سەمەي تۇرمەسىندەگى ءولىم: ءبىرقاتار لاۋازىمدى تۇلعالار جازالاندى

«اباي وبلىسى بويىنشا قىلمىستىق-اتقارۋ جۇيەسى دەپارتامەنتى مەن پروكۋراتۋرا سەمەيدەگى 19№ جازا وتەۋ مەكەمەسىندە بولعان جاعدايعا تەكسەرۋ جۇرگىزدى. اتاپ ايتقاندا، ب ا ق جانە الەۋمەتتىك جەلىلەردە ەسىمى كورسەتىلگەن تۇرمەدە جازاسىن وتەپ جاتقان ازاماتتاردان جاۋاپ الىندى. تەكسەرۋ ناتيجەسىندە ايتىلعان فاكتىلەر راستالمادى»، - دەگەن جاۋاپ كەلدى ىشكى ىستەر مينيسترلىگى قىلمىستىق-اتقارۋ كوميتەتىنەن Kazinform جولداعان ساۋالعا.

رەسمي ساۋال جاۋابىندا ايتىلعانداي، 5- قازاندا اباي وبلىسىنىڭ 19№ قاۋىپسىزدىگى ارالاس قىلمىستىق-اتقارۋ جۇيەسى مەكەمەسىندە 2 سوتتالعاننىڭ اراسىندا جانجال بولىپ، ءبىرى العان جاراقاتىنان وقيعا ورنىندا قايتىس بولعان.

«اتالعان فاكتى بويىنشا اباي وبلىسى پوليتسيا دەپارتامەنتى قىلمىستىق كودەكستىڭ 99-بابى 1-بولىگى بويىنشا سوتقا دەيىنگى تەرگەۋدى باستادى. اباي وبلىسى بويىنشا قىلمىستىق-اتقارۋ جۇيەسى دەپارتامەنتى قىزمەتتىك تەرگەۋ جۇرگىزدى. ونىڭ قورىتىندىسى بويىنشا ءبىرقاتار قىزمەتكەر قاتاڭ تارتىپتىك جاۋاپكەرشىلىككە تارتىلدى»، - دەيدى كوميتەتتەن.

سونداي-اق اتالعان ۆەدومستۆو قىلمىستىق-پروتسەستىك كودەكستىڭ تالاپتارىنا سايكەس وزگە اقپارات جاريالانبايتىنىن ەسكەرتتى.

ەسكە سالايىق، Kazinform رەداكسياسى وسى وقيعا تۋرالى حابار العان بويدا اباي وبلىسى بويىنشا ق ا ج د- دان اقپارات سۇراعان بولاتىن.

الايدا قىلمىستىق-اتقارۋ جۇيەسى دەپارتامەنتى بۇل فاكتىنى جوققا شىعارعان ەدى.

كەيىن ىشكى ىستەر مينيسترلىگى اباي وبلىسىنداعى تۇرمەدە ادام ءولىمى بولعانىن راستادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى