سەنات ءتوراعاسى رەسەيدىڭ قاتىسۋىمەن قازاقستاندا سالىناتىن جىلۋ ەلەكتر ورتالىقتارىنا قاتىستى پىكىر ءبىلدىردى
سەنات ءتوراعاسى ماۋلەن اشىمبايەۆ رەسەيدىڭ قاتىسۋىمەن قازاقستاندا سالىناتىن ءۇش جىلۋ ەلەكتر ورتالىعىنا قاتىستى پىكىر ءبىلدىردى، دەپ حابارلايدى Kazinform.
سەنات ءتوراعاسى رەسەي قازاقستاننىڭ ستراتەگيالىق سەرىكتەسى ەكەنىن ايتا كەلە: «ەكى ەل اراسىندا تىعىز ەكونوميكالىق قاتىناس ورناعان جانە ءبىرقاتار بىرلەسكەن ەكونوميكالىق جوبالار بار. قازىر ەلىمىز ءۇشىن كۇردەلى ماسەلەلەردىڭ ءبىرى - ينفراقۇرىلىمدى جاڭعىرتۋ. حالىقتى جىلۋمەن جانە ىستىق سۋمەن قامتاماسىز ەتۋ جۇيەسىن جاڭعىرتۋ كەرەك. بىلتىر قىستا بۇل باعىتتاعى كۇردەلى پروبلەمانى بايقادىڭىزدار، ياعني وسى ماسەلە تەك پاۆلودار وبلىسىندا عانا بولعان جوق. ەلىمىزدىڭ وڭىرلەرىندەگى جىلۋ ەلەكتر ستانتسيالارى نەگىزىنەن كەڭەستىك كەزەڭدە سالىنعان. سوندىقتان ولاردىڭ ەسكىرگەنىن ەسكەرۋ كەرەك»، - دەدى.
سونىمەن قاتار ول قازىر ەلىمىزدە بارلىق جىلۋ ەلەكتر ستانتسيالارى مەن ينجەنەرلىك ينفراقۇرىلىمدى جاڭعىرتۋ جۇمىستارى باستالعانىن ايتتى.
«بۇعان مەملەكەت قىرۋار قاراجات جۇمساۋى ءتيىس. ارينە، مۇمكىندىگىنشە رەسپۋبليكالىق بيۋدجەتتەن قارجى ءبولىپ جاتىرمىز، ءبىراق بۇل قاراجات جەتكىلىكسىز. بىزگە جىلۋ ەلەكتر ورتالىقتارىن جاڭعىرتۋ ءۇشىن قاراجات سالاتىن ينۆەستورلار قاجەت. بارشا ەلىمىزدىڭ اۋماعىنداعى جىلۋ ەلەكتر ورتالىقتارىن جاڭعىرتۋ مىندەتى تۇر. اتاپ ايتقاندا، الداعى ۋاقىتتا اتقارىلاتىن جالپى جۇمىس اۋقىمىندا سالىناتىن ءۇش جىلۋ ەلەكتر ورتالىعى (رەسەيدىڭ قاتىسىمەن سالىناتىن) شامالى عانا ءبىر بولىگىن قۇراپ تۇر»، - دەدى م. اشىمبايەۆ.
بۇدان بۇرىن حابارلانعانداي، جاقىندا قازاقستان مەن رەسەيدىڭ XIX ءوڭىرارالىق ىنتىماقتاستىق فورۋمىندا رەسەيدىڭ قاتىسۋىمەن قازاقستاندا 3 جىلۋ ەلەكتر ورتالىعى سالىناتىنى ءمالىم بولدى.
بۇل رەتتە، قازاقستان مەن رەسەي ەنەرگەتيكا مينيسترلىكتەرى اراسىندا كوكشەتاۋ، سەمەي جانە وسكەمەن جىلۋ ەلەكتر ورتالىقتارىن سالۋ جوبالارى بويىنشا ىنتىماقتاستىق جونىندەگى ءوزارا تۇسىنىستىك مەموراندۋمىنا قول قويىلدى.
