سەرىك جۇمانعارين ق ح ر توتەنشە جانە وكىلەتتى ەلشىسى حان چۋنلينمەن كەزدەستى

سەرىك جۇمانعارين ديپلوماتتى جىلى قارسى الىپ، قازاقستانداعى جۇمىسىنىڭ باستالۋىمەن قۇتتىقتادى. ول ەلشىنىڭ، اسىرەسە، ق ح ر كوممەرتسيا مينيسترلىگىندەگى كوپ جىلدىق تاجىريبەسى ەكى ەل اراسىنداعى ستراتەگيالىق ارىپتەستىكتى نىعايتۋعا قىزمەت ەتەتىنىنە سەنىم ءبىلدىردى.

«ءبىزدىڭ ەلدەرىمىزدىڭ اراسىنداعى قارىم-قاتىناس سەنىم مەن ستراتەگيالىق ارىپتەستىكتىڭ جوعارى دەڭگەيىن كورسەتەتىن ساپالى جاڭا كەزەڭگە جەتتى. ونىڭ ۇزدىكسىز نىعايۋىنىڭ نەگىزگى قوزعاۋشى كۇشى - ەكى ەل كوشباسشىلارى اراسىنداعى جەكە دوستىق بايلانىس. قازاقستان مەن قىتاي تاتۋ كورشى، سەنىمدى ستراتەگيالىق ارىپتەس. ءبىز بارلىق نەگىزگى ءوزارا ءىس- قيمىل باعىتىندا كوپ قىرلى، تۇراقتى جانە ءتيىمدى ىنتىماقتاستىق ورناتتىق»، - دەدى ۆيتسە- پرەمەر.

كەزدەسۋ بارىسىندا ساۋدا-ەكونوميكالىق بايلانىستى دامىتۋعا ەرەكشە كوڭىل ءبولىندى. قىتاي قازاقستاننىڭ ەڭ ءىرى سىرتقى ساۋدا سەرىكتەسى بولىپ قالا بەرمەك. 2024 -جىلعى قورىتىندى بويىنشا قازاقستان مەن قىتاي اراسىنداعى تاۋار اينالىمى رەكوردتىق $43,8 ميللياردقا جەتتى. ەلەكتروندىق كوممەرتسيانى دامىتۋعا، ونىڭ ىشىندە Alibaba جانە JD.com پلاتفورمالارىندا قازاقستاننىڭ ۇلتتىق پاۆيلوندارىن ىلگەرىلەتۋگە باسا نازار اۋدارىلدى. YTO Group Express پەن قازپوشتا اراسىنداعى بىرلەسكەن پوچتا جونەلتىمى كاسىپورنىن قۇرۋداعى تابىستى ىنتىماقتاستىق تۋرالى اتاپ ءوتىلدى.

ماسەلەنىڭ تاعى ءبىر بولىگى قازاقستاندىق اۋىل شارۋاشىلىعى ءونىمىن ق ح ر نارىعىنا جەتكىزۋدى ارتتىرۋعا ارنالدى. قاتىسۋشىلار استىق تاسىمالداۋ كەزىندە تۋىندايتىن كەدەرگىلەردى، قازاقستاندىق كاسىپورىنداردى ق ح ر ەكسپورتتاۋشىلارى تىزىلىمىنە ەنگىزۋ، ۆەتەريناريالىق، فيتوسانيتاريالىق تالاپتاردى كەلىسۋ، قىتايدىڭ باس كەدەن باسقارماسىنىڭ (ب ك ب) تىزىلىمىندە قازاقستاندىق ەليەۆاتورلاردى اككرەديتتەۋ ءراسىمىنىڭ ۇزاققا سوزىلۋى ماسەلەسىن تالقىلادى. ەت ءونىمى ەكسپورتىن ۇلعايتۋ ماقساتىندا ۆيتسە- پرەمەر قازىرگى ەكسپورتتىق شەكتەۋدى الىپ تاستاۋ ءۇشىن وڭىرلەندىرۋ قاعيداتىن تانۋ مۇمكىندىگىن قاراۋدى ۇسىندى.

«سيىر ەتى مەن شوشقا ەتىن ەكسپورتتاۋشىلاردىڭ كوپشىلىگى قازاقستاننىڭ سولتۇستىك- باتىس جانە ورتالىق وبلىستارى اۋماعىندا ورنالاسقان. وندا اۋسىل بويىنشا شەكتەۋلەر ءالى دە قولدانىلادى. اۋرۋ جويىلعاننان بەرى ءبىراق ەكى جىلدان استام ۋاقىت ءوتتى. ب ك ب جۇرگىزگەن مال شارۋاشىلىعى كاسىپورىندارىنىڭ ينسپەكتسياسى مەن قازاقستاننىڭ ۆەتەريناريالىق قىزمەتى اۋديتىنىڭ قورىتىندىسى بويىنشا ءبىز، قازاقستان قابىلداعان جانۋارلاردىڭ اۋرۋىن وڭىرلەندىرۋ قاعيداتى شەڭبەرىندە، قولدانىستاعى شەكتەۋدى الىپ تاستاۋدى سۇرايمىز. بۇل قىتاي تاراپىنىڭ قازاقستاننىڭ بۇكىل اۋماعىنا ەمەس، اۋسىل اۋرۋى تىركەلگەن ناقتى وڭىرگە عانا شەكتەۋ ەنگىزۋىنە مۇمكىندىك بەرەدى»، - دەپ اتاپ ءوتتى سەرىك جۇمانعارين.

كەزدەسۋ قورىتىندىسىندا حان چۋنلين قىتاي مەن قازاقستان اراسىنداعى قارىم- قاتىناستىڭ التىن وتىز جىلدىعى جاڭا كەزەڭىنىڭ باستالۋىنا وراي قول جەتكىزىلگەن ەكىجاقتى ارىپتەستىكتىڭ جوعارى دەڭگەيىن اتاپ ءوتتى. ول سونداي- اق جاڭارتىلاتىن ەنەرگەتيكا، سيفرلىق ەكونوميكا، ا و ك جانە ەلەكتروندىق ساۋدا سالاسىنداعى جوبالاردى دامىتۋدى قوسا العاندا، ەكى ەلدىڭ ەكونوميكالىق ىنتىماقتاستىعىنىڭ جاڭا جول كارتاسى بويىنشا بىرلەسىپ جۇمىس ىستەۋگە دايىن ەكەنىن ءبىلدىردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى