەمى 3,8 مىڭ گەكتارعا قىسقارتىلدى. كۇرىش ەگىلمەي قاتتى تۇزدالعان توپىراقتا باسقا داقىلداردان جوعارى ءونىم الۋ مۇمكىن ەمەس. ايماقتىڭ بۇل ەرەكشەلىگىن دە ەسكەرۋىمىز قاجەت. 90-جىلدارى شارۋاشىلىقتاردىڭ قارجىلىق جاعدايى تومەن بولۋىنان كۇرىش ەگىسى 64 مىڭ گەكتارعا ەگىلگەن كەزدە، اۋىسپالى ەگىستىكتىڭ 46 مىڭ گەكتارى تۇزدانۋ سالدارىنان اينالىمنان شىعىپ قالدى. سول سەبەپتەن، كۇرىش ءوسىرۋ ەكولوگيالىق ماڭىزعا يە جانە كۇرىشتىك القاپتاردى سۋعا باستىرۋ ارقىلى توپىراقتىڭ تۇزدانۋىن تومەندەتۋگە مۇمكىندىك بەرەدى. سىر ءوڭىرىنىڭ ەكونوميكالىق جانە ەكولوگيالىق جاعدايى، حالقىنىڭ تىنىس- تىرشىلىگى سىرداريا وزەنى مەن ارال تەڭىزىنىڭ جاعدايىنا تىكەلەي بايلانىستى. جوعارىدا ايتىلعانداردىڭ نەگىزىندە ارناسايعا سۋ جىبەرۋدى دەرەۋ توقتاتىپ، شاردارادان تومەن تاستالاتىن سۋدىڭ كولەمىن 650 تەكشە مەتر جەتكىزۋدى قولداۋىڭىزدى سۇرايمىن، - دەيدى ول.

ەسكە سالا كەتسەك، وتكەن جىلدىڭ قازانىنان وسى جىلدىڭ قاڭتارىنا دەيىن سولتۇستىك ارال تەڭىزىنە 1 ميلليارد تەكشە مەتر سۋ جىبەرىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى