Silk Way Star بايقاۋىنىڭ العاشقى كەزەڭىندە مالايزيا ءانشىسى توپ جاردى
استانا. KAZINFORM - بۇگىن «Jibek Joly» ارناسىندا «Silk Way Star» حالىقارالىق ۆوكالدىق بايقاۋىنىڭ العاشقى شىعارىلىمى كورەرمەنگە جول تارتتى، دەپ حابارلايدى Kazinform ءتىلشىسى.
جوبا قىتاي، مالايزيا، وڭتۇستىك كورەيا، قىرعىزستان، وزبەكستان، ازەربايجان، ارمەنيا، گرۋزيا، قازاقستان، موڭعوليا، تاجىكستان جانە تۇرىكمەنستاننان كەلگەن تالانتتى ارتىستەردى ءبىر ساحنادا توعىستىردى.
بۇگىن بايقاۋ قاتىسۋشىلارى ءوز رەپەرتۋارلارىنان انا تىلدەرىندە ءان شىرقادى جانە ءوز ەلدەرىن تانىستىردى. العاشقى شىعارىلىمدا ەشبىر قاتىسۋشى جارىستان شىعارىلمايدى، بارلىعى كەلەسى كەزەڭگە جولداما الدى.
قازاقستان اتىنان ساحنادا تانىمال ۆوكاليست باتىرحان مالىكوۆ (Alem) ونەر كورسەتىپ، حيتكە اينالعان «Kuiim» ءانىن ورىندادى. العاشقى كەزەڭ ناتيجەسى بويىنشا ب. مالىكوۆ 7-ورىندا تۇر.
قازىلار القاسىنىڭ باعالاۋىنشا، بۇل كەزەڭدە مالايزيالىق ءانشى Yazmin Aziz 126 ۇپايمەن كوش باستاپ تۇر. ەكىنشى ورىندا وزبەكستاندىق مادينابونۋ ءادىلوۆا (122)، ءۇشىنشى جانە ءتورتىنشى ورىندا - 120 ۇپايمەن تۇرىكمەنستاندىق دوۆران شاممىيەۆ جانە گرۋزيالىق اۆتانديل ابەسلاميدزە تۇر.
بەسىنشى جانە التىنشى ورىندا 114 ۇپاي العان چجان حەسيۋان قىرعىزستاندىق رەپ ورىنداۋشى تامگا مەن قىتايلىق چجان حەسيۋان تۇر.
جەتىنشى ورىندا - قازاقستاندىق باتىرحان مالىكوۆ، سەگىزىنشى جانە توعىزىنشى ورىندا - 106 ۇپاي العان تاجىكستاندىق فاحريددين حاكيموۆ پەن ارمەنيالىق سارو گيەۆورگيان بار.
ونىنشى جانە ون ءبىرىنشى ورىنداردى - 104 ۇپاي العان موڭعوليالىق ميشەل دجوزەف پەن ازەربايجاندىق سابينا زادە يەلەندى.
ەڭ سوڭعى ون ەكىنشى ورىن ازىرگە Kandis دەپ اتالاتىن وڭتۇستىككورەيالىق R B/نەو- سوۋل/حيپ- حوپ توبىندا. ولار 92 ۇپاي الدى.
ايتا كەتەيىك، Silk Way Star مەگا جوباسى 12 ەلدىڭ تەلەارناسىنان بىردەي كورسەتىلەدى. Silk Way Star قازىردىڭ وزىندە «ەۋرازيانىڭ جاڭا مادەني برەندى» اتانىپ وتىر. جوبا جىلدىڭ ەڭ جارقىن مۋزىكالىق وقيعالارىنىڭ بىرىنە اينالادى دەپ كۇتىلۋدە.
جەڭىمپازدى بارلىق قاتىسۋشى ەلدەردەن قۇرالعان حالىقارالىق قازىلار القاسى انىقتايدى. وعان SILK WAY STAR ەرەكشە اتاعى بەرىلىپ، ونەرىن جاھاندىق ساحنادا تانىتۋ مۇمكىندىگى ۇسىنىلادى. شوۋدىڭ فينالى 22 -قاراشادا حالىقارالىق ترانسلياتسيامەن تىكەلەي ەفير فورماتىندا وتەدى.
بايقاۋ فورماتىندا 10 باعدارلاما جوسپارلانعان، ال جەڭىمپاز %50 - قازىلار شەشىمى، %50 - كورەرمەندەردىڭ ونلاين داۋىس بەرۋ ناتيجەسىندە انىقتالادى. جوبانى 1 ميللياردتان استام كورەرمەن تاماشالايدى دەپ بولجانىپ وتىر.
