سەرىك جۇمانعارين ۇرىمجىدە ماشيڭرۇيمەن كەزدەستى

كەزدەسۋ بارىسىندا ەكى ەل اراسىنداعى ىنتىماقتاستىقتى جانداندىرۋ جانە ءوزارا ارەكەتتەستىكتىڭ پەرسپەكتيۆالارى تالقىلاندى.

ق ر ۇكىمەتى باسپا ءسوز قىزمەتىنىڭ حابارلاۋىنشا، ش ۇ ا ا - قازاقستاننىڭ قىتايداعى بارلىق وڭىرلەردىڭ ىشىندە ەڭ ءىرى ساۋدا سەرىكتەسى، ونىڭ ۇلەسىنە قازاقستان مەن قىتاي اراسىنداعى ەكىجاقتى تاۋار اينالىمىنىڭ جارتىسىنا جۋىعى تيەسىلى. وتكەن جىلى ش ۇ ا ا- مەن سىرتقى ساۋدا كولەمى %62- عا ءوسىپ، $20,3 ميللياردقا جەتتى. 2024 -جىلدىڭ 9 ايىندا قازاقستان مەن ش ۇ ا ا اراسىنداعى تاۋار اينالىمى %22,46- عا ارتىپ، $17,67 ميلليارد بولدى.

«قازاقستان مەن قىتاي باسشىلارى ەكى ەل اراسىنداعى تاۋار اينالىمىن $100 ميللياردقا دەيىن ارتتىرۋ مىندەتىن قويعان بولاتىن. وسى تۇرعىدا ءبىز ش ۇ ا ا- مەن ءوزارا ساۋدانى ەكى ەسەگە كوبەيتۋدى جوسپارلاپ وتىرمىز. ءبىز ەكسپورتتىق جانە يمپورتتىق تاۋارلار قۇرىلىمىن جانە ولاردىڭ الەۋەتىن تالداپ، قىتايعا قوسىمشا جەتكىزۋگە بولاتىن 180 تاۋار تۇرلەرىن انىقتادىق. بۇل مەتاللۋرگيا، مۇناي-حيميا، تاماق ونەركاسىبى، حيميا، ماشينا جاساۋ، قۇرىلىس تاۋارلارى»، - دەدى سەرىك جۇمانعارين.

ق ر پرەمەر-ءمينيسترىنىڭ ورىنباسارى ءوزارا ساۋدادا اۋىلشارۋاشىلىق ونىمدەرىن جەدەل تاسىمالداۋ ءۇشىن قازاقستان-قىتاي شەكاراسىنداعى وتكىزۋ پۋنكتتەرىندە «جاسىل دالىزدەر» ەنگىزۋ بويىنشا جۇرگىزىلىپ جاتقان جۇمىستاردى جوعارى باعالادى. كەلەشەكتە تاسىمالداۋدىڭ تيىمدىلىگىن ارتتىرۋ ءۇشىن «نۇر جولى» - «قورعاس» وتكىزۋ پۋنكتىندە 24/7 جۇمىس ىستەۋ تاجىريبەسىن بارلىق اۆتوموبيلدىك وتكىزۋ پۋنكتتەرىندە قاراستىرۋ ۇسىنىلدى. سونىمەن قاتار الماتى وبلىسىندا («نارىنقول- مۇزارت» ) جانە شىعىس قازاقستان وبلىسىندا («تەرەكتى- اقتوبەك») جاڭا وتكىزۋ پۋنكتتەرىنىڭ اشىلۋ جۇمىستارى جۇرگىزىلىپ جاتقاندىعى اتاپ ءوتىلدى.

تاعى ءبىر پەرسپەكتيۆالى كولىك ءتۇرى - سۋ جولى. قازاقستان تاراپى رەسەي - قازاقستان - قىتاي مۋلتيمودالدى ترانزيتتىك ءدالىزىن قۇرۋدى جانە ترانسشەكارالىق ەرتىس وزەنىن پايدالانۋدى ۇسىنادى. العاشقى كەزەڭدە جۇك تاسىمالداۋ كولەمى 2-2,5 ميلليون توننا بولادى دەپ كۇتىلۋدە.

«بۇل ءدالىزدى دامىتۋ ءۇشىن مايقاپشاعاي- زيمۋناي تەمىرجول وتكەلىن اشۋ جانە قازاقستان اۋماعىندا تۇعىل اۋىلىندا وزەن پورتىن سالۋ جوسپارلانۋدا. سونداي-اق وزەن ارقىلى تاسىمالداۋدى دامىتۋ اياسىندا قونايەۆ قالاسىنان قىتايدىڭ ينين قالاسىنا دەيىنگى ترانسشەكارالىق ىلە وزەنى ارقىلى مارشرۋتتى دامىتۋ جوباسى دا بار. بۇل جوبانى قازاقستان مەن قىتاي بيزنەستەرىنىڭ ىنتىماقتاستىعى ارقىلى جۇزەگە اسىرۋ مۇمكىن»، - دەپ تولىقتىردى سەرىك جۇمانعارين.

بۇگىندە قىتايدان ەۋروپاعا جەتكىزىلەتىن جۇك تاسىمالىنىڭ %80- دان استامى قازاقستان ارقىلى جۇزەگە اسىرىلۋدا. كەزدەسۋدە 2024 -جىلدىڭ 9 ايىندا ورتالىق ءدالىز بويىنشا تاسىمال كولەمى وتكەن جىلدىڭ بارلىق كورسەتكىشتەرىنەن %23- عا ارتىپ، 3,4 ميلليون توننانى قۇراعانى ايتىلدى. 2030-جىلعا دەيىن تاسىمال كولەمىن جىلىنا 10 ميلليون تونناعا دەيىن ارتتىرۋ جوسپارلانۋدا.

سەرىك جۇمانعارين قازاقستان قىتايدان ەۋروپاعا جانە كەرى باعىتتا جۇك تاسىمالداۋ كولەمىنىڭ ءوسۋىن تولىق قامتاماسىز ەتۋگە نيەتتى ەكەنىن اتاپ ءوتتى. سونىمەن قاتار 2029 -جىلعا قاراي كونتەينەرلىك پويىزداردىڭ سانى 600-دەن 2000 بىرلىككە دەيىن ارتتىرۋ تۋرالى كەلىسىم جاسالدى. سونداي-اق قازاقستاندىق تاراپتىڭ «قورعاس» ستانساسى اۋماعىندا قۇرعاق جۇكتەردى، كونتەينەرلەردى، استىقتى ساقتاۋ جانە اۋىستىرىپ تيەۋ ءۇشىن مۋلتيمودالدى لوگيستيكالىق تەرمينال سالۋعا دايىن ەكەنىن جەتكىزدى.

ماشيڭرۇي ش ۇ ا ا پارتيا كوميتەتىنىڭ اتىنان قازاقستان مەن قىتاي اراسىنداعى ىنتىماقتاستىقتى ىلگەرىلەتۋگە قوسقان ۇلەسى ءۇشىن ەل باسشىلىعىنا العىس ايتىپ، تاراپتار اراسىنداعى ءوزارا قارىم- قاتىناستار قازىر ەڭ جاقسى دامۋ ساتىسىندا ەكەنىن اتاپ ءوتتى. ول سونداي-اق قازاقستان تاراپىنىڭ تاۋار اينالىمىن ارتتىرۋ تۋرالى ۇسىنىسىن قولداپ، ش ۇ ا ا- دا پايدالى قازبالار مەن ءتۇستى مەتالدار، اۋىلشارۋاشىلىق جانە باسقا دا ونىمدەردى جەتكىزۋ ءۇشىن قاجەتتى كولەمدە پارتيالار بولعان جاعدايدا، ولاردى ساتىپ الۋعا دايىن كومپانيالار بار ەكەنىن جەتكىزدى.

سەرىك جۇمانعارين قازاقستان مەن ش ۇ ا ا اراسىنداعى بيۋروكراتيالىق كەدەرگىلەردى ازايتۋ ماسەلەسىن كوتەردى. بۇل ماسەلەلەردىڭ كوپشىلىگى قازاقستاننىڭ اۋىلشارۋاشىلىق ونىمدەرىن قىتايعا جەتكىزۋگە قاتىستى. بۇل استىق جۇك تاسىمالىنا باقىلاۋدىڭ كۇشەيتىلۋى، سىنامالار الۋ كەزەڭىنىڭ ۇزارتىلۋى، سونداي-اق قازاقستان كومپانيالارىن قىتايدىڭ ەكسپورتتاۋشىلار رەەسترىنە اككرەديتتەۋ پروتسەدۋرالارىنىڭ ۇزاقتىعى. اۋىلشارۋاشىلىق ونىمدەرىنىڭ قىتايعا جەتكىزىلىم كولەمىن ارتتىرۋ ءۇشىن كارتوپ پەن قانت قىزىلشاسىنىڭ فيتوسانيتارلىق تالاپتارىنا قاتىستى حاتتامالاردى كەلىسۋ، قۇس ەتىن ەكسپورتتاۋ، قازاقستاننىڭ سولتۇستىك-باتىس جانە ورتالىق ايماقتارىنان سيىر ەتى مەن شوشقا ەتىن قىتايعا ەكسپورتتاۋعا ارنالعان شەكتەۋلەردى الىپ تاستاۋ، سالقىنداتىلعان ەت، جىلقى ەتى جانە باسقا دا ەت ونىمدەرىنە ارنالعان ۆەتەرينارلىق تالاپتاردى كەلىسۋ قاجەت بولادى.

كەزدەسۋ قورىتىندىسى بويىنشا ق ر پرەمەر-ءمينيسترىنىڭ ورىنباسارى سەرىك جۇمانعارين ماشيڭرۇيدى كەلەسى جىلى قازاقستانعا رەسمي ساپارمەن كەلۋگە شاقىردى.

ايدار وسپاناليەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى