ستۋدەنتتەر اراسىندا قۇمار ويىنعا سالىنعاندار كوپ - دەپۋتات

بۇل تۋرالى پارلامەنت ءماجىلىسى جانىنداعى قوعامدىق پالاتانىڭ وتىرىسىندا ويىن بيزنەسىنە ارنالعان زاڭ جوباسىن تالقىلاۋ كەزىندە دەپۋتات رۋسلان بەردەنوۆ ايتتى.

«قۇمار ويىن سالدارىنان قانشاما ادام سۋيتسيدكە بارىپ جاتىر. ءبىراق ونىڭ سەبەبىن كوپ جاعدايدا بىلمەيمىز. سونىمەن قاتار، اجىراسۋلاردىڭ 40 پايىزىنا وسى لۋدومانيا تىكەلەي سەبەپ بولدى. مەكتەپتەگى وقۋشىلاردىڭ اراسىندا دا وسى ويىننان حابارى بار. بۇل ماسەلەگە قاتىستى سەگىز ۋنيۆەرسيتەتكە باردىم. جوعارى وقۋ ورىندارىندا لۋدوماندار كوپ ەكەنى، كەيبىر ۋنيۆەرسيتەتتەردە 30-40 پايىزعا دەيىن جەتەتىنى ايتىلىپ جاتىر. ەر بالالار دا، قىزدار دا ويناپ ءجۇر. وسى تۇرعىدا وقۋ ورىندارىنىڭ باسشىلىعى زاڭنامانى قاتاڭداتۋ ماسەلەسىن كوتەرىپ وتىر»، - دەدى ر. بەردەنوۆ.

ونىڭ ايتۋىنشا، ءماجىلىس قاراۋىنداعى ويىن بيزنەسى، لوتەرەيالار جانە لوتەرەيا قىزمەتى ماسەلەلەرى جونىندەگى زاڭ جوباسى اياسىندا زاڭنامانى قاتاڭداتۋ تەتىكتەرى قاراستىرىلعان.

«قازىر جۇمىس ىستەپ جاتقان ءىرى كومپانيالارعا قاتىستى قاتاڭ زاڭ شىعارۋ كەرەك. ويىنقۇمارلىق، ءباس تىگۋ جايىندا ايتىپ جۇرگەندە، كوپ جاعدايدا Satty Zhuldyz كومپانياسى نازاردان تىس قالىپ جاتادى. بۇل كومپانيا ەلىمىزدە مونوپوليست سانالادى. وسى كومپانيا قىزمەتى بارلىق وڭىردەگى دۇكەندەردە جانە نىسانداردا تارالعان. ءتىپتى، ءدىني مەكەمەلەردە دە بار ەكەن. كەشە ءبىر ۆيدەونى كوردىم، وندا ءدىني مەكەمەنىڭ وزىنە دە قويعانىن بايقادىق»، - دەدى دەپۋتات.

رۋسلان بەردەنوۆ لوتەرەيانى جاستار دا، كارىسى دە وينايتىنىن ايتتى.

«بۇل رەتتە، لوتوماتيكتەردى ايتىپ جاتىرمىز. جاقىندا تۋريزم جانە سپورت ۆيتسە- ءمينيسترى ميراس تولەبايەۆپەن پىكىر الماسىپ، ءبىراز جۇمىس ىستەدىك. قازاقستان بويىنشا زاڭسىز جۇمىس ىستەگەن 326 لوتوكلۋب جابىلدى. الايدا زاڭدى تۇردە جۇمىس ىستەپ تۇرعان لوتوكلۋبتار بار. ونىڭ دا جۇمىسىن ءبىز قاراستىرۋىمىز كەرەك»، - دەدى دەپۋتات.

ەسكە سالساق، جاقىندا پارلامەنت ماجىلىسىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى، لوتەرەيالار جانە لوتەرەيا قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تانىستىرىلدى.

ەلىمىزدە 400 مىڭداي ادام بۋكمەكەرلەر مەن كازينولاردىڭ تۇراقتى كليەنتىنە اينالعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى