سەناتور مەملەكەتتىك تاپسىرىسپەن جارىق كورەتىن فيلمنىڭ ءبارىن قازاقشا ءتۇسىرۋدى ۇسىندى
استانا. KAZINFORM - سەناتور رۋسلان رۇستەموۆ پرەمەر-مينيستر ولجاس بەكتەنوۆكە ەلدەگى كينو ءتىلىن قازاقتاندىرۋ تۋرالى دەپۋتاتتىق ساۋال جولداپ، كينو ءتۇسىرۋ كاسىبىنە ليتسەنزيا ورناتۋدى ۇسىندى.
- كينو دۇرىس ماقساتتا پايدالانىلسا، ۇلتتى بىرىكتىرەتىن قۇرالعا، بۇرىس ماقساتتا پايدالانسا، اتوم بومباسىنان دا قاۋىپتى قارۋعا اينالاتىنى ءسوزسىز. سول سەبەپتەن قازىرگى قازاق كينوسىنا، كوركەم فيلمدەردەگى الەۋمەتتىك-لينگۆيستيكالىق ماسەلەلەرگە بەيجاي قاراۋعا بولمايدى. قازاقشا كينونىڭ ءتىلى كوركەم، شۇرايلى، انا تىلىمىزدە ءسوز ساپتاۋ ۇلگىسىنە لايىق بولۋعا ءتيىس. كەڭەس زامانىنىڭ وزىندە قازاق فيلمدەرى وسى تالاپقا جاۋاپ بەردى. وكىنىشكە قاراي، قازىرگى قازاق كينوسىنىڭ ءتىلى تۋرالى جاعىمسىز پىكىرلەر، قارسىلىققا تولى اشۋ-ىزا بەلەڭ الدى. قازىرگى قازاق كينوسىندا ءتىل ماسەلەسى تىم وزەكتى. سەبەبى اتاۋى قازاقشا بولعانمەن، كەيىپكەرلەرى تازا قازاق تىلدە سويلەمەيتىن، ءتىلى الاشۇبار، جەڭىل ءازىل مەن ارزان كۇلكىگە قۇرىلعان، انايى سوزدەر مەن ازعىندىققا تولى فيلمدەردىڭ كوبەيۋى وتە قاۋىپتى. بۇل ءۇردىس وسىلاي جالعاسا بەرسە، تاياۋ ۋاقىتتا قازاق تىلىندە تۇسىرىلگەن كينونى تاپپاي قالۋىمىز دا مۇمكىن، - دەلىنگەن ساۋالدا.
دەپۋتات ءتىلى شۇبار فيلمدەر قازاق ءتىلىنىڭ تابيعي دامۋ ۇدەرىسىن كەرى باعىتقا بۇرىپ بارا جاتقانىن ايتادى.
- تازا قازاق تىلىندە جازىلماعان، شەتەلدىك جات ۇعىمداعى سەناريدەن تۇسىرىلگەن، كوركەمدىك دەڭگەيى ۇلتتىق تانىمىمىزبەن سايكەسپەيتىن، جات مادەنيەتتىڭ كودىمەن سويلەيتىن، كەيىپكەرىنىڭ اتى مەن تۇرىنەن باسقا قازاقتىڭ ءوزى جوق. كوركەم فيلمدەر وسكەلەڭ ۇرپاقتىڭ رۋحانيى تالعامىنا كەرى اسەر ەتىپ جاتىر. ارالاس ءتىل ۇرپاقتان-ۇرپاققا بەرىلگەن سايىن انا ءتىلىنىڭ ءرولىن اتقارىپ، ءتىلدىڭ باستاپقى قۇرىلىمى وزگەرىسكە ۇشىرايدى. وسىلايشا قازاق ءتىلى تازا نۇسقاسىنان الىستاپ، كۇردەلى تىلدىك نورمالارىن جوعالتۋى مۇمكىن. مۇنداي جاعىمسىز جاعداي قازاقشا ۇيرەنگىسى كەلگەندەردىڭ دە داعدىلارىنا تەرىس ىقپال ەتەدى، - دەدى ول.
رۋسلان رۇستەموۆ شەتەلدىك فيلمدەردىڭ پروكاتىنان تۇسەتىن سالىقتى ۇلتتىق كينوعا باعىتتاۋ كەرەك دەپ ەسەپتەيدى.
- وتاندىق كينو ونىمدەرىنە ادەبي-يدەولوگيالىق تۇرعىدان ناقتى باقىلاۋ ورناتۋ ءۇشىن كينو ءتۇسىرۋ ءىسىن مەملەكەتتىك ليتسەنزيالاۋدى ۇسىنامىز. قازاق تىلىندە كينو تۇسىرۋشىلەرگە ارنايى ءتىل كۋرستارىن وتكىزىپ، ءار جاڭا فيلم تۋرالى كاسىبي مامانداردىڭ سىني پىكىرلەرىن جاريالايتىن ارنايى جۋرنالدار شىعارۋ قاجەت. شەتەل كينوسىنىڭ پروكاتىنان تۇسكەن سالىقتىڭ بەلگىلى ءبىر بولىگىن ۇلتتىق كينونى دامىتۋعا جۇمساۋدى، مەملەكەت تاپسىرىسىن اياسىنداعى فيلمنىڭ ءبارىن تەك مەملەكەتتىك تىلدە تۇسىرۋگە زاڭمەن مىندەتتەۋدى ۇسىنامىز، - دەدى سەناتور.
