«سلاۆيان بازارى»: روزا رىمبايەۆا - قازىلار القاسىنىڭ ءتوراعاسى
استانا. KAZINFORM - بەلارۋس ەلىنىنىڭ ۆيتەبسك قالاسىندا وسىمەن XXXIII رەت ۇيىمداستىرىلىپ وتىرعان حالىقارالىق ونەر فەستيۆالىندە قازاقستاننىڭ حالىق ءارتىسى روزا رىمبايەۆا قازىلار القاسىنىڭ ءتوراعاسى رەتىندە ۇمىتكەرلەردىڭ تالانتىن باعالاماق.
بۇل تۋرالى ءانشى ءوزىنىڭ Instagram پاراقشاسىندا ءبولىسىپ، جاۋاپكەرشىلىگى مول شارۋا سەنىپ تاپسىرىلعانىن اتاپ ءوتتى.
«قادىرلى جەرلەستەر! ءبىز بەلارۋس ەلىندەمىز. «لۋچەسا» قوناق ۇيىنە ايالدادىق. ۆيتەبسك قالاسىندا وتكەلى وتىرعان «سلاۆيان بازارى» اتتى اۋقىمدى فەستيۆالگە كەپ قالدىق. بيىل مەن قازىلار القاسىنىڭ ءتوراعاسىمىن. بۇل - وتە ماڭىزدى ءارى جاۋاپكەرشىلىگى جوعارى جۇمىس»، - دەدى روزا رىمبايەۆا.
ايتا كەتەيىك، روزا رىمبايەۆا قازىلار القاسىنىڭ تۇراقتى مۇشەلەرىنىڭ ءبىرى. 2018 -جىلى بەلارۋس پرەزيدەنتى الەكساندر لۋكاشەنكو فەستيۆالدىڭ سالتاناتتى اشىلۋ راسىمىندە روزا رىمبايەۆاعا «ونەر ارقىلى - بەيبىتشىلىك پەن ءوزارا تۇسىنىستىككە» ارنايى ماراپاتىن تابىس ەتكەن بولاتىن. سونداي-اق، ۆيتەبسك قالاسىنداعى «جۇلدىزدار الاڭىندا» قازاقستاندىق ءانشىنىڭ جۇلدىزى ورناتىلعان ەدى.
بيىل لۋكاشەنكو «سلاۆيان بازارىنىڭ» اشىلۋ سالتاناتىندا سويلەگەن سوزىندە ش ى ۇ ەلدەرى ۇجىمدارىنىڭ قاتىسۋىن ەرەكشە اتاپ ءوتتى. بۇل جولى 42 ەلدىڭ ونەرپازى جۇلدەگە تالاساتىنىن اتاپ وتكەن ءجون.
ەستەرىڭىزگە سالساق، بۇعان دەيىن ساعىن ءومىرباي ۇلى «سلاۆيان بازارىنىڭ» بالالار بايقاۋىندا ەكىنشى ورىن العانىن جازعان ەدىك.
