سەناتور ازاماتتىق اۆياتسياداعى ماسەلەلەردى اتادى
استانا. KAZINFORM - بۇگىن سەناتتىڭ جالپى وتىرىسىندا دەپۋتات نۇرتورە ءجۇسىپ ءوزىنىڭ دەپۋتاتتىق ساۋالىندا ۇكىمەتكە ازاماتتىق اۆياتسيانىڭ نەگىزگى پروبلەمالارىنا ەرەكشە نازار اۋدارۋدى ۇسىندى.
ول وسى سالانىڭ قاۋىپسىزدىگى مەن باسەكەگە قابىلەتتىلىگىن ارتتىرۋعا باعىتتالعان كەشەندى شارالار ازىرلەۋ جانە ىسكە اسىرۋ ءۇشىن كولىك مينيسترلىگى مەن عىلىم جانە جوعارى ءبىلىم مينيسترلىگى ءوزارا تىعىز ءىس-قيمىل جاساۋ قاجەت ەكەنىن اتاپ ءوتتى.
- اۋەجايلاردىڭ ينفراقۇرىلىمىنىڭ السىزدىگى، بيۋدجەتتىك تاسىمالداۋشىلاردىڭ ىشكى نارىقتاعى ۇسىنىستارىنىڭ جەتكىلىكسىزدىگى، جانارماي باعاسىنىڭ جانە ۇشۋ بيلەتتەرىنىڭ قىمباتتىعى سياقتى كەشەندى پروبلەمالار جەتكىلىكتى. وسىلاردىڭ ىشىندە ەڭ ماڭىزدىسىنىڭ ءبىرى - ازاماتتىق اۆياتسيا سالاسىندا حالىقارالىق تالاپتارعا ساي كەلەتىن مامانداردى ازىرلەۋ ماسەلەسى. سيفرلاندىرۋدى، جاساندى ينتەللەكتىنى جانە پيلوتسىز جۇيەلەردى قوسا العاندا، تەحنولوگيالاردىڭ قارقىندى دامۋى سالانىڭ سەرپىندى وزگەرىستەرىنە بەيىمدەلە الاتىن وزىق ويلى كادرلاردى دايارلاۋدى تالاپ ەتىپ وتىر. مامانداردى دايارلاۋدىڭ جوعارى دەڭگەيىن قامتاماسىز ەتۋ ءۇشىن الەمدىك ستاندارتتار مەن وزىق تاجىريبەلەرگە سايكەس اكادەميانىڭ ينفراقۇرىلىمىن دامىتۋ اسا قاجەت، - دەدى نۇرتورە ءجۇسىپ ۇكىمەت باسشىسى ولجاس بەكتەنوۆتىڭ اتىنا جولداعان ساۋالىندا.
دەپۋتات جاعدايدى جاقسارتۋ ءۇشىن ءبىرقاتار ناقتى شارالاردى ۇسىندى. اتاپ ايتقاندا، بۇل EASA ستاندارتتارى بويىنشا ازاماتتىق اۆياتسيا اكادەمياسىن سەرتيفيكاتتاۋ جانە ۋاقىت تالابىنا جاۋاپ بەرەتىن مامانداردى دايارلاۋ ءۇشىن ۇشقىشسىز اۆياتسيا ورتالىعىن قۇرۋ تۋرالى.
- اكادەمياعا مامانداندىرىلعان جابدىقتارى بار جەكە اەرودروم سالۋ، وقۋ-زەرتحانالىق بازانى جاڭارتۋ جانە كەڭەيتۋ بويىنشا جوبالاردى ىسكە اسىرۋ، زاماناۋي ترەناجەرلارمەن جاراقتاندىرۋ قاجەت. اۆياتسيا سالاسىنىڭ باسەكەگە قابىلەتتىلىگىن ارتتىرۋ ماڭىزدى. ول ءۇشىن نىسانالى قارجىلاندىرۋ نورماسىن ەنگىزۋدى قاراستىرۋ قاجەت. مۇنداي پراكتيكا بىزدە بولعان. ءبىز عىلىمدى قارجىلاندىرۋدا قازاقستانداعى جەر قويناۋىن پايدالانۋشىلاردى وندىرۋگە جۇمسالعان ءوز شىعىندارىنىڭ عىلىمي-زەرتتەۋ جانە تاجىريبەلىك- كونسترۋكتورلىق جۇمىستارعا ءبولۋىن مىندەتتەگەن بولاتىنبىز. اكادەميانىڭ ەلدىڭ اۆياتسيا سالاسىنىڭ قاۋىپسىزدىگى مەن باسەكەگە قابىلەتتىلىگىن قامتاماسىز ەتەتىن كادرلاردى دايارلاۋدىڭ ستراتەگيالىق ورتالىعى رەتىندەگى ءرولىن كۇشەيتۋ ءۇشىن وعان ەرەكشە مارتەبە بەرۋ ماسەلەسىن قاراستىرۋ قاجەت دەپ ويلايمىن»، - دەدى سەناتور.
بۇدان بۇرىن حابارلانعانداي، بۇگىن سەناتتىڭ جالپى وتىرىسىندا ەۋروپا قايتا قۇرۋ جانە دامۋ بانكىنە قاتىستى ەكى قۇجات ماقۇلداندى.
سونداي-اق 2030 -جىلعا دەيىن كولىك ينفراقۇرىلىمىن جاقسارتۋعا 9 تريلليوننان استام تەڭگە ينۆەستيسيا سالىناتىنى ايتىلدى.
