سايلاۋعا 13 كۇن قالدى: كامالا حارريس دونالد ترامپتى فاشيست سانايدى
استانا. KAZINFORM - ا ق ش پرەزيدەنتتىگىنە كانديدات كامالا حارريس سارسەنبى كۇنى سايلاۋشىلارمەن كەزدەسۋدە قارسىلاسى دونالد ترامپتى فاشيست دەپ سانايسىز با دەگەن سۇراققا «ءيا» دەپ جاۋاپ بەردى، دەپ حابارلايدى BBC.
«ءيا، مەن سولاي ويلايمىن. مەن سونداي-اق ونىڭ وسى جاعىن جاقسى بىلەتىن ادامدارعا سەنۋ كەرەك دەپ ويلايمىن»، - دەپ جاۋاپ بەردى حارريس زالدان تۇسكەن سۇراققا.
حارريس ترامپتى جاقسى بىلەتىن ادامدار تۋرالى ايتقاندا، ول پرەزيدەنت ترامپتىڭ بۇرىنعى اپپاراتىنىڭ باسشىسى دجون كەلليدى مەڭزەگەن بولۋى مۇمكىن. ول سەيسەنبىدە ەكى سۇحباتىندا دونالد ترامپتى فاشيست دەپ اتادى.
كەللي The New York Times گازەتىنە بەرگەن سۇحباتىندا ترامپتىڭ باسقارۋدا ديكتاتورلىق كوزقاراستى جاقتايتىنىن جانە ونىڭ كوزقاراستارى «فاشيزمنىڭ جالپى انىقتاماسىنا سايكەس كەلەتىنىن» ايتتى.
باسىلىمعا بەرگەن سۇحباتىندا كەللي باسپا سوزدە تاعى تولىقتىردى: ونىڭ ايتۋىنشا، ترامپ ءبىر كەزدەرى ناتسيستىك گەنەرالدار ادولف گيتلەرگە باعىنعانىنداي، قىزمەتكەرلەرىنىڭ دە وعان ءسوزسىز باعىنعانىن قالايتىنىن ايتقان.
ترامپ بۇعان جاۋاپ رەتىندە Truth الەۋمەتتىك جەلىسىندە كەلليدى ازعىن دەپ اتاپ، ونىڭ ناتسيستىك گەنەرالدار تۋرالى اڭگىمەسىنىڭ وتىرىك ەكەنىن مالىمدەدى.
دەگەنمەن CNN ارناسىنىڭ ءتىلشىسى دجيم شۋتتونىڭ «ۇلى دەرجاۆالاردىڭ ورالۋى» كىتابىنا بەرگەن سۇحباتىندا كەللي ترامپتىڭ گيتلەر باسشىلىعىنىڭ كەيبىر اسپەكتىلەرىن جوعارى باعالاعانىن ايتتى. كەللي ترامپتىڭ: «ءبىراق گيتلەر بىرنەشە جاقسى ءىس جاسادى» دەگەن ءسوزىن ەسكە الدى.
دجون كەللي ەكس- پرەزيدەنتتىڭ ناتسيستىك ديكتاتور مەن ونىڭ ارمياسىنا تاڭدانىسى تۋرالى اقپاراتتى جاريالاعاننان كەيىن حارريس ۆاشينگتونداعى رەزيدەنسياسىنىڭ الدىندا سويلەدى.
«دونالد ترامپتىڭ التى ميلليون ەۆرەي مەن جۇزدەگەن مىڭ امەريكالىقتاردىڭ ولىمىنە سەبەپكەر بولعان ادولف گيتلەرگە سىلتەمە جاساۋى شىنىمەن دە الاڭداتارلىق جانە وتە قاۋىپتى. مۇنىڭ ءبارى دونالد ترامپتىڭ شىن مانىندە كىم ەكەنىن دالەلدەيدى»، - دەدى ول.
دەموكراتيالىق كانديداتتىڭ سىنى ا ق ش- تاعى پرەزيدەنتتىك سايلاۋعا نەبارى 13 كۇن قالعان كەزدە ايتىلدى.
وسى ارادا، The Wall Street Journal باسىلىمىنىڭ حابارلاۋىنشا، پرەزيدەنتتىك سايلاۋعا رەسپۋبليكالىق پارتيادان ۇمىتكەر دونالد ترامپ سايلاۋعا ەكى اپتادان از ۋاقىت قالعاندا ۆيتسە-پرەزيدەنت كامالا حارريستى از عانا ارتىقشىلىقپەن - %47- دان %45- عا دەيىن وزدى.
اۆتور
زارينا تۋعانبايەۆا
