سوڭعى 5 جىلدا جاس وسپىرىمدەر اراسىنداعى قىلمىس 30 پايىزعا تومەندەدى – ءى ءى م
استانا. KAZINFORM - سوڭعى 5 جىلدا جاس وسپىرىمدەر اراسىنداعى قىلمىس 30 پايىزعا تومەندەدى. بۇل تۋرالى ءى ءى م اكىمشىلىك پوليتسيا كوميتەتىنىڭ باسقارما باستىعى اسەت وسپانوۆ ايتتى.
- مەملەكەتتىك ورگاندارمەن بىرلەسىپ قابىلداناتىن شارالاردىڭ ناتيجەسىندە سوڭعى 5 جىلدا جاس وسپىرىمدەر اراسىنداعى قىلمىس 30 پايىزعا، وتكەن جىلى 3 پايىزعا تومەندەدى. زاڭنامانى جەتىلدىرۋ بويىنشا شارالار تۇراقتى نەگىزدە قولدانىلادى. وتكەن جىلى كامەلەتكە تولماعاندارعا قارسى قىلمىستار ءۇشىن قىلمىستىق جانە اكىمشىلىك جاۋاپكەرشىلىكتى كۇشەيتەتىن زاڭنامالىق تۇزەتۋلەر قابىلداندى، - دەدى ول مينيسترلىكتىڭ باسپا ءسوز قىزمەتى الاڭىندا وتكەن بريفينگتە.
ونىڭ اتاپ وتۋىنشە، اتالعان زاڭنامالىق تۇزەتۋلەر اياسىندا بالالارعا قاتىستى زورلىق-زومبىلىق ءۇشىن تاتۋلاسۋ الىنىپ تاستالدى. كامەلەتكە تولماعانداردى زورلاعانى ءۇشىن ءومىر بويىنا باس بوستاندىعىنان ايىرۋ، كامەلەتكە تولماعاندارعا جىنىستىق سيپاتتا تيىسكەنى ءۇشىن قىلمىستىق جاۋاپكەرشىلىك ەنگىزىلدى.
- ناتيجەسىندە بيىل كامەلەتكە تولماعانداردىڭ جىنىستىق تيىسپەۋشىلىگىنە قارسى جاسالاتىن قىلمىستار سانى 21 پايىزعا تومەندەدى. سونداي-اق بۋللينگ ءۇشىن اكىمشىلىك جاۋاپكەرشىلىك ەنگىزىلدى. وتكەن جىلدان باستاپ 247 بۇزۋشى جاۋاپكەرشىلىككە تارتىلدى، - دەدى اسەت وسپانوۆ.
وسىعان دەيىن ءى ءى م شەتەلدىك ارىپتەستەرىمەن جۇرگىزگەن وپەراتسيا بارىسىندا 300 گە جۋىق قىلمىسكەر ۇستالعانىن جازدىق.
