سەناتورلار شالعاي ەلدىمەكەندەردى ارالايدى
استانا. KAZINFORM - بۇگىن سەنات سپيكەرى ماۋلەن اشىمبايەۆتىڭ توراعالىعىمەن پالاتا بيۋروسىنىڭ وتىرىسى ءوتتى. بۇل تۋرالى سەناتتىڭ باسپا ءسوز قىزمەتى ءمالىم ەتتى.
وندا 26- جەلتوقسان كۇنى وتەتىن سەنات وتىرىسىنىڭ كۇن ءتارتىبى بەكىتىلدى جانە دەپۋتاتتاردىڭ وڭىرلەرگە باراتىن ساپارلارىنا قاتىستى ماسەلەلەر تالقىلاندى.
ءىس- شارا بارىسىندا ماۋلەن اشىمبايەۆ جاقىن كۇندەرى سەناتورلاردىڭ وڭىرلەرگە ساپارلارى باستالاتىنىن اتاپ ءوتتى. وسىعان بايلانىستى ول بارلىق مۇددەلى تاراپتىڭ كەشەندى كوزقاراسىن تالاپ ەتەتىن جۇمىستىڭ نەگىزگى باعىتتارى مەن مىندەتتەرىنە توقتالدى.
- دەپۋتاتتاردىڭ وڭىرلەرگە ساپارىنىڭ باستى ماقساتى - ازاماتتاردى الاڭداتىپ وتىرعان وزەكتى ماسەلەلەرگە باسا نازار اۋدارۋ جانە سول پروبلەمالاردىڭ وڭ شەشىلۋىنە اتسالىسۋ. ساپار كەزىندە شالعاي ەلدىمەكەندەردىڭ تۇرعىندارىمەن، قاراپايىم ەڭبەك ادامدارىمەن جانە شارۋالارمەن كەزدەسكەن ابزال. كەزدەسۋلەر بارىسىندا ەلىمىزدە جۇرگىزىلىپ جاتقان رەفورمالاردىڭ ماڭىزىن جانە پارلامەنت قابىلداعان زاڭداردىڭ نەگىزگى ەرەجەلەرىن دە جان-جاقتى ءتۇسىندىرۋ قاجەت، - دەدى سەنات ءتوراعاسى.
سونداي-اق دەپۋتاتتار سەنات وتىرىسىنىڭ كۇن ءتارتىبىن بەكىتتى. سوعان سايكەس الداعى بەيسەنبىدە بولاتىن جىلدىڭ قورىتىندى وتىرىسىندا سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى قارايدى. سونىمەن بىرگە «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ دا قارالادى. زاڭ ارقىلى قوعامدىق جۇمىستارعا تارتۋ تۇرىندە اكىمشىلىك جازا ەنگىزىلەدى جانە ونى ورىنداۋ تەتىگى ايقىندالادى.
بۇدان باسقا، بيۋرو وتىرىسىندا ماجىلىستەن كەلىپ تۇسكەن زاڭدار جۇمىس ءۇشىن سەناتتىڭ تۇراقتى كوميتەتتەرىنە ءبولىنىپ بەرىلدى.
ەسكە سالا كەتەيىك، بۇعان دەيىن سەنات سينگاپۋرمەن اراداعى الىس-بەرىستىڭ باج سالىعىن جەڭىلدەتەتىن زاڭدى ماقۇلداعانىن جازعان بولاتىنبىز.
باقىتگۇل اباي قىزى
اۆتور
