سەنات تەكسەرۋشى مەملەكەتتىك ورگاننىڭ قۇقىعىنا قاتىستى قۇجاتتى ماجىلىسكە قايتاردى
استانا. KAZINFORM - بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اقپاراتقا قول جەتكىزۋ، قوعامدىق قاتىسۋ، مەملەكەتتىك ناگرادالار جانە ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكى وقىلىمدا قارالدى.
سەنات زاڭنىڭ جەكەلەگەن باپتارىن جاڭا رەداكسيادا ۇسىنىپ، ونى ماجىلىسكە قايتاردى.
زاڭدى قابىلداۋداعى نەگىزگى ماقسات - قوعامنىڭ تالاپ تىلەكتەرىن ەسكەرە وتىرىپ، مەملەكەتتىك ورگانداردىڭ اشىقتىعىن قامتاماسىز ەتۋ، مەملەكەتتىك ورگانداردىڭ رەسمي اقپاراتتارىن پرواكتيۆتى تاراتۋدى قامتاماسىز ەتۋ، مۇگەدەكتىگى بار ادامداردىڭ اقپاراتقا قول جەتىمدىلىگىن ارتتىرۋ.
زاڭ اياسىندا «اكىمشىلىك راسىمدىك-پروتسەستىك كودەكسىنە»، «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنە، «ەكولوگيالىق كودەكسىنە» جانە «اقپاراتقا قول جەتكىزۋ تۋرالى»، «قۇقىقتىق اكتىلەر تۋرالى»، «قازاقستان رەسپۋبليكاسىنداعى ءتىل تۋرالى»، «مەملەكەتتىك ناگرادالار تۋرالى»، «رۇقساتتار جانە حابارلامالار تۋرالى» قۇجاتتارعا وزگەرىستەر مەن تولىقتىرۋلار ەنگىزىلىپ جاتىر.
- اتاپ ايتقاندا، «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنە ۋاكىلەتتى ورگاننىڭ قۇزىرەتىنە ينتەرنەت-پورتالدا دەنساۋلىق ساقتاۋ جۇيەسىنىڭ ءجاي-كۇيى تۋرالى وبەكتيۆتى اقپاراتتى جانە اشىق دەرەكتەردى ورنالاستىرۋ جونىندەگى فۋنكتسيانى ەنگىزۋ بويىنشا تولىقتىرۋ ەنگىزىلەدى. «ەكولوگيالىق كودەكسكە» وبلىستىڭ، رەسپۋبليكالىق ماڭىزى بار قالانىڭ، استانانىڭ جەرگىلىكتى اتقارۋشى ورگاندارىنا جىل سايىن 1-مامىرعا دەيىن ءوزىنىڭ رەسمي ينتەرنەت-رەسۋرسىندا وتكەن جىلعى قورشاعان ورتا ساپاسى بويىنشا نىسانالى كورسەتكىشتەردىڭ ناقتى ناتيجەلەرى، جەرگىلىكتى دەڭگەيدە ەكولوگيالىق ساياساتتى ىسكە اسىرۋ بارىسى، جەرگىلىكتى بيۋجەتكە قورشاعان ورتاعا تەرىس اسەر ەتكەنى ءۇشىن تۇسكەن تولەمدەردىڭ جالپى سوماسى تۋرالى اقپاراتتى ورنالاستىرۋعا مىندەتتەيتىن نورمالار ەنگىزىلدى، - دەدى سەناتور امانگەلدى تولاميسوۆ.
ونىڭ ايتۋىنشا، زاڭ اشىق مەملەكەت قاعيداتىن دامىتىپ، ازاماتتاردىڭ مەملەكەتتىك ورگانداردىڭ قىزمەتىنە قول جەتكىزىلۋى شەكتەلمەگەن اقپاراتتاردى ەركىن الۋىن قامتاماسىز ەتەدى. بۇل ءوز كەزەگىندە ەلىمىزدە ازاماتتىق قوعامدى نىعايتىپ، حالىقتىڭ مەملەكەتتىك باسقارۋعا قاتىسۋىن ىنتالاندىرادى.
سونىمەن قاتار، «قازاقستان رەسپۋبليكاسىنىڭ مەملەكەتتىك ناگرادالارى تۋرالى» زاڭىنا مەملەكەتتىك ناگرادالار الۋ ءۇشىن قويىلاتىن تالاپتاردى جەتىلدىرۋگە باعىتتالعان تۇزەتۋلەر ەنگىزىلەدى. ماسەلەن، مەملەكەتتىك ناگرادالار قاتارىنان قازاقستان رەسپۋبليكاسىنىڭ قۇرمەت گراموتاسىن الىپ تاستاۋ، «داڭق» وردەنىمەن كۇشتىك قۇرىلىمداردىڭ تەك باسشىلىق قۇرامداعى ادامدارىن ماراپاتتاۋ سىندى تۇزەتۋلەر قارالعان.
بۇدان بولەك، «قازاقستان رەسپۋبليكاسىنداعى تىل تۋرالى» زاڭىنا كورنەكى اقپارات قۇرالدارىن ورنالاستىرۋ بولىگىندە، ولاردى الدىن الا جەرگىلىكتى اتقارۋشى ورگاندارمەن كەلىسۋ تۋرالى نورمالار ەنگىزىلىپ وتىر.
زاڭدى پارلامەنت سەناتىندا قاراۋ بارىسىندا جوسپاردان تىس تەكسەرۋ تاعايىنداۋ نەگىزدەرى، سونداي-اق تەكسەرەتىن مەملەكەتتىك ورگاننىڭ قۇقىقتارى مەن مىندەتتەرىن بەلگىلەۋ بولىگىندە تولىقتىرۋلار ەنگىزىلدى. بارلىق تۇزەتۋلەر قازاقستان رەسپۋبليكاسى كاسىپكەرلىك كودەكسىنىڭ نورمالارىنا سايكەس كەلتىرىلدى.
- زاڭدى قاراۋ بارىسىندا، اقپاراتقا قول جەتكىزۋ سالاسىنداعى ۋاكىلەتتى ورگانعا اقپاراتقا قول جەتكىزۋ سالاسىنداعى مەملەكەتتىك باقىلاۋ قۇزىرەتىن بەرۋ بولىگىندە ەسكەرتۋلەر مەن ۇسىنىستار كەلىپ ءتۇستى. ولار مەملەكەتتىك باقىلاۋدى تاعايىنداۋ نەگىزدەرىن تولىقتىرۋعا، سونداي-اق تەكسەرۋشى مەملەكەتتىك ورگاننىڭ قۇقىقتارى مەن مىندەتتەرىن بەلگىلەۋگە باعىتتالعان، - دەدى دەپۋتات.
