ستۋدەنت ەجەلگى جازۋداعى ءسوزدى وقىپ، 40000 دوللار سىيلىق الدى
پاپيرۋستاعى ەجەلگى جازۋلاردى انىقتاۋدا كوپتەگەن قيىندىقتار بار. جاساندى ينتەللەكت بۇل جۇمباقتى شەشۋدە دە كومەكتەسە الاتىنى دالەلدەندى. ج ي-دىڭ كومەگىمەن ستۋدەنت ەجەلگى ريم يمپەرياسىندا جازىلعان ماتىندەگى ءسوزدى وقىعان.
ۆەزۋۆي جانارتاۋىنىڭ اتقىلاۋىنان 79-جىلى وتتى لاۆانىڭ استىندا قالعان ەجەلگى ريمدىك گەركۋلانۋم قالاسىنان تابىلعان پاپيرۋستاعى ءسوزدى وقىعان ستۋدەنتكە قوماقتى سىياقى بەرىلگەن. بۇل تۋرالى ferra.expert سايتى ارنايى حابارلاما جاريالادى. Aikyn.kz ەجەلگى ماتىندەگى ءسوزدى وقۋدىڭ قيىندىعىن تۇسىندىرەدى.
نەاپول شىعاناعىنىڭ جاعاسىندا 2000 جىل بۇرىن گۇلدەنگەن قالالار بولعان، 79 -جىلدىڭ كۇزىندە ۆەزۋۆيدىڭ اتقىلاۋى كەزىندە جانارتاۋ اعىندارىنىڭ استىندا كومىلىپ قالعان پومپەي مەن ستابي سياقتى گەركۋلانۋم تۇرعىندارى دا اپاتتان قۇتىلا الماعان.
الايدا قالا عيماراتتارى جاقسى ساقتالعان. جانارتاۋ اعىنى ۇيلەردىڭ ءىشىن تىعىز جانە بىركەلكى تولتىرىپ، اۋانى وتكىزبەگەندىكتەن كوپتەگەن عاسىرلار بويى ورگانيكالىق ماتەريالدار (ماتا مەن اعاش بۇيىمدار) شىرىمەي جاقسى ساقتالعان. كەيبىر ۇيلەردىڭ توبەسى دە قۇلاماعان، پاپيرۋسقا جازىلعان جازبالار دا جاقسى كۇيدە تابىلعان.
نەبراسكا-لينكولن ۋنيۆەرسيتەتىندە وقيتىن باكالاۆريات ستۋدەنتى SpaceX كومپانياسىندا تاعىلىمدامادان ءوتىپ جۇرگەندە سول گەركۋلانۋمنىڭ ەجەلگى جازبالارىنىڭ بىرىندە جازىلعان ءسوزدى وقىعان. ول ءۇشىن تاپقىر ستۋدەنت NVIDIA GTX 1070 گرافيكالىق كارتاسى مەن ج ي-دى پايدالانعان.
ۆەزۋۆيدىڭ اتقىلاۋىنان كۇلگە كومىلگەن گەركۋلانۋم جازبالارى زەرتتەۋشىلەرگە ۇزاق ۋاقىت جۇمباق بولىپ كەلەدى.
جازبالاردى بۇزىپ الماس ءۇشىن ءداستۇر بويىنشا رەنتگەن ساۋلەلەرى قولدانىلادى. ءبىراق گەركۋلانۋم قاعازدارى كومىرتەكتى سيامەن جازىلعاندىقتان كۇيگەن بەتتەردى كادىمگى رەنتگەن ساۋلەلەرى ارقىلى اجىراتۋ قيىن.
2019 -جىلى دوكتور برەنت سەلس جانە باسقا زەرتتەۋشىلەر ەكى جازبانى بولشەكتەردى ۇدەتكىش كومەگىمەن رەنتگەندىك سكانەرلەۋ ارقىلى وقۋعا قول جەتكىزگەن ەدى. بيىلعى جىلى بۇل رەنتگەندىك بەينەنى سيامەن جازىلعان سوزدەردى انىق تابۋ ءۇشىن ماشينالىق وقىتۋ ۇلگىسىن پايدالانىپ وڭدەلدى.
بۋماداعى سوزدەردى ءدال تابۋعا ارنايى اقشالاي سىيلىق بەرەتىن Vesuvius Challenge باعدارلاماسىنا قاتىسقان ستۋدەنت ليۋك فارريتور سيا تاڭبالارىنىڭ ورنىن كورسەتەتىن ج ي ۇلگىسىن ۇيرەتۋ ءۇشىن ءوزىنىڭ ەسكى GTX 1070 قۇرىلعىسىن پايدالانادى.
ءساتىن سالعاندا ونىڭ GTX 1070-دە دايىنداعان ج ي گرەكتىڭ πορφυρας (نەمەسە porphyras) ءسوزىن انىقتاي الدى.
قازاقشا بۇل ءسوز «قىزىلكۇرەڭ» دەپ اۋدارىلادى. ستۋدەنت تاپقان ماتىندەگى ءسوز «قىزىلكۇرەڭ» سىن ەسىمىن نەمەسە «قىزىلكۇرەڭ بوياۋ» نەمەسە «قىزىكۇرەڭ كيىم» دەگەن زات ەسىمدى ءبىلدىرۋى مۇمكىن دەپ بولجانۋدا. وسى جالعىز ءسوزدى شەشكەنى ءۇشىن فارريتورعا 40000 دوللار سىياقى بەرىلدى.
