سوعىس كەزىندە دالا پوشتاسىنان كەلگەن ءۇشبۋ حاتتاردا نە جازىلعان ەدى

جاۋىنگەرلەر ءۇشبۋ حاتىن جەرلەستەرىن تىلداعى ەڭبەك قارقىنىن كۇشەيتۋگە جىگەرلەندىرۋ ءۇشىن جازعان.

- 1942-جىلى قىزىلوردا وبلىستىق پارتيا كوميتەتىنىڭ قۇجاتىندا 18/26 اسكەري ءبولىمىنىڭ ساياسي باسشىسى شيدەروۆتان قىزىلوردا ەڭبەكشىلەرىنە العىس ايتقان حات بەكىتىلگەن. حاتتان وبلىس ەڭبەكشىلەرىنىڭ «بارلىق كۇش، بارلىق مۇمكىنشىلىك مايدانعا كومەككە جۇمسالسىن!» دەگەن ۇران اياسىندا ۇيىمشىلدىق تانىتىپ، مايدانعا كومەك كورسەتۋگە ۇمتىلعانىن كورەمىز، - دەيدى قىزىلوردا وبلىستىق مەملەكەتتىك ءارحيۆى قوعامدىق-ساياسي تاريح فيليالىنىڭ ءبولىم باسشىسى دانا قالتايەۆا.

دالا پوشتاسىنان قالالىق كوميتەتكە كەلگەن حاتىندا قىزىلوردا قالاسىنىڭ تۇرعىنى، سوعىستىڭ العاشقى كۇندەرىنەن باستاپ مايداندا بولعان وفيتسەر-مايور ۆالەنتين كراۆچەنكو كاۆكازدىڭ ۆوروشيلوۆ قالاسىنان ەۆاكۋاتسيالانعان اناسىنىڭ ەلگە قايتۋىنا كومەكتەسۋدى وتىنگەن.

ال كەيبىر حات يەلەرى وتباسىنداعى جاعدايعا الاڭداپ، ماتەريالدىق تۇرمىسىن تۇزەتۋگە جاردەمدەسۋدى سۇراعان.

جاۋىنگەر حاتتارىنان ەلگە ساعىنىش قانا ەمەس، مايدان ءومىرى مەن شىندىعى قاتار سەزىلەدى. ءۇشبۋ حاتتار دەپ وتىرعانىمىز - مايدان حاتتارى. حاتتى وسىلاي بۋۋ ەكىنشى دۇنيەجۇزىلىك سوعىس كەزىندە قالىپتاسقان.

ونىڭ ءۇشبۇرىش پىشىندە بولۋ سەبەبىن وبلىستىق تاريحي-ولكەتانۋ مۋزەيىنىڭ ءبولىم مەڭگەرۋشىسى ايگەرىم بەكقۇليەۆا ءتۇسىندىردى.

- بۇعان ءبىر ەمەس، ەكى سەبەپ بولعان. مايداننىڭ قيىن جاعدايىندا قاعازدىڭ ءوزى تاپشى بولعان ۋاقىتتا كونۆەرت پەن ءمور ىزدەپ تابۋ مۇمكىن بولمادى. سوندىقتان پوشتانىڭ «موبيلدى» نۇسقاسى ويلاپ تابىلدى. حات جازۋ ءۇشىن قاعاز وراماسى، ءتىپتى تەمەكى قورابى دا پايدالانىلدى. حاتتىڭ ارنايى كونۆەرتكە سالىنباي، ءۇش بۋىلۋىنىڭ تاعى ءبىر سەبەبى - جاۋىنگەرلەر جازعان ءاربىر حات اسكەري تسەنزۋرادان وتەتىن، - دەيدى ول.

مۋزەي قىزمەتكەرى سوعىس ۋاقىتىندا حاتتىڭ كونۆەرتكە سالىنۋىنىڭ نەمەسە جاي ۇشبۇرىش تۇرىندە كەلۋىنىڭ ماڭىزىنا توقتالدى.

- حاتتىڭ ءۇشبۋ بولىپ كەلۋى ۇلىنىڭ، كۇيەۋىنىڭ نەمەسە اكەسىنىڭ ءتىرى ەكەنىن بىلدىرگەن. سەبەبى مۇنداي حاتتى جاۋىنگەردىڭ ءوزى جازاتىن. ەگەر كونۆەرتكە سالىنعان، ءمور سوعىلعان بولسا، بۇل - حات كەلگەن وتباسى ءۇشىن قارالى حاباردىڭ كورىنىسى. قارا قاعاز دەگەنىمىز - وسى، - دەدى ايگەرىم بەكقۇليەۆا.

بۇعان دەيىن پەتروپاۆلدا سوعىس ۋاقىتىندا جۇمىس ىستەگەن ەت كومبيناتىنىڭ جۇمىسشىلارى جوسپاردى 6 ەسە ارتىق ورىنداعانىن جازعانبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى