سەرگىتكىش سۋسىنداردى الماستىراتىن 11 ءونىم
پەتروپاۆل. KAZINFORM - ەنەرگەتيكالىق سۋسىندار جاستار اراسىندا ۇلكەن سۇرانىسقا يە. ءۇش اي كۇندەلىكتى ىشكەن جاعدايدا اعزادا سۋسىنعا دەگەن تاۋەلدىلىك قالىپتاسىپ، سوڭى ءتۇرلى اۋرۋعا اكەلۋى مۇمكىن.
سولتۇستىك قازاقستان وبلىسى سانيتاريالىق-ەپيدەميولوگيالىق باقىلاۋ دەپارتامەنتىنىڭ ءبولىم باسشىسى مارينا داۆلەتبايەۆا سەرگىتكىش سۋسىنداردى قانشا مولشەردە جانە كىمدەرگە تۇتىنۋعا بولاتىنىن جانە ونى الماستىراتىن ونىمدەر جايىندا ايتىپ بەردى.
ماماننىڭ ايتۋىنشا، ەنەرگەتيكالىق سۋسىنداردىڭ كوپشىلىگىندە كوفەين، سونداي-اق گليۋكۋرونولاكتون، وسىمدىك ستيمۋلياتورلارى - گۋارانين، پاراگۆاي ماتەسى، قاراپايىم قانتتار - گليۋكوزا، فرۋكتوزا، تاۋرين، كارنيتين، كرەاتين امينقىشقىلدارى جانە ۆ دارۋمەندەرى، مىسالى، نيكوتين قىشقىلى، ۆ6 جانە ۆ12 دارۋمەندەرى بار.
«سەرگىتەتىن سۋسىندى تاۋلىكتىك تۇتىنۋ نورماسى 0,5 ليتردەن اسپاۋى ءتيىس. الايدا ونى كۇندەلىكتى 3-6 اي تۇتىنعان جاعدايدا پاتولوگيالىق تاۋەلدىلىك پايدا بولۋى مۇمكىن. ەنەرگەتيكتەردى كوپ مولشەردە قولدانۋ ديارەياعا اكەلەدى، ادام قۇسىپ، اسقازان جاراسى ءورشۋى مۇمكىن. سونداي-اق سەرگىتكىش سۋسىننىڭ اريتمياعا، ينفاركت پەن ينسۋلتقا سەبەپ بولعان جاعدايلارى بەلگىلى. ەنەرگەتيكتى تۇتىنۋ ارتەريالىق گيپەرتەنزياعا، جۇرەك ىرعاعىنىڭ بۇزىلۋىنا، اسقازان-ىشەك جولدارىنىڭ پروبلەمالارىنا اكەلۋى مۇمكىن. ولار سونداي-اق پسيحوموتورلى قوزۋدى، تىتىركەنۋدى، ۇيقىسىزدىقتى، تاحيكارديانى، اريتميانى، قان قىسىمىنىڭ جوعارىلاۋىن تۋدىرادى. 18 جاسقا دەيىنگى بالالارعا بۇل سۋسىندى مۇلدە تۇتىنباۋعا كەڭەس بەرەمىن»، - دەيدى مارينا داۆلەتبايەۆا.
سەرگىتكىش سۋسىنداردى دا، كوفەنى دە اعزاعا زيان كەلتىرمەيتىن تابيعي، جەتكىلىكتى ەنەرگيا بەرەتىن ونىمدەرمەن الماستىرۋعا بولادى. ماماننىڭ ايتۋىنشا، وسىنداي 11 ءونىم بار. ولار:
جەمىستەر. الما، بانان جانە اپەلسيننىڭ قۇرامىندا تابيعي قانت، دارۋمەندەر مەن تالشىقتار بار، ولار دەنەنى كۇنى بويى ەنەرگيامەن قامتاماسىز ەتە الادى.
جاڭعاقتار مەن داندەر. مىسالى، بادام، چيا جانە زىعىر داندەرى اقۋىزعا، پوليقانىقپاعان ماي قىشقىلدارىنا جانە دارۋمەندەرگە باي. سوندىقتان بۇل ونىمدەر تابيعي قۋات كوزى. ولاردى كۇندەلىكتى تۇتىنۋ ناتيجەسىندە قۋات پەن سەرگەكتىك بەرەدى. اسقا قوساتىن وسىمدىكتەر، شپينات جانە اسكوك دارۋمەندەرگە، مينەرالدارعا جانە تەمىرگە باي.
بال. ونىڭ قۇرامىندا تابيعي قانت پەن انتيوكسيدانتتار بار. ونى شاي مەن تاڭەرتەڭ يوگۋرتقا قوسۋعا بولادى، بۇل كوفەنى تاماشا الماستىرادى.
ءزىمبىر. ءزىمبىردى تاڭەرتەڭ ليمون جانە جىلى سۋمەن ارالاستىرىپ، دارشىن نەمەسە بال قوسۋعا بولادى. بۇل ءسىزدىڭ دەنەڭىزدى كۇنى بويعا قۋاتتاندىرادى. مۇنداي ەنەرگەتيكالىق سۋسىن ورتالىق جۇيكە جۇيەسىنە جانە يممۋنيتەتتى ارتتىرۋعا پايدالى. ليموننيك جيدەكتەرىندە ورگانيكالىق قىشقىلدار مەن سەرگىتەتىن زاتتار بار. پايدالى سۋسىن دايىنداۋ ءۇشىن 1 اس قاسىق قۇرعاق نەمەسە جاڭا پىسكەن جيدەكتى 0,5 ليتر قايناعان سۋعا سالۋ قاجەت. شايدى ءبىر ساعات بويى تۇندىرۋ كەرەك. ءدامدى بولۋى ءۇشىن ازداپ بال قوسۋعا بولادى.
جەنشەن تۇنباسى. جاسىل شايعا جەنشەن تۇنباسىنىڭ بىرنەشە تامشىسىن قوسۋعا نەمەسە جاي سۋمەن ىشۋگە بولادى.
قاراقۇمىق. كومىرسۋلار مەن اقۋىزدارعا باي جانە ۇزاق مەرزىمدى قۋات بەرەتىن داقىل.
پروبيوتيكالىق بەلسەندى باكتەريالارى بار تاعامدار. بۇل - ايران مەن يوگۋرت، ولار اس قورىتۋدى جاقسارتىپ، كۇنى بويعا قۋات بەرەدى. قۇرامىندا كوفەينى كوپ جاسىل شاي كوفەنى الماستىرا الادى. بۇل سۋسىن سونىمەن قاتار زەيىندى جاقسارتاتىن انتيوكسيدانتتارعا باي.
سۋ. تاڭەرتەڭ ۇيقىدان كەيىن مىندەتتى تۇردە سۋ ءىشۋ كەرەك، ويتكەنى ونىڭ اعزادا جەتىسپەۋشىلىگىنەن ادام تەز شارشايدى. سوندىقتان اعزا سۋسىزدانباۋى ءۇشىن جەتكىلىكتى مولشەردە سۋ ىشكەن ءجون.
