سەناتور قازاقستاندا ۋتيلالىم سوماسىن ازايتۋدى ۇسىندى

بۇل تۇرعىدا سەناتتىڭ جالپى وتىرىسىندا دەپۋتات بەكبول ورىنباساروۆ ەلىمىزدىڭ اۆتوپاركىن جاڭارتۋداعى پروبلەمالاردى جاريا ەتتى.

سەناتوردىڭ ايتۋىنشا، دەپۋتاتتارعا كەدەندىك الىمدار، كادەگە جاراتۋ تولەمدەرىنىڭ مولشەرى مەن يمپورتپەن كەلەتىن اۆتوموبيلدەردى تىركەۋ تۋرالى ازاماتتاردىڭ وتىنىشتەرى ۇنەمى كەلىپ تۇرادى. سەناتورلار ۇكىمەتكە بىرنەشە رەت دەپۋتاتتىق ساۋال جىبەرگەن بولاتىن، الايدا ناقتى ەكونوميكالىق مىندەتتەرگە، عىلىمي تۇجىرىمدارعا سۇيەنگەن جانە ەكى تاراپتى دا قاناعاتتاندىراتىن شەشىم ءالى تابىلعان جوق. ناتيجەسىندە قاراپايىم قازاقستاندىقتارعا اۆتوموبيل ساتىپ الۋ قيىنداپ بارادى.

دەپۋتات اۆتوكولىك الۋعا جەڭىلدەتىلگەن نەسيە بەرۋ باعدارلاماسى حالىقتى جاڭا اۆتوموبيلدەرمەن قامتاماسىز ەتۋ ماقساتىن ورىنداي الماعانىن، ال جاڭا جانە ساپالى اۆتوموبيلدەرگە قول جەتكىزۋدىڭ قيىندىعى ماشينانى ەسەپكە قويۋداعى زاڭسىزدىقتىڭ كوبەيۋىنە سەبەپ بولعانىن اتاپ ءوتتى.

سەناتور ازاماتتاردان تۇسكەن شاعىمداردى تالداۋ نەگىزىندە ۇكىمەت باسشىسىنا ۋتيلالىم قۇنىن تومەندەتۋدى، كەدەندىك باجدى جانە اۆتوموبيلدى تىركەگەنى ءۇشىن الىم مولشەرىن ازايتۋدى ۇسىندى.

«قوزعالتقىش كولەمى ەكى مىڭ تەكشە سانتيمەترگە دەيىنگى، شىققانىنا 3 جىلدان اسپاعان اۆتوموبيلدەر ءۇشىن ۋتيلالىم مولشەرىن 150000 تەڭگەدەن اسپايتىنداي ەتىپ قايتا قاراۋدى سۇرايمىن. كەدەندىك باجدى ەسەپتەۋ كەزىندە ونىڭ كورسەتكىشىن ازايتۋ جاعىنا قاراي قايتا قاراۋ كەرەك. قازىرگى كەزدە اۆتوكولىكتەردىڭ ءبىرازىن قىتايدان قازاقستانعا قىرعىز رەسپۋبليكاسى ارقىلى اكەلىنەتىن فاكتىلەر بار. ويتكەنى اۆتوكولىك يەلەرى ق ق س پەن باجدى ءبىزدىڭ مەملەكەتىمىزگە قاراعاندا بىرنەشە ەسە از تولەيدى. شىعارىلعان جىلىن قوسا العاندا، بەس جىلعا دەيىن كولىك قۇرالدارىن مەملەكەتتىك تىركەگەنى ءۇشىن الىم مولشەرلەمەسىن 0,25 اەك كولەمىندە قاراستىرۋدى ۇسىنامىن. اتالعان ۇسىنىستار قازاقستان ازاماتتارىنا ساپالى جانە باعاسى ءتيىمدى اۆتوكولىكتەردى الۋعا مۇمكىندىك بەرەدى دەپ سەنەمىز»، - دەدى بەكبول ورىنباساروۆ ۇكىمەت باسشىسى ولجاس بەكتەنوۆتىڭ اتىنا جولداعان ساۋالىندا.

ايتا كەتەيىك، جاقىندا ونەركاسىپ جانە قۇرىلىس ءمينيسترى قانات شارلاپايەۆ ەلىمىزدە ۋتيلالىمعا قاتىستى ەشقانداي وزگەرىس بولمايتىنىن ءمالىم ەتتى.

اۆتور

رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى