سەرىك ءابىل ۇلىنا ارنالعان «ءىنىمنىڭ ءيسى» ولەڭ قالاي شىقتى
استانا. قازاقپارات - ءبىر كەشتە سەرىك ءابىل ۇلى ت. مومبەكوۆتىڭ «ساعىنىش» كۇيىن تارتا وتىرىپ قوڭىر داۋىسىمەن ولەڭدەتەدى. كۇي مەن ولەڭ قوسىلعاندا جان-جۇرەگىڭ ەزىلىپ كەتە جازدايدى. كۇي مەن ولەڭ اياقتالعاندا اۋىر مۇڭ باسقان سالماقتان ءبىر ۋاقىتقا دەيىن سەرگي الماي مۇلگىگەن تىنىشتىق ورنايدى.
سوندا سەرىك دومبىراسىن قاعىپ-قاعىپ قالىپ «اجەمنىڭ ءيىسى» دەگەن ولەڭىن وقي جونەلەدى. ەندى كوكەيدى تاعى دا ءبىر ساعىنىش كەرنەيدى. ءبىراق بۇل الدىڭعى ساعىنىش-سالتاناتتان وزگەشەلەۋ اسەرلى. الەمدى ءۇيىرىپ اكەلىپ وزەگىڭدى قارىپ تۇسەدى. كوز الدىڭا وتكەن شاقتىڭ بۇكىل سۋرەتى، سۋرەت بولعاندا ەڭ ءبىر ايدىك كورىنىستەر كىلكىپ وتەدى. ولەڭ وقىلىپ بىتكەندە مەن: «قورعاستان قاقپا اشىلسا ءىنىمنىڭ ءيىسى كەلەدى» دەپ قالعانىم. وتىرعانداي «وي، مىناۋ ولەڭ عوي، جالعاپ جىبەرىڭىز» دەستى. مەن ەرتەڭىندە «ءىنىمنىڭ ءيىسى» دەگەن مىنا ولەڭدى جازدىم.
ءىنىمنىڭ ءيىسى
(سەرىك ءابىل ۇلىنا)
باركول، ازاۋ اراسى ءبۇتىن جاتقان ەل ەدى،
جىبەكتىڭ جولىن جالعاعان جەڭگەلەردىڭ جەلەگى.
قورعاستان قاقپا اشىلسا جايىلىپ ءتوسىم جايلاۋداي،
ءيدىرىپ تاڭنىڭ ساۋلەسىن ءىنىمنىڭ ءيىسى كەلەدى.
ار جاعىنان التايدىڭ كىسىنەسەڭ شۇرقىراپ،
الاتاۋدىڭ تورىندە، ساي سۇيەگىم سىرقىراپ.
قىمىزىنداي كۇزدىكتىڭ ەرتىستىڭ سۋى ەڭكىلدەپ،
زايسانعا قۇيىپ جاتادى ساعىنىش ءيىسى بۇرقىراپ.
كوك توبەدەن كوز تىكسەم ۇلىڭگىر كولى كورىنەر.
كوز الدىمدا جوڭكيدى كوك شۋلان كوكجال، بورىلەر.
كوك ورامال شەتىنە كەستەلەپ اتىن ۇسىنعان،
مولتىلدەگەن سول جانار ولەڭ بولىپ ورىلەر.
جالتىلداعان دۇنيە بىردە شولاق، بىردە كەم،
بىرگە تۋىپ قيىن-اي، ءبىر مەكەندە جۇرمەگەن.
سەنىڭ داۋسىڭ جەتكەندە جەر ومىردەن كۇلدىرلەپ،
مەنىڭ باۋىر ەتىمدە ساعىنىشىم بۇرلەگەن.
اتا سالتى، اق تىلەك جويىلعان جوق بار عۇرىپ،
قۇداي ءوزى جاراتقان قازاعىمدى نار قىلىپ.
ازاماتىڭ بولسام دەپ الىپ ۇشقان جۇرەگىن،
ءتورت جىل قويماس تورەمىز سەندەي ۇلدى زار قىلىپ.
باۋىرىما بايلادىم ساعىنىشتىڭ اۋىرىن،
ماعان سالەم ايتتى ما، انا جاقتاعى اۋىلىم؟
كەلشى بەرى، سەرىكجان، قۇشاعىما قىسايىن،
اكەم ءيىسى كەلەدى سەنى يىسكەسەم، باۋىرىم!
اكەم يىسى كەلەدى سەنى يىسكەسەم، باۋىرىم!
باقىتبەك ءبامىش ۇلى
2014- جىل
الماتى قالاسى
