سەمەي ورمانىنداعى ءورت ادەيى ۇيىمداستىرىلدى ما - ءمينيستردىڭ جاۋابى
ەكولوگيا جانە تابيعي رەسۋرستار ءمينيسترى ەرلان نىسانبايەۆ بيىل اباي وبلىسى سەمەي ورمانى رەزەرۆاتىندا بولعان ءورتتىڭ ادەيى جاسالاۋى مۇمكىن بە، دەگەن ساۋالعا جاۋاپ بەردى، دەپ حابارلايدى Kazinform.
«اباي وبلىسىنداعى ورمان ءورتى بويىنشا مۇددەلى مەملەكەتتىك ورگاندار وكىلدەرىنىڭ اراسىنان قۇرىلعان ارنايى كوميسسيانىڭ قورىتىندىسى بار. وندا ورتكە سەبەپ نايزاعاي دەپ ناقتى ايتىلعان. نايزاعاي تۇسكەن اعاش دالەلى بار. ءبىز رەسمي نۇسقانى ۇستانامىز. قاساقانا ورتەۋگە قاتىستى تەرگەۋ ناتيجەلەرىن كۇتەيىك، سودان كەيىن تۇسىنىكتى بولادى. ءبىز ورمانداردىڭ ادەيى ورتەنىپ جاتقانى تۋرالى اڭگىمەلەردى ۇنەمى ەستىپ جاتامىز»، - دەدى ەرلان نىسانبايەۆ و ك ق- دە وتكەن بريفينگىدە.
ەكولوگيا ءمينيسترىنىڭ ايتۋىنشا، سوڭعى 30 جىلدا قاساقانا ورتەۋ فاكتىلەرى تىركەلدى.
«ءبىز ونى جاسىرمايمىز، ءبىراق سوڭعى جىلدارى جاز وتە قۇرعاق بولدى جانە تابيعاتتى قورعاۋ كاسىپورىندارى ناۋرىزدان قازانعا دەيىن قاربالاس رەجيمدە جۇمىس ىستەيدى. ستاتيستيكا كورسەتىپ وتىرعانداي، ءورتتىڭ %70 ى دالالىق جەردە تىركەلەدى. ودان بولەك نايزاعاي سەبەپ. مەنىڭ تاجىريبەمدە سەمەي وبلىسىندا جۇمىس ىستەگەن كەزىمدە تاۋلىگىنە 25 نايزاعاي بولۋى مۇمكىن ەدى»، - دەپ تولىقتىردى ۆەدومستۆو باسشىسى.
