سەنىمدى قاجىلىق. الاياق تۋرفيرمالارعا قالاي تاپ بولماۋعا بولادى
استانا. KAZINFORM – ءى ءى م تۋرفيرمالار ارقىلى ۇمرا مەن قاجىلىققا بارۋ كەزىندە قالاي الاياقتىقتىڭ الدىن الۋعا بولاتىنىن ايتىپ بەردى.
- قازاقستان ءى ءى م ازاماتتارعا ۇمرا مەن قاجىلىقتى تۋرفيرمالار ارقىلى ۇيىمداستىرۋ كەزىندە كەزدەسۋى مۇمكىن الاياقتىق تۋرالى ەسكەرتەدى. قاسيەتتى ساپاردى ۇيىمداستىرۋدا سەنىمدى كومپانيانى تاڭداۋ ماڭىزدى، - دەپ اتاپ ءوتتى ۆەدومستۆو باسپا ءسوز قىزمەتى.
الاياقتاردىڭ ايلاسىنا ءتۇسىپ، اقشادان ايىرىلىپ قالماس ءۇشىن تومەندەگى ساقتىق شارالارىن ۇستانۋ قاجەت:
- فيرمانىڭ ليتسەنزياسىن جانە ول تۋرالى پىكىرلەردى تەكسەرىڭىز. مۇنداي ساپارلاردى ۇيىمداستىرۋمەن اينالىساتىن رەسمي تۋريستىك فيرمالاردىڭ مەملەكەتتىك ليتسەنزياسى بولۋى كەرەك. كليەنتتەردىڭ پىكىرلەرىن زەرتتەڭىز. تۋروپەراتورلار ءار تۋريستكە تۋركود ۇسىنۋى ءتيىس.
- تىم تومەن باعاعا قىزىعىپ، الدانىپ قالماڭىز. ەگەر ءسىزدى تومەن باعامەن قىزىقتىرسا، اسىقپاڭىز، مۇنداي ۇسىنىستار كوبىنەسە الاياقتىقپەن بايلانىستى بولۋى مۇمكىن. ءتۇرلى تۋرفيرمالاردىڭ باعالارىن سالىستىرىپ، ولاردىڭ نارىقتىق باعاعا سايكەستىگىن انىقتاپ العانىڭىز ءجون.
- قۇجاتتار مەن كەلىسىمشارتتى تەكسەرىڭىز. بارلىق كەلىسىمشارتتاردى مۇقيات وقىپ شىعىڭىز. ءاربىر تارماققا ءجىتى نازار اۋدارىڭىز، بۇل كەلەڭسىز جاعدايلاردىڭ الدىن الۋعا كومەكتەسەدى. ەگەر سىزگە ءبىر نارسە تۇسىنىكسىز بولسا، مامانمەن كەڭەسۋدى ۇمىتپاڭىز.
- بايلانىس دەرەكتەرىنە نازار اۋدارىڭىز. سەنىمدى تۋرفيرمانىڭ ءارقاشان بايلانىس تەلەفونى، ەلەكتروندى پوشتاسى جانە ناقتى مەكەنجايى بولادى. الاياقتار كوبىنەسە بايلانىس دەرەكتەرىن كورسەتپەي، ۆيرتۋالدى پاراقشالاردىڭ ارتىندا جاسىرىنۋى مۇمكىن.
- تۋر باعدارلاماسىن مۇقيات زەردەلەڭىز. تۋردىڭ قۇنىنا نە كىرەتىنىن انىقتاڭىز (ۇشۋ، تۇرعىن ءۇي، كولىك، تاماقتانۋ، مەديتسينالىق ساقتاندىرۋ جانە باسقا قىزمەتتەر). بارلىق قاجەتتى شىعىنداردىڭ ەسكەرىلگەنىنە جانە كەزدەيسوق تولەمدەردىڭ بولمايتىنىنا كوز جەتكىزىڭىز.
وسىعان دەيىن الماتىدا قاجىلىققا بايلانىستى 180 ادامدى الداعان كۇدىكتىگە بايلانىستى تەرگەۋ ءجۇرىپ جاتقانىن جازدىق.
