سەربيا رەسپۋبليكاسى سۋ تاسقىنىنان قيراعان باسپانا قۇرىلىسىنا 1 ميلليون ەۋرو ءبولدى
استانا. KAZINFORM - «قازاقستان حالقىنا» قورىنىڭ ەسەپشوتىنا سەربيا ۇكىمەتىنەن سۋ تاسقىننان زارداپ شەككەن اۋدانداردا ءۇي سالۋعا 1 ميلليون ەۋرو ءتۇستى. بۇل شەشىم ەكى ەل اراسىنداعى ۇزاق مەرزىمدى سەرىكتەستىك پەن دوستىقتىڭ سيمۆولى بولىپ تابىلادى. بۇل تۋرالى قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىنەن ءمالىم ەتتى.
«بۇل جاردەم ەكى ەل اراسىنداعى ىنتىماق دەڭگەيىن كورسەتەدى جانە شەتەلدىك دونورلاردىڭ ءبىزدىڭ قىزمەتىمىزگە ارتىپ كەلە جاتقان سەنىمى مەن كومەكتى بولۋدەگى اشىقتىقتى كورسەتەدى»، - دەدى «قازاقستان حالقىنا» قورىنىڭ باسقارما ءتوراعاسى بولات جامىشيەۆ.
جالپى، 2024 -جىلدىڭ 10 -مامىرداعى جاعداي بويىنشا تابيعي اپاتتان قيراعان تۇرعىن ۇيلەردى سالۋعا قوردان بولىنگەن 10 ميلليارد تەڭگەدەن بولەك قوسىمشا 5,3 ميلليارد تەڭگە جينالدى.
2024 -جىلعى 6 -مامىردا ەكى ەلدىڭ باسشىسى قاسىم-جومارت توقايەۆ پەن الەكساندر ۆۋچيچ تەلەفون ارقىلى سويلەسكەن بولاتىن. پرەزيدەنتتەر ەكىجاقتى ىنتىماقتاستىقتى جانداندىرۋ، بۇرىن قول جەتكىزىلگەن كەلىسىمدەردى جۇزەگە اسىرۋ جانە قازاقستان پرەزيدەنتىنىڭ بەلگرادقا الداعى ساپارىن ۇيىمداستىرۋ ماسەلەلەرىن تالقىلادى.
قازاقستان 2014 -جىلى الاپات سۋ تاسقىنىنا بايلانىستى سەربياعا شاتىر، ءدارى-دارمەك پەن ەڭ قاجەتتى زاتتاردى جىبەرىپ، گۋمانيتارلىق كومەك كورسەتكەن ەدى.
اۆتور
ەلميرا ورالبايەۆا
