ستراندجا كۋبوگى-2025: العاشقى جارىس كۇنى ءبىر بوكسشىمىز جارىس جولىنان شىعىپ قالدى
استانا. KAZINFORM - بولگاريا استاناسى سوفيادا ءوتىپ جاتقان ءداستۇرلى ستراندجا حالىقارالىق تۋرنيرىنىڭ العاشقى كۇنى ءتورت قازاقستاندىق شارشى الاڭعا شىعىپ، بىرەۋى جارىس جولىنان شىعىپ قالدى.
ناقتىراق ايتساق، قازاقستاندىق بوكسشى داۋلەت مولداشيەۆ بولگاريا استاناسى سوفيادا ءوتىپ جاتقان ستراندجا كۋبوگىندەگى العاشقى ايقاسىندا-اق جەڭىلىپ قالدى.
57 كەلىدە ونەر كورسەتەتىن وتانداسىمىز 1/8 فينالىندا ازەربايجاندىق زاليمحان سۋلەيمانوۆپەن جۇدىرىقتاستى. ءبىرىنشى راۋندتا ازەربايجاندىق بوكسشى 4:1 ەسەبىمەن باسىم ءتۇستى. ەكىنشى راۋندتا قازاق بوكسشى ەسەسىن قايتارعانداي بولدى. دەگەنمەن ءۇش راۋند قورىتىندىسى بويىنشا سۋلەيمانوۆ تورەشىلەردىڭ شەشىمىمەن جەڭىسكە جەتتى.
ال 67 كەلى سالماقتا ەل نامىسىن قورعاعان ءساناتالى تولتايەۆ ءبىرىنشى ايقاسىندا قارسىلاسىن ايقىن باسىمدىقپەن ۇتىپ، تۋرنيردىڭ كەلەسى اينالىمىنا ءوتتى. ول العاشقى جەكپە-جەگىندە بولگاريا بوكسشىسىن 5:0 ەسەبىمەن جەڭدى.
سونىمەن قاتار كەشە العاشقى جارىس كۇنى قازاقستاندىق تورەحان سابىرحان مەن سەرىك تەمىرجانوۆ جەكپە-جەكسىز كەلەسى اينالىمعا جولداما الادى. قوس بوكسشىمىزدىڭ قارسىلاستارى دا وزبەكستاننىڭ وليمپيادا چەمپيوندارى بولاتىن. ەكەۋى دە شارشى الاڭعا شىقپاي قالدى.
وزبەكستان بوكس فەدەراتسياسىنىڭ Instagram پاراقشاسىنداعى رەسمي اقپارات بويىنشا، ابدۋماليك حالوكوۆ (60 كەلى) كاسىبي رينگتەگى جەكپە-جەگىنىڭ ۋاقىتى وزگەرۋى سەبەپتى جاتتىعۋ جيىنىنان ءوتۋ ءۇشىن يسپانياعا اتتانىپ كەتكەن. ال اسادحودجا مۋيدينحودجايەۆ (67 كەلى) تۋرنيرگە دايىندىق بارىسىندا العان جاراقاتىنان تولىق ساۋىعا الماۋىنا بايلانىستى تورەحانمەن جەكپە-جەكتەن باس تارتقان.
وسىلايشا، تورەحان سابىرحان مەن سەرىك تەمىرجانوۆ جەكپە-جەكسىز كەلەسى اينالىمعا ءوتتى.
ەستەرىڭىزگە سالا كەتەيىك، وسىعان دەيىن وزبەكستاننىڭ قوس وليمپيادا چەمپيوندارى قازاق بوكسشىلارىنا قارسى شارشى الاڭعا شىقپايتىنى تۋرالى جازعان بولاتىنبىز.
اۆتور كۇنسۇلتان وتارباي
