سەنات «كەلەشەك» ەرىكتى جيناقتاۋ جۇيەسىنە قاتىستى زاڭدى ماقۇلدادى

- زاڭدا ءتيىستى نوۆەللالار ەسكەرىلگەن. بىرىنشىدەن، قازاقستان پرەزيدەنتىنىڭ «مەملەكەتتىك اپپاراتتىڭ قىزمەتىن بيۋروكراتيادان ارىلتۋ جونىندەگى شارالار تۋرالى» جارلىعىن ىسكە اسىرۋ ماقساتىندا ازىرلەندى. وسى ورايدا، اقپارات ءارى قوعامدىق دامۋ، مادەنيەت، مۇراعات ءىسى سالالارىندا شامادان تىس رەگلامەنتتەۋدى ازايتادى. سونداي-اق جۇمىستى جەدەل ۇيىمداستىرۋ ماقساتىندا وسى سالالارعا قاتىستى زاڭدارداعى مەملەكەتتىك ورگاننىڭ نەگىزگى قىزمەتىنە، ىشكى راسىمدەرىنە، ونىڭ باسقا مەملەكەتتىك ورگاندارمەن ءوزارا ءىس-قيمىلىنا بايلانىستى ەرەجەلەردى زاڭعا تاۋەلدى نورماتيۆتىك-قۇقىقتىق اكتىلەردىڭ دەڭگەيىنە ءتۇسىرۋ ۇسىنىلدى، - دەدى سەناتور ايگۇل قاپباروۆا.

ەكىنشىدەن، ق ر ۇكىمەتىنىڭ قۇزىرەتىنە كرەاتيۆتى يندۋستريانى دامىتۋعا جاردەمدەسەتىن زاڭدى تۇلعانى ايقىنداۋ بويىنشا قۇزىرەت بەرىلەدى. سايكەسىنشە، مادەنيەت سالاسىنداعى ۋاكىلەتتى ورگان كرەاتيۆتى يندۋسترياعا مەملەكەتتىك قولداۋ كورسەتۋ جانە ىنتالاندىرۋ قاعيدالارىن ازىرلەۋ ءارى بەكىتۋ جونىندەگى وكىلەتتىككە يە بولادى. كرەاتيۆتى يندۋستريالار سالاسىنداعى مەملەكەتتىك ساياساتتى ىسكە اسىرۋ وبلىستىڭ، رەسپۋبليكالىق ماڭىزى بار قالانىڭ جانە استانانىڭ جەرگىلىكتى اتقارۋشى ورگاندارىنىڭ قۇزىرەتىنە دە ەنگىزىلەدى.

- ۇشىنشىدەن، مەملەكەت باسشىسىنىڭ 2023-جىلعى 1-قىركۇيەكتەگى قازاقستان حالقىنا جولداۋىندا ايتىلعان تاپسىرماسىن ورىنداۋ ماقساتىندا «كەلەشەك» ءبىرىڭعاي ەرىكتى جيناقتاۋ جۇيەسىنىڭ قىزمەتىن رەگلامەنتتەيتىن تۇزەتۋلەردى ەنگىزۋ كوزدەلىپ وتىر. جۇيەدە قازاقستاندا، شەتەلدە كاسىپتىك-تەحنيكالىق، جوعارى، جوعارى وقۋ ورنىنان كەيىنگى بىلىمگە اقى تولەۋ ماقساتىندا قاراجاتتى جيناقتاۋعا بولادى. اعىمداعى كۇنتىزبەلىك جىلى 5 جاسقا تولعان بالالار ءۇشىن سالىمداردى ەكىنشى دەڭگەيدەگى بانكتەردە جانە ءومىردى ساقتاندىرۋ كومپانيالارىندا اشۋ مۇمكىندىگى بەرىلەدى. مۇنىڭ تارتىمدىلىعىن ارتتىرۋ رەتىندە - سالىمشىلارعا مەملەكەتتەن جىل سايىنعى سىيلىقاقى بەرۋ، ينۆەستيتسيالىق كىرىس الۋ (باستاپقى ءبىلىم بەرۋ كاپيتالىن (60 ا ە ك)، جىل سايىنعى مەملەكەتتىك سىيلىقاقى (%5 جانە %7)، بانكتىڭ سىياقىسىن نەمەسە ساقتاندىرۋ ۇيىمىنىڭ ينۆەستيتسيالىق كىرىسى (ورتا ەسەپپەن %12) الادى)، سالىمعا كەپىلدىك بەرۋ، ءوندىرىپ الۋدان بوساتىلۋ جانە وقۋ ورنىن تاڭداۋ بويىنشا شەكتەۋلەردىڭ بولماۋى مۇمكىندىكتەرى قارالعان، - دەدى دەپۋتات.

بيىل قاراشا ايىندا عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ «كەلەشەك» كاپيتالىن تولەۋگە قاتىستى تۇسىنىك بەردى.

بۇعان دەيىن «كەلەشەك» باعدارلاماسى قانداي مۇمكىندىك بەرەتىنىن جازعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى