سەمەيدە مەكتەپ وقۋشىسىن سوققىعا جىققان جەتكىنشەكتەردىڭ اتا-انالارى جاۋاپقا تارتىلدى
سەمەي. KAZINFORM - اباي وبلىسىنىڭ كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتى مەكتەپ وقۋشىسىن سوققىعا جىققان جەتكىنشەكتەردىڭ اتا-انالارىنا قاتىستى ۇكىم شىعاردى.
سوت شەشىمىمەن ولار اتا-انالىق مىندەتتەرىن تيىسىنشە ورىنداماۋىنىڭ اكىمشىلىك جازاعا اكەلىپ سوعۋى بابى بويىنشا كىنالى دەپ تانىلدى.
اتا-انالاردىڭ ءبىرى بەس تاۋلىككە اكىمشىلىك قاماۋعا الىندى. تورتەۋىنە 78640 تەڭگە مولشەرىندە ايىپپۇل سالىندى.
- اتا-انالار بالالارىنىڭ مىنەز-قۇلقىن، ءجۇرىس-تۇرىسىن دۇرىس قاداعالاماعان. سوت شەشىم شىعاراردا بارلىق ءمان-جايدى ەسكەردى، - دەپ حابارلادى سوتتىڭ باسپا ءسوز قىزمەتى.
ەسكە سالساق، اقپان ايىندا سەمەيدە جاس وسپىرىمدەر التىنشى سىنىپ وقۋشىسىن سوققىعا جىققانى حابارلانعان.
زارداپ شەككەن بالاعا قازاقستاندىقتار پاتەر الىپ بەرگەن ەدى.
كەيىن اباي وبلىسىنىڭ كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتى وقۋشىنى سوققىعا جىققان جاس وسپىرىمدەردى ارنايى مەكتەپتەرگە جىبەرۋگە قاتىستى ءىستى قاراعان.
