سايلاۋدا وزىمىزگە ىڭعايلى ادامدى وتكىزەمىز دەگەندى قويۋ كەرەك - جاڭبىرشين
استانا. KAZINFORM - سايلاۋدى «تازا» وتكىزۋگە جەتە الماي ءجۇرمىز. مۇنداي پىكىردى ءماجىلىس دەپۋتاتى ەدىل جاڭبىرشين ءبىلدىردى.
- پرەزيدەنت حالىقتى مەملەكەتتى باسقارۋعا مەيلىنشە تارتۋ كەرەكتىگىن ايتىپ ءجۇر. حالىق مەملەكەتتى باسقارۋدان تىس قالماۋى كەرەك. ەگەر ول ماسەلەگە ەتەنە ارالاسسا، وندا ول مەملەكەتشىل، وتانشىل، مەملەكەتتى قورعاۋعا، ونىڭ ودان ارى دامۋىنا مۇددەلى بولادى. سول ءۇشىن ونى مەملەكەتتى باسقارۋ ىسىنە تارتۋىمىز كەرەك. تارتۋدىڭ ءبىر جولى - سايلاۋ. بۇل ورايدا ساياسي ساۋاتتىلىق، ساياسي مادەنيەت دەگەن ماسەلە بار. ساياسي مادەنيەتتىلىككە جەتكەن كەزدە ترايباليزمنەن، جەرشىلدىكتەن، باسقا دا قوعامداعى اۋرۋلاردان قۇتىلامىز، - دەدى ءماجىلىس دەپۋتاتى.
ونىڭ اتاپ وتۋىنشە، ءالى كۇنگە دەيىن سايلاۋدى «تازا» وتكىزۋگە قول جەتكىزە الماي كەلەمىز.
- سايلاۋدى «تازا» وتكىزۋگە جەتە الماي ءجۇرمىز. جالپى، ءبىز اۋرۋلارىمىزدى ايتۋىمىز قاجەت. دارىگەرگە بارعاندا اۋرۋىڭدى ايتپاساڭ، ءدارى بەرە المايدى عوي. «سايلاۋ پروتسەسىن تولىق باقىلاۋعا الامىز، وزىمىزگە ىڭعايلى ادامدى وتكىزەمىز» دەگەن ماسەلەنى قويۋ كەرەك. حالىقتىڭ سايلاعان ادامىن جىبەرۋىمىز قاجەت. قيسايار، ايتەۋىر بۇگىن-ەرتەڭ تۇزەلىپ كەتەدى، - دەدى ەدىل جاڭبىرشين.
بۇعان دەيىن ەدىل جاڭبىرشين ەلىمىزدىڭ ىشكى ساياساتىنداعى شارۋانىڭ ءبارىن جۇيەلەيتىن ءبىرتۇتاس تۇجىرىمدامالىق قۇجات دوكترينا نە ستراتەگيا بولۋى تيىستىگىن ايتقان ەدى.
