سەناتور اسكەري كافەدرالار تۋرالى: اسكەريلەردى دايىنداۋدا جاڭا ءتاسىل كەرەك

دەپۋتاتتىڭ سوزىنە قاراعاندا، قازىرگى كەزدە قازاقستاندا 41 اسكەري كافەدرا جۇمىس ىستەپ تۇر. ولاردا جىل سايىن 21 مىڭنان استام ستۋدەنت 85 اسكەري-ەسەپتىك ماماندىق بويىنشا ءبىلىم الادى.

ولاردىڭ تەك از عانا بولىگى كيبەرقاۋىپسىزدىك، گەواقپاراتتىق جۇيەلەر جانە اۆتوماتتاندىرىلعان باسقارۋ جۇيەلەرى سياقتى اسا ماڭىزدى جانە تاپشى ماماندىقتى مەڭگەرەدى.

- بۇگىنگى كۇنى ازاماتتىق جوعارى وقۋ ورىندارىنىڭ رەكتورلارى اسكەري كافەدرالاردا اسكەري دايىندىقتان وتكەن رەزەرۆتى دايىنداۋ ءۇشىن زاپاستاعى جانە وتستاۆكاداعى وفيتسەرلەردى جۇمىسقا قابىلدايدى. مۇنداي ءتاسىل ءتيىستى اسكەري مەكەمەدەن تىس شەشىم قابىلداۋعا الىپ كەلۋى مۇمكىن. بۇل تۇرعىدا وقىتۋشىلارعا قويىلاتىن كاسىبي تالاپتاردى باقىلاۋ شەكتەلۋى ىقتيمال. سونىمەن قاتار، وندا ناقتى اسكەري ءبىلىم بەرۋ تالابىنا ەمەس، اكىمشىلىك نەمەسە ەكونوميكالىق مۇددەگە باسىمدىق بەرىلۋى مۇمكىن، - دەدى سەناتور لۋكين ۇكىمەت باسشىسى ولجاس بەكتەنوۆتىڭ اتىنا جولداعان ساۋالىندا.

سەناتور قازاقستاندىق ستۋدەنتتەر شەتەلدىك ازاماتتىق جوعارى وقۋ ورىندارىندا ءبىلىم الىپ ءجۇرىپ، «سول ەلدەردىڭ اسكەري كافەدرالارىندا دايىندىقتان ءوتۋ مۇمكىندىگىنەن ايىرىلعانىن» اتاپ ءوتتى. بۇل ولاردىڭ حالىقارالىق اسكەري قاۋىمداستىققا كىرىگۋىنە جانە تاجىريبە الماسۋىنا كەدەرگى كەلتىرەدى.

ا. لۋكين وسى ماسەلەلەردى شەشۋ ءۇشىن قىزمەت ەتۋشى وفيتسەرلەردى اسكەري كافەدرالاردا مىندەتتى تۇردە روتاتسيالاۋ تالاپتارىن ەنگىزۋدى جانە وقىتۋشىلاردى جۇيەلى تۇردە اتتەستاتسيادان وتكىزۋ جۇيەسىن ەنگىزۋدى ۇسىندى.

- وقىتۋشىلاردىڭ قۇزىرەتى ولاردىڭ ماماندىقتارىنا سايكەس بولۋى زاڭمەن بەكىتىلۋى ءتيىس. قازىرگى زامانعى قاۋىپ- قاتەرگە بەيىمدەلگەن ناقتى باعىتتاعى ءبىلىم بەرۋ باعدارلامالارىن ەنگىزۋ قاجەت. سونىمەن قاتار، شەتەلدىك ازاماتتىق جوعارى وقۋ ورىندارىندا وقيتىن قازاقستاندىق ستۋدەنتتەردىڭ سول ەلدەردەگى اسكەري كافەدرالاردا دايىندىقتان وتۋىنە مۇمكىندىك بەرەتىن ءتيىستى كەلىسىم جاساۋدى قاراستىرۋ كەرەك، - دەدى دەپۋتات.

رۋسلان عابباسوۆ

اۆتور

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى