سۋدان اسكەرى پرەزيدەنت سارايىن ءوز باقىلاۋىنا العانىن مالىمدەدى

BBC مالىمەتىنشە، سۋدان اسكەرى ەكى جىل بۇرىن قارسىلاس جەدەل قولداۋ كۇشتەرى ىعىستىرىپ شىعارعان ەل استاناسى حارتۋمدى قايتا باقىلاۋىنا الىپ وتىر.

اسكەردىڭ رەسمي وكىلى نابيل ابداللا مەملەكەتتىك تەلەارنا ەفيرىندە اسكەريلەردىڭ پرەزيدەنت سارايىن جانە حارتۋم ورتالىعىنداعى مينيسترلىك عيماراتتارىن باقىلاۋعا العانىن مالىمدەدى.

- ءبىزدىڭ كۇشتەر قارسىلاستىڭ تەحنيكاسى مەن جاساقتارىن تولىق جويىپ، كوپتەگەن قارۋ-جاراق پەن اسكەري جابدىقتاردى قولعا ءتۇسىردى، - دەپ مالىمدەدى ابداللا.

سونداي-اق ول ارميانىڭ «تولىق جەڭىسكە» جەتكەنشە كۇرەسۋدى جالعاستىراتىنىن ايتتى.

جەدەل قولداۋ كۇشتەرى بۇل جاعدايعا قاتىستى تۇسىنىكتەمە بەرۋدەن باس تارتتى.

حارتۋمدا ەكى جىل بۇرىن باستالعان ازاماتتىق سوعىس سۋداندى قاقتىعىستار مەن قانتوگىسكە دۋشار ەتتى. 2021 -جىلى ەلدى 30 جىل باسقارعان پرەزيدەنت ومار ءال-باشير بيلىكتەن كەتكەننەن كەيىن، ەلدى اسكەري بيلىك باسقاردى.

حارتۋمدى قايتا الۋ - سۋدان قارۋلى كۇشتەرى ءۇشىن ۇلكەن جەڭىس بولىپ، سوعىستىڭ بەتبۇرىستى كەزەڭىنە اينالۋى مۇمكىن. سوڭعى اپتالاردا اسكەر ەلدىڭ ورتالىق اۋداندارىندا دا ايتارلىقتاي جەتىستىكتەرگە قول جەتكىزدى.

بەيسەنبى كۇنى كۋاگەرلەر رەسپۋبليكالىق ساراي ماڭىندا دروندار مەن اۋە سوققىلارىنىڭ جارىلىستارى بولعانىن حابارلادى. سەنبى كۇنى ۆيدەو ۇندەۋ جاساعان جەدەل قولداۋ كۇشتەرىنىڭ جەتەكشىسى حامەتي پرەزيدەنت سارايىن جانە ونىڭ اينالاسىنداعى اۋدانداردى قورعاۋعا ۋادە بەرىپ، ەلدىڭ سولتۇستىگىندەگى بىرنەشە قالاعا جاڭا شابۋىلدار جاساۋ قاۋپىن ءتوندىردى.

ب ۇ ۇ دەرەكتەرىنە سايكەس، سۋدانداعى سوعىس الەمدەگى ەڭ اۋقىمدى گۋمانيتارلىق داعدارىسقا اكەلدى. قاقتىعىسقا قاتىسۋشى ەكى تاراپ تا ادام قۇقىقتارىنىڭ جاپپاي بۇزىلۋىنا ايىپتالۋدا. بەيبىت كەلىسسوزدەر جاساۋ ارەكەتتەرى بىرنەشە رەت ساتسىزدىككە ۇشىرادى، ويتكەنى ەكى جاق تا ستراتەگيالىق ايماقتارعا باقىلاۋ ورناتۋ ءۇشىن كۇرەستى جالعاستىرۋعا انت بەرگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى