سەناتور ۇلتتىق قۇندىلىقتاردى ىلگەرىلەتۋگە قاراجات ءبولۋدى سۇرادى
ۇكىمەت سەناتورلاردىڭ ۇلتتىق قۇندىلىقتاردى ىلگەرىلەتۋگە باعىتتالعان ۇسىنىمدارىن ەلەمەي كەلەدى.
بۇل تۋرالى سەناتتىڭ جالپى وتىرىسىندا دەپۋتات نۇرتورە ءجۇسىپ ايتتى، دەپ حابارلايدى Kazinform.
دەپۋتات ۇلتتىق قۇندىلىقتاردى ىلگەرىلەتۋ جونىندە سەناتتا ايتارلىقتاي جۇمىس جۇرگىزىلىپ جاتقانىن اتاپ ءوتتى. وسى ماقساتتا سەناتتا كەيىنگى ەكى جىلدا 2 پارلامەنتتىك تىڭداۋ، 3 دوڭگەلەك ۇستەل، 3 كەزدەسۋ، 3 كوميتەتتىڭ كەڭەيتىلگەن وتىرىسى وتكىزىلدى. سونىمەن قاتار، ءداستۇرلى مادەنيەتكە، ءتول تاريحىمىزعا، وتباسى ينستيتۋتىن نىعايتۋعا، بۇقارالىق اقپارات قۇرالدارىنداعى يدەولوگيالىق اعارتۋشىلىقتى كۇشەيتۋگە قاتىستى 10 دەپۋتاتتىق ساۋال جولداندى.
«الايدا، ۇكىمەت سەناتتىڭ ۇسىنىمدارىنا تەك ءبىرىڭعاي سىرعىتپا جاۋاپ بەرىپ كەلەدى. بەرىلگەن ۇسىنىمدار ەسكەرىلە بەرمەيدى. سوندا ءبىز بۇل ماسەلەلەردى قاشانعى ءسوز ەتە بەرەمىز؟ ماسەلەن، «ينتەرنەت جەلىلەردە جانە ەلىمىزدەگى بۇقارالىق اقپارات قۇرالدارىندا ۇلتتىق رۋحانياتقا جات، تەرىس قۇندىلىقتاردى دارىپتەيتىن اقپاراتتارعا تۇراقتى تۇردە تالدامالىق شولۋ جاساپ، ۇلتتىق بايانداما ازىرلەۋ جانە ونى مەملەكەتتىك باسقارۋ ينستيتۋتتارىنا جولداۋ» جونىندەگى ۇسىنىم نازاردان مۇلدەم تىس قالدى»، - دەدى ن. ءجۇسىپ ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.
دەپۋتات جاقىندا سەناتتا «ۇلتتىق مۇددە» ديالوگ الاڭىنىڭ كەزەكتى وتىرىسى وتكەنىن، وندا دا وسى ماسەلەلەر جان- جاقتى تالقىلانعانىن ەسكە سالدى.
ونىڭ پايىمىنشا، «قازاقستان حالقىنا» قورى مەن مەملەكەتكە قايتارىلاتىن اكتيۆتەردەن تۇسكەن قارجى الەۋمەتتىك جوبالاردى عانا ەمەس، ۇلتتىق قۇندىلىقتاردى ىلگەرىلەتۋگە باعىتتالعان جوبالاردى دا قارجىلاندىرۋى ءتيىس.
دەپۋتات ءسوزىنىڭ سوڭىندا سەناتتىڭ جوعارىدا كورسەتىلگەن ۇسىنىمدارىنىڭ ىسكە اسۋىن جان- جاقتى تالداۋ ءۇشىن ۇكىمەت باسشىسىنان پالاتانىڭ وتىرىسىنا جاۋاپتى ۆيتسە- پرەمەردى جىبەرۋدى سۇرادى.
