سەمەيدە شىرشا بەزەندىرگەن مۇعالىمنىڭ جاراقات الۋىنا قاتىستى ءبىلىم ءبولىمىنىڭ باسشىسى جۇمىستان شىعارىلدى
سەمەي. KAZINFORM - سەمەي قالاسىندا ءبىلىم ءبولىمىنىڭ باسشىسى ءبىرجان بۇلابايەۆ قىزمەتىنەن بوساتىلدى.
ونىڭ جۇمىستان شىعۋىنا مۇعالىمدەردى سەمەي قالاسىنىڭ ورتالىق الاڭىنداعى جاڭاجىلدىق شىرشانى بەزەندىرۋگە زاڭسىز تارتۋ سەبەپ بولعان. سونىڭ سالدارىنان مۇعالىمدەردىڭ ءبىرى - قۋات ايتقاليەۆ زارداپ شەكتى.
وقۋ-اعارتۋ ءمينيسترى عاني بەيسەمبايەۆ بۇل جاعدايدى جەكە باقىلاۋىنا الدى. ول مۇنداي ارەكەتتەردىڭ ق ر «پەداگوگ مارتەبەسى تۋرالى» زاڭىن ورەسكەل بۇزاتىنىن ايتتى.
- مۇعالىمدەردى كاسىبي قىزمەتىنە قاتىسى جوق جۇمىستارعا تارتۋعا تىيىم سالىنادى. تەرگەۋ امالدارى تالاپقا ساي جۇرگىزىلىپ، وسىنداي جاعدايدىڭ قايتالانباۋى ءۇشىن ءتيىستى شارالار قابىلدانادى دەپ سەنەمىز، - دەدى ول.
سونداي-اق عاني بەيسەمبايەۆ زارداپ شەككەن ۇستاز بەن ونىڭ وتباسىنا قولداۋ ءبىلدىردى. قازىر قۋات ايتقاليەۆكە بارلىق قاجەتتى مەديتسينالىق كومەك كورسەتىلىپ جاتىر.
ەسكە سالساق، وسىعان دەيىن سەمەيلىك مۇعالىم شىرشا بەزەندىرۋ كەزىندە جاراقات العانى حابارلانعان.
شىرشا بەزەندىرۋ كەزىندە بيىكتەن قۇلاعان №49-مەكتەپتىڭ قازاق ءتىلى مەن ادەبيەتى ءپانىنىڭ مۇعالىمى قۋات ايتقاليەۆتىڭ جارى سىمبات ايان قىزى دا مەكتەپ مۇعالىمى. ول وقيعانىڭ قالاي بولعانىن باياندادى.
«وقيعادان ءبىر كۇن بۇرىن كۇيەۋىمە دوسى حابارلاستى. «تاڭعى ساعات 9 دا شىرشا قۇرۋعا باراسىڭدار» دەگەن بۇيرىق كەلگەن. ەرتەسى كۇنى 9 جارىمدا سول جەردە بولعان. بەزەندىرۋ كەزىندە 4 مەتر بيىكتىكتەن قۇلاعان. وقيعا ورنىنا بىردەن جەتتىم. مەن كەلسەم وپەراتسياعا الىپ كەتكەن ەكەن. جاعدايىن وتە اۋىر دەپ باعالادى دارىگەرلەر. ولاردىڭ سوزىنشە، جولداسىمنىڭ باس سۇيەگى سىنعان» دەدى مۇعالىمنىڭ جارى.
«اكىمدىك كىنالى»
سىمبات ايان قىزى وقىس وقيعادان زارداپ شەككەن جولداسىنىڭ بۇل جاعدايىنا ءبىلىم بولىمىنەن بولەك، اكىمدىك تە كىنالى دەپ سانايدى. ونىڭ ايتۋىنشا، قۋات ايتقاليەۆ قۇرۋعا بارعان شىرشا اكىمدىكتىڭ شىرشاسى.
«بۇل پەداگوگتىڭ كاسىبي قۇزىرەتتىلىگىنە كىرمەيتىن شارۋا. بۇعان تەك ءبىلىم ءبولىمى عانا ەمەس، اكىمدىك تە كىنالى. اكىمدىك تىكەلەي ءبىلىم بولىمىنە بۇيرىق بەرگەن. بۇل - اكىمدىكتىڭ شىرشاسى. وعان اپارىپ بەيشارا مۇعالىمدەردى جۇمسايدى. جولداسىمنىڭ جاعدايى قالاي بولاتىنىن بىلمەيمىن. ءبىراق بۇل وتە اۋىر جاعداي» دەدى ول.
«ءوز ەركىمەن بارعان جوق»
ايەلىنىڭ سوزىنشە ول شىرشا قۇرۋعا ءوز ەركىمەن بارماعان. وعان باسشىلىقتان بۇيرىق كەلىپ، سول بۇيرىقتى ورىنداۋعا كەتكەن دەيدى.
«ول شىرشاعا اياعىمەن كادىمگىدەي شىققان. كوبى ايتىپ جاتىر عوي، ءوز ەركىمەن كەلدى دەپ. جوق، ول ءوز ەركىمەن بارعان جوق. ولارعا بارىڭدار دەپ ايتتى. سولاي ول باردى. سەنبى كۇنى جۇمىسقا شىققانى ءۇشىن قوسىمشا اقشا تولەيدى دەپ ەشتەڭە ايتپاعان دا. ديرەكتور ايتتى دەپ باردى» دەپ جاۋاپ بەردى مۇعالىمنىڭ جارى سىمبات ايان قىزى.
