ەسەنين ىشسە، ءبىر نارسە تىندىرىپ بارىپ ىشكەن - قادىر مىرزا ءالى
استانا. قازاقپارات - ءبىز سىزدەردىڭ نازارلارىڭىزعا قازاق پوەزياسىنىڭ پىراعى، اقىن قادىر مىرزا ءالىنىڭ كەيبىر قاناتتى سوزدەردى بۇگىنگى كۇنگە ىڭعايلاپ، ءوز پايىمىنا سالا وزگەرتىپ ايتقان سوزدەرىنىڭ بىرنەشەۋىن بەرۋدى ءجون سانادىق.
- تۋعاندا اياق-قولىڭ بالعاداي ساپ-ساۋ بولىپ تۋعانمەن، ەرتەڭ كىم بولارىڭدى ءبىر قۇداي عانا بىلەدى.
- اكەلەتىن ءومىر دە، اكەتەتىن ءولىم دەپ ويلايمىز، جوق، مەنىڭشە ءولىم -ءومىردىڭ ءوزى.
- ادامدى اۋىرتاتىن دا، ولتىرەتىن دە سول ءومىر!
- ول تەك قۇجاتتارعا عانا ءولىم دەپ قول قويا سالادى!
- ولىمنەن قورقاتىن ەشتەڭە جوق، ومىردەن قورىق!
- اقىن - ءوزىنىڭ ىشكى دەرتىن، جان اۋرۋىن ىنجۋگە اينالدىراتىن جۇمباق جان.
- دەگەنمەن اراقتىڭ ىستەمەيتىنى جوق، دالىرەك ايتساق، ىستەتپەيتىنى جوق.
- بۇكىل اقىن اتاۋلىنى ماسكۇنەم عىپ كورسەتۋ - ماقسات ەمەس. مەندە ونداي وي جوق. ال ەندى ىشپەيتىن اقىن تاعى از.
- قايسىبىر اقىندار ءۇشىن داستۇرگە اينالعان داۋاسىز دەرت. ودان زارداپ شەكپەگەن باقىتتى ادەبيەت بار ما ەكەن؟
- ءىشىپ جۇرگەن ونىڭدى كورگەن حالىق ون ءبىرىنشىڭدى سول وننىڭ قاتارىنا قالاي بولسا سولاي قوسا سالادى.
- اراق ادامنىڭ شىڭىراۋىنداعىسىن شىعارىپ، تەرەڭدە جاتقان دۇلەيىن وياتادى.
- جىننىڭ مومىنى بولمايدى.
- ەسەنين ىشسە، ءبىر نارسە تىندىرىپ بارىپ ىشكەن. ال بىرەۋلەر ءىشىپ الىپ بىردەڭە تىندىرماق. تىنا قويار ما ەكەن!
- ءبىر كەزدەرى كوشىپ-قونۋدان الدىمىزعا جان سالماساق، ەندى ىشۋدەن دە وزىپ كەتە جازداعان جاعدايلارىمىز جوق ەمەس.
- سوعىسقا بەرگەن تالانتتان ىشىمدىككە بەرگەن تالانتىمىز الدەقايدا كوبىرەك دەسەك قاتەلەسە قويار ما ەكەنبىز؟
- اراق قازاق ءۇشىن جاڭا دەرت. جاڭا جاۋ. وعان ءبىزدىڭ ۋىز ورگانيزمىمىز قارسى تۇرىپ ۇيرەنبەگەن. يممۋنيتەت مۇلدەم جوق. كارى-جاسىمىزعا قاراماي قىرىپ كەتەتىن ءتۇرى بار.
- جىبەك جولىن ءشوپ باستى.
- ەۋروپا ونداعان حالىقتى وتارلاسا، تەمەكى مەن ەسىرتكى ەۋروپانى وتارلادى.
- وتارلانعان ەلدەر ەۋروپا تەپكىسىنەن قۇتىلدى، ال تەمەكى مەن ەسىرتكى ەۋروپادا ماڭگى قالىپ قويدى.
- قاراقشىلار اپارعان ءورت ءوشتى، اكەتكەن دەرت قاندارىنا ءسىڭدى.
- حايۋاندار عانا ەمەس، ادامدار دا تۇلەيدى
- باسقاعا ەلىكتەسە دە ادام ولىمگە ەلىكتەمەۋى ءتيىس.
- ميعا كىرگەن وي، شوڭگەدەن دە جامان.
- ومىرگە كەلۋدىڭ ءبىر-اق سەبەبى بولسا، ومىردەن كەتۋدىڭ ونداعان سەبەبى بار.
- ولىمنەن دە اۋىر ءيت ءومىر كىمگە كەرەك؟!
«الاش ايناسى»
