سوڭعى 6 جىلدا جاپونياداعى ەڭ ءىرى IPO- دان كەيىن Tokyo Metro-نىڭ اكسيالارى 47,3 پايىزعا ارتتى
استانا. قازاقپارات - Tokyo Metro Co اكسيالارى سارسەنبى كۇنى توكيو قور بيرجاسىندا ءساتتى دەبيۋت جاساپ، 1200 يەن (7,9 دوللار) ورنالاستىرۋ باعاسىنان 47,3 پايىزعا جوعارىلادى، دەپ حابارلايدى Kyodo News.
ازياداعى ەڭ كونە مەترونىڭ اكتسيالارى نەگىزىنەن جەكە ينۆەستورلاردىڭ ۇلكەن قىزىعۋشىلىعىن تۋدىردى. جاپونيا مەن توكيو ۇكىمەتتەرى ءارقايسىسى ءوز اكتيۆتەرىنىڭ جارتىسىن ساتقان. بۇعان دەيىن ولار تيىسىنشە 53,4 پايىز جانە 46,6 پايىز يەلەندى.
ورتالىق ۇكىمەت تۇسكەن قاراجاتتى 2011-جىلعى ناۋرىزدا جاپونيادا بولعان جويقىن جەر سىلكىنىسى مەن تسۋناميدەن كەيىنگى قالپىنا كەلتىرۋ جۇمىستارىن قارجىلاندىرۋ ءۇشىن شىعارىلعان وبليگاتسيالاردى وتەۋگە جۇمسايدى.
جاپونيادا SoftBank Group Corp تەلەكوممۋنيكاتسيالار ءبولىمىن ورنالاستىرعاننان بەرى نارىقتىق كاپيتالداندىرۋ دا، اكسيالاردى ورنالاستىرۋ باعاسى دا ەڭ جوعارى بولىپ وتىر.
«جەكە ينۆەستورلاردىڭ اراسىندا توكيو مەتروسىنىڭ اكسيالارىنا دەگەن سۇرانىس كومپانيانىڭ تۇراقتى تابىسى مەن تارتىمدى ديۆيدەندتەر كىرىسىنىڭ ارقاسىندا كۇشەيىپ وتىر»، - دەدى NLI Research Institute اكسيالار جونىندەگى باس ستراتەگ سينگو يدە.
دەگەنمەن، ول وپەراتوردىڭ اكتسيالارى باستاپقى دۇربەلەڭ باسىلعاننان كەيىن ساتىلا باستالۋى مۇمكىن ەكەنىن ەسكەرتتى.
